នាយកប្រតិបត្តិអង្គការខុមហ្វ្រែល លោក គល់ បញ្ញា ដែលធ្វើការងារលើកិច្ចការបោះឆ្នោតនោះ បានលើកឡើងថា ការទម្លាយសារសន្ទនាតាមទូរស័ព្ទរវាងលោកនាយករដ្ឋមន្ត្រី ហ៊ុន សែន និងមេដឹកនាំបក្សប្រឆាំងលោក កឹម សុខា មិនត្រឹមមានបំណងបញ្ឆេះកិត្យានុភាពនោះទេ ប៉ុន្តែ ក៏ចង់បង្កើតការសង្ស័យគ្នា ដែលអាចនាំឲ្យមានការបែកបាក់គូប្រកួតនយោបាយច្រើនជាង។
លោក គល់ បញ្ញា បានលើកឡើងដូច្នេះនៅលើហ្វេសប៊ុករបស់លោក ភ្លាមៗក្រោយពីសារសន្ទនានោះ ត្រូវបានគេទម្លាយនៅលើទំព័រហ្វេសប៊ុកអានាមិកឈ្មោះ “សីហា” កាលពីល្ងាចមិញនេះ។
លោក បញ្ញា បន្ថែមថា ប្រហែលមានទំនាក់ទំនងតិចតួចណាស់ ដែលបានផលពីការទម្លាយសារសន្ទនានេះ ដោយថា ផលតិចតួចនោះ អាចបានមកពីអ្នកបោះឆ្នោតមិនទាន់សម្រេចចិត្តដែលទើបថប់អារម្ភអំពីនយោបាយ។
សារសន្ទនារវាងលោក ហ៊ុន សែន និងលោក កឹម សុខា ដែលត្រូវបានគេទម្លាយនោះ បានបង្ហាញថា លោក ហ៊ុន សែន បានជំរុញទៅលោក កឹម សុខា ឲ្យថ្លែងវាយប្រហារទៅលើលោក សម រង្ស៊ី អតីតប្រធានគណបក្សសង្គ្រោះជាតិដែលទើបលាលែងពីតំណែងកាលពីប៉ុន្មានសប្ដាហ៍មុននេះ៕