ប្រទេសម៉ាឡេស៊ីនៅថ្ងៃនេះ បានច្រានចោលនូវការចោទប្រកាន់ថា ខ្លួនបានរំលោភលើទណ្ឌកម្មនានាដែលអង្គការសហប្រជាជាតិដាក់ទៅលើប្រទេសកូរ៉េខាងជើង បន្ទាប់ពីទីភ្នាក់ងារព័ត៌មាន Reuters បានចុះផ្សាយថា ក្រុមហ៊ុនមានទំនាក់ទំនងនឹងកូរ៉េខាងជើង កំពុងប្រតិបត្តិការបណ្ដាញជួញដូរអាវុធមួយ នៅក្នុងប្រទេសម៉ាឡេស៊ី។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ក្រសួងការបរទេសម៉ាឡេស៊ី បាននិយាយក្នុងសេចក្ដីប្រកាសព័ត៌មានមួយថា ម៉ាឡេស៊ីច្រានចោលទាំងស្រុងនូវការលើកឡើងបែបនេះ។
ក្រសួងការបរទេសម៉ាឡេស៊ីបន្ថែមថា ប្រទេសនេះបានឆ្លើយតបតាមលក្ខខណ្ឌតម្រូវដែលលើកឡើងដោយគណៈកម្មការជំនាញនៃក្រុមប្រឹក្សាសន្តិសុខអង្គការសហប្រជាជាតិ។
ទីភ្នាក់ងារព័ត៌មាន Reuters បានចុះផ្សាយថា ភ្នាក់ងារសម្ងាត់កូរ៉េខាងជើង បានបើកក្រុមហ៊ុនជួញដូរអាវុធមួយនៅក្នុងប្រទេសម៉ាឡេស៊ីហៅថា Glocom និងមានក្រុមហ៊ុន ២ទៀត មានជាប់ពាក់ព័ន្ធនឹងជំនួញនេះ គឺក្រុមហ៊ុន International Global System និងក្រុមហ៊ុន International Golden Services។
ទំនាក់ទំនងរវាងម៉ាឡេស៊ី និងកូរ៉េខាងជើង បានជាប់គាំងក្រោយពីការសម្លាប់លោក គីម ជុងណាម បងប្រុសម្ដាយទីទៃរបស់មេដឹកនាំកូរ៉េខាងជើង លោក គីម ជុងអ៊ុន នៅព្រលានយន្តហោះទីក្រុងគួឡាឡំពួរ កាលពីថ្ងៃទី១៣ ខែកុម្ភៈកន្លងមកនេះ៕