ក្រសួងការបរទេសវៀតណាម បាននិយាយកាលពីថ្ងៃម្សិលមិញថា ស្ត្រីជនជាតិវៀតណាម ដែលត្រូវបានគេចាប់ខ្លួនក្នុងនាមជាជនសង្ស័យម្នាក់ពាក់ព័ន្ធនឹងឃាតកម្មបងប្រុសមេដឹកនាំកូរ៉េខាងជើងនោះ គិតថា នាងចូលរួមក្នុងការថតវីដេអូលេងសើចមួយ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
Reuters បានផ្សាយថា ក្រុងហាណូត កាលពីមុន មិនបានបញ្ជាក់ថា ស្ត្រីឈ្មោះ ទាន់ ធីហួង គឺជាជនជាតិវៀតណាមនោះឡើយ ដោយគ្រាន់តែថា ខ្លួនកំពុងទាក់ទងអាជ្ញាធរនៅក្នុងប្រទេសម៉ាឡេស៊ី។ ក្រុមមន្ត្រីស្ថានទូតវៀតណាម បានជួបជាមួយស្ត្រីម្នាក់នោះ កាលពីថ្ងៃម្សិលមិញនេះ។
ប៉ូលិសម៉ាឡេស៊ី បាននិយាយថា លោក គីម ជុងណាម បងប្រុសម្ដាយទីទៃរបស់មេដឹកនាំកូរ៉េខាងជើង លោក គីម ជុងអ៊ុន នោះ ត្រូវបានគេធ្វើឃាតនៅឯព្រលានយន្តហោះអន្តរជាតិទីក្រុងគួឡាឡំពួរ កាលពីថ្ងៃទី១៣ ខែកុម្ភៈ តាមរយៈការប្រើប្រាស់ថ្នាំគីមី VX៕