ក្រសួងសុខាភិបាលម៉ាឡេស៊ី នៅមិនទាន់សម្រេចនៅឡើយទេថា តើពួកគេនឹងចាត់ចែងយ៉ាងម៉េចចំពោះសពលោក គីម ជុងណាម បងប្រុសម្ដាយទីទៃរបស់មេដឹកនាំកូរ៉េខាងជើង លោក គីម ជុងអ៊ុន ដែលត្រូវបានគេបំពុលឲ្យស្លាប់ នៅឯព្រលានយន្តហោះអន្តរជាតិគួឡាឡំពួរ កាលពីថ្ងៃទី១៣ ខែកុម្ភៈកន្លងមកនេះ។ នេះដោយយោងតាមការចុះផ្សាយរបស់សារព័ត៌មាន Channel News Asia។
សពលោក គីម ជុងណាម ត្រូវបានសមត្ថកិច្ចប្រគល់ទៅក្រសួងសុខាភិបាលកាលពីថ្ងៃសុក្រកន្លងមកនេះ បន្ទាប់ពីប៉ូលិសនិយាយថា ពួកគេបានបញ្ចប់ការស៊ើបអង្កេតលើករណីឃាតកម្មនេះ។
អនុរដ្ឋមន្ត្រីសុខាភិបាលម៉ាឡេស៊ី លោក ហ៊ីលមី យ៉ាហាយ៉ា បានប្រាប់អ្នកយកព័ត៌មានថា គ្មានបទប្បញ្ញត្តិណាកំណត់ពីពេលវេលានៃការថែរក្សាសពនៅក្នុងមន្ទីរពេទ្យនោះឡើយ។
លោកបន្ថែមថា ក្រសួងមិនប្រញាប់ប្រញាល់ធ្វើការសម្រេចចិត្តនោះឡើយ ហើយក្រសួងនឹងសម្រេចលើរឿងនេះនៅពេលក្រោយ។ លោកបញ្ជាក់ថា សពអាចនឹងបញ្ចុះនៅម៉ាឡេស៊ី ប្រសិនបើក្រុមគ្រួសារមិនទាមទារយកសពទេនោះ៕