ព្រះសង្ឃភូមាមួយអង្គដែលល្បីល្បាញខាងទេសនាប្រឆាំងនឹងជនមូស្លីម ត្រូវបានគណៈគ្រប់គ្រងសង្ឃប្រទេសនេះ ហាមឃាត់មិនឲ្យសម្ដែងធម៌ទេសនារយៈពេលមួយឆ្នាំ ដែលនេះប្រៀបបីដូចទៅនឹងការទះកំផ្លៀងនៅលើបុរសម្នាក់ ដែលតែងតែជំរុញឲ្យមានភាពតានតឹងផ្នែកសាសនានៅក្នុងប្រទេស។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
AFP បានផ្សាយបន្តថា សង្ឃព្រះនាម វីរៈធូ បានដឹកនាំការអំពាវនាវឲ្យរឹតបន្តឹងទៅលើប្រជាជនមូស្លីមនៅក្នុងប្រទេសភូមា ដោយថ្លែងព្រមានថា សាសនាឥស្លាមអាចនឹងដណ្ដើមកាន់កាប់ប្រទេសកាន់ពុទ្ធសាសនាមួយនេះ។
ភូមាកំពុងតែរុំព័ទ្ធទៅដោយភាពតានតឹងផ្នែកសាសនា ដែលតែងតែបង្កឲ្យមានអំពើហិង្សាម្ដងហើយម្ដងទៀត។ ចលាចលក៏បណ្ដាលមកពីការថ្លែងប្រឆាំងនឹងជនមូស្លីម ដែលធ្វើឡើងដោយក្រុមសង្ឃជ្រុលនិយមរបស់ព្រះតេជគុណ វីរៈធូ ផងដែរ។
រដ្ឋាភិបាលអ្នកស្រី អ៊ុងសាន ស៊ូជី កំពុងស្ថិតក្រោមសម្ពាធអន្តរជាតិ ឲ្យបកស្រាយពីការបង្ក្រាបយ៉ាងបង្ហូរឈាមទៅលើជនជាតិភាគតិចមូស្លីមរ៉ូហ៊ីងយ៉ា នៅរដ្ឋរ៉ាក់ឃីន អស់រយៈពេលប៉ុន្មានខែថ្មីៗនេះ។
ឃាតកម្មកាលពីខែកុម្ភៈទៅលើលោក កូ នី មេធាវីមូស្លីមដ៏គួរឲ្យគោរព និងជាសម្ព័ន្ធមិត្តយូរអង្វែងរបស់អ្នកស្រី ស៊ូជី នោះ ក៏បានជំរុញឲ្យមានភាពតានតឹងបន្ថែមទៀតផងដែរ៕
