ប្រទេសម៉ាឡេស៊ីបានសម្រេចបណ្ដេញអគ្គរដ្ឋទូតកូរ៉េខាងជើងចេញពីប្រទេសរបស់ខ្លួន ជុំវិញការស្លាប់លោក គីម ជុងណាម បងប្រុសម្ដាយទីទៃរបស់មេដឹកនាំកូរ៉េខាងជើង លោក គីម ជុងអ៊ុន។ នេះដោយយោងតាមការចុះផ្សាយរបស់សារព័ត៌មាន Channel News Asia។
រដ្ឋមន្ត្រីការបរទេសម៉ាឡេស៊ី លោក អានីហ្វាហ៍ អាម៉ាន់ កាលពីថ្ងៃម្សិលមិញ បានប្រកាសថា គេរំពឹងថា លោក កាង ចុល នឹងចាកចេញពីប្រទេសម៉ាឡេស៊ីនៅក្នុងអំឡុងពេល ៤៨ម៉ោង ចាប់ម៉ោង ៦ល្ងាចម្សិលមិញនេះ។
យោងតាមប្រមុខកាទូតម៉ាឡេស៊ី បានឲ្យដឹងថា លោក កាង ត្រូវបានរដ្ឋាភិបាលម៉ាឡេស៊ីកោះហៅកាលពីម៉ោង ៦ល្ងាចម្សិលមិញនេះ ឲ្យចូលទៅក្រសួងការបរទេសម៉ាឡេស៊ី ប៉ុន្តែ លោកមិនបានបង្ហាញខ្លួននោះឡើយ។
លោក អានីហ្វាហ៍ ថ្លែងថា លោក កាង ត្រូវជួបជាមួយមន្ត្រីជាន់ខ្ពស់ក្រសួងការបរទេសម៉ាឡេស៊ីនៅល្ងាចម្សិលមិញនេះ ប៉ុន្តែ ទាំងលោក កាង និងមន្ត្រីជាន់ខ្ពស់ស្ថានទូតកូរ៉េខាងជើង មិនបានបង្ហាញវត្តមាននោះឡើយ។
លោក អានីហ្វាហ៍ បន្ថែមថា ក្រសួងក៏បានសម្រេចបញ្ជូនកំណត់ហេតុកាទូតមួយទៅស្ថានទូតកូរ៉េខាងជើង ដោយបានជូនដំណឹងស្ដីពីការបណ្ដេញចេញនេះ។
ម៉ាឡេស៊ីសម្រេចបែបនេះ បន្ទាប់ពីលោក កាង ចោទប្រទេសម៉ាឡេស៊ីថា បានសមគំនិតគ្នានឹងកូរ៉េខាងត្បូង ដើម្បីទម្លាក់កំហុសទៅលើកូរ៉េខាងជើង ចំពោះការស្លាប់របស់លោក គីម ជុងណាម ហើយថា ការស៊ើបរបស់អាជ្ញាធរម៉ាឡេស៊ីទៅលើករណីឃាតកម្មនេះ មានលក្ខណៈនយោបាយ និងមិនអាចជឿទុកចិត្តបាន៕
