រដ្ឋមន្ត្រីការបរទេសម៉ាឡេស៊ី លោក អានីហ្វាហ៍ អាម៉ាន់ បានឲ្យដឹងថា ប្រទេសលោកនឹងចាប់ផ្ដើមការចរចារផ្លូវការជាមួយកូរ៉េខាងជើងនៅប៉ុន្មានថ្ងៃខាងមុខនេះ ដើម្បីនាំយកជនជាតិម៉ាឡេស៊ី ៩នាក់ ដែលត្រូវបានក្រុងព្យុងយ៉ាងឃាត់ខ្លួនទុក ក្រោយពីវិវាទកាទូតបានផ្ទុះឡើងរវាងប្រទេសទាំងពីរជុំវិញករណីឃាតកម្មទៅលើបុរសកូរ៉េខាងជើងម្នាក់ ដែលគេអះអាងថា ជាបងប្រុសម្ដាយទីទៃរបស់មេដឹកនាំកូរ៉េខាងជើង លោក គីម ជុងអ៊ុន។ នេះដោយយោងតាមការការចុះផ្សាយរបស់សារព័ត៌មាន Channel News Asia។
លោក អានីហ្វាហ៍ បានថ្លែងកាលពីថ្ងៃម្សិលមិញថា កូរ៉េខាងជើងបានបញ្ជាក់ថា គេចង់ចាប់ផ្ដើមចរចារ ប៉ុន្តែ ម៉ាឡេស៊ីមិនបានជ្រាបពីការទាមទារ និងតម្រូវការយ៉ាងណារបស់ក្រុងព្យុងយ៉ាងនោះឡើយ។
លោកបន្ថែមថា ម៉ាឡេស៊ីចង់ចរចារដោយផ្ទាល់ជាមួយក្រុងព្យុងយ៉ាង ដោយមិនត្រូវការភាគីទីបីនោះឡើយ បើទោះបីជាមានការផ្ដល់សំណើជាច្រើនក៏ដោយ។
កូរ៉េខាងជើង កាលពីដំបូងឡើយ បានទាមទារយកសពបុរសម្នាក់ដែលកាន់លិខិតឆ្លងដែនឈ្មោះ គីម ឆុល ដែលត្រូវបានគេបំពុលឲ្យស្លាប់កាលពីថ្ងៃទី១៣ ខែកុម្ភៈ នៅឯព្រលានយន្តហោះអន្តរជាតិគួឡាឡំពួរ៕