លោក រី ជុងចុល ជនសង្ស័យម្នាក់នៅក្នុងករណីឃាតកម្មបងប្រុសមេដឹកនាំកូរ៉េខាងជើងនោះ បាននិយាយនៅក្នុងទីក្រុងប៉េកាំងថា លោកគឺជាជនរងគ្រោះនៃផែនការសម្ងាត់របស់អាជ្ញាធរម៉ាឡេស៊ី ដែលប៉ុនប៉ងបំផ្លាញកិត្តិយសប្រទេសកូរ៉េខាងជើង។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
បើតាម Reuters ដដែលនេះ លោក រី បានចោទប្រទេសម៉ាឡេស៊ីថា បានប្រើប្រាស់ការចាប់បង្ខំ ដើម្បីទាញយកចម្លើយសារភាពពីរូបលោក។ លោកបានថ្លែងបែបនេះទៅកាន់អ្នកយកព័ត៌មាននៅខាងក្រៅស្ថានទូតកូរ៉េខាងជើងនៅទីក្រុងប៉េកាំង នៅព្រឹកថ្ងៃនេះ។
លោក រី ជុងចុល គឺជាជនសង្ស័យម្នាក់ដែលអាជ្ញាធរម៉ាឡេស៊ីថា មានជាប់ពាក់ព័ន្ធនឹងឃាតកម្មកាលពីថ្ងៃទី១៣ ខែកុម្ភៈ ទៅលើលោក គីម ជុងណាម បងប្រុសម្ដាយទីទៃរបស់មេដឹកនាំកូរ៉េខាងជើង លោក គីម ជុងអ៊ុន៕