ប្រទេសម៉ាឡេស៊ី កាលពីថ្ងៃម្សិលមិញនេះ បានបញ្ជាក់ថា បុរសម្នាក់ដែលគេស្គាល់កាលពីដំបូងថាមានឈ្មោះ គីម ឈុល នោះ គឺពិតជាលោក គីម ជុងណាម បងប្រុសម្ដាយទីទៃរបស់មេដឹកនាំកូរ៉េខាងត្បូង លោក គីម ជុងអ៊ុន។ នេះដោយយោងតាមការចុះផ្សាយរបស់សារព័ត៌មាន Channel News Asia។
លោក គីម ជុងណាម ត្រូវបានគេសម្លាប់នៅឯព្រលានយន្តហោះអន្តរជាតិទីក្រុងគួឡាឡំពួ កាលពីជិតមួយខែមុន។ នេះជាលើកដំបូងហើយដែលប៉ូលិសម៉ាឡេស៊ីបានបញ្ជាក់ជាផ្លូវការពីអត្តសញ្ញាណបុរសម្នាក់ ដែលកាន់លិខិតឆ្លងដែនក្រោមឈ្មោះថា គីម ឈុល។
កាលពីថ្ងៃម្សិលមិញនេះ មេប៉ូលិសម៉ាឡេស៊ី លោក ខាលីដ អាប៊ូ បាការ បាននិយាយថា ពួកគេបញ្ចប់ការស៊ើបអង្កេតទៅលើករណីឃាតកម្មនេះហើយ ហើយម៉ាឡេស៊ីនឹងប្រគល់សពបុរសនោះ ទៅក្រសួងសុខាភិបាល។ ប៉ុន្តែ លោក ខាលីដ មិនបានបញ្ជាក់ថា តើគេត្រូវធ្វើតេស្ដ DNA ទៀតឬយ៉ាណា ដើម្បីបង្ហាញអត្តសញ្ញាណសព ឬក៏ថា តើអាជ្ញាធរម៉ាឡេស៊ីធ្វើដូចម្ដេចដើម្បីចេញមកសន្និដ្ឋានបែបនេះអំពីអត្តសញ្ញាណសពនោះ។
ប្រទេសម៉ាឡេស៊ីបាននិយាយថា ឃាតករដែលបានសម្លាប់លោក គីម ជុងណាម បានប្រើប្រាស់ថ្នាំពុល VX ជាថ្នាំគីមីដែលអង្គការសហប្រជាជាតិចាត់ទុកជាអាវុធមហាប្រល័យ៕
