អគ្គនាយកដ្ឋានពន្ធដារកម្ពុជា បានឲ្យដឹងថា ខ្លួនប្រមូលថវិកាបានជាង ១០៥លានដុល្លារអាមេរិក នៅក្នុងខែកុម្ភៈក្នុងឆ្នាំ២០១៧នេះ ប៉ុន្តែ បានធ្លាក់ចុះជិត ៦០ភាគរយ បើធៀបនឹងខែមករាកន្លងមក។
ក្នុងសេចក្ដីប្រកាសព័ត៌មានកាលពីថ្ងៃទី១០ ខែកុម្ភៈ អគ្គនាយកដ្ឋានពន្ធដារ បានប្រកាសថា ខ្លួនប្រមូលចំណូលពន្ធអាករគ្រប់ប្រភេទបង់ចូលថវិកាជាតិបានចំនួន ១០៥.២៧លានដុល្លារ កាលពីខែកុម្ភៈកន្លងមកនេះ។
អគ្គនាយកដ្ឋានពន្ធដារ បានឲ្យដឹងថា ចំណូលពន្ធដារក្នុងខែកុម្ភៈកន្លងមកនេះ បានកើនឡើង ៩.៥៤លានដុល្លារ ឬស្មើនឹងកំណើន ៩.៩៧ភាគរយ បើធៀបនឹងខែកុម្ភៈឆ្នាំ២០១៦កន្លងមក។
អគ្គនាយកដ្ឋានពន្ធដារ បានបន្ថែមថា ចំណូលពន្ធដារសម្រាប់រយៈពេល ២ខែដើមឆ្នាំ២០១៧នេះ ប្រមូលបានជាង ៣៥១លានដុល្លារ ឬស្មើនឹង ២០.៤៩ភាគរយនៃគោលដៅកំណត់ដោយច្បាប់។
ទោះជាយ៉ាងណា ការប្រមូលចំណូលពន្ធដារក្នុងខែកុម្ភៈ បានធ្លាក់ចុះដល់ទៅជាង ១៤០លានដុល្លារ ឬស្មើនឹង ៥៧.១៥ភាគរយ បើធៀបនឹងចំណូលពន្ធដែលប្រមូលបានក្នុងខែមករាឆ្នាំ២០១៧នេះ៕
