រដ្ឋមន្ត្រីក្រសួងទេសចរណ៍ កាលពីម្សិលម៉ិញនេះ បានព្រមានដកហូតអាជ្ញាបណ្ណចំពោះអាជីវកម្មណាដែលមិនបិទតារាងតម្លៃទំនិញ និងសេវាកម្ម តាមស្តង់ដា និងលក្ខខណ្ឌវិនិច្ឆ័យបានត្រឹមត្រូវ ក្នុងឱកាសបុណ្យចូលឆ្នាំខ្មែរ ជាពិសេសព្រឹត្តការណ៍អង្គរសង្គ្រាននាពេលខាងមុខនេះ។
ហ្វេសប៊ុកផ្លូវការរបស់ក្រសួងទេសចរណ៍ បានឱ្យដឹងថា រដ្ឋមន្ត្រីទេសចរណ៍ លោក ថោង ខុន បានព្រមានថា នឹងដកហូតអជ្ញាបណ្ណ និងផាកពិន័យម្ចាស់អាជីវកម្ម ម្ចាស់សណ្ឋាគារ ផ្ទះសំណាក់ និងភោជនីយដ្ឋានណា ដែលមិនបិទតារាងតម្លៃសេវាកម្មរបស់ខ្លួនតាមស្តង់ដា និងលក្ខខណ្ឌវិនិច្ឆ័យនៃការធ្វើអាជីវកម្ម គ្រប់មូលដ្ឋាន និងសេវាកម្មទេសចរណ៍ឱ្យបានត្រឹមត្រូវ។
លោកបញ្ជាក់ថា៖ “មូលដ្ឋានអាជីវកម្ម និងសេវាកម្មណាមិនអនុវត្តន៍ គឺមិនអាចប្រកបអាជីវកម្មបានទេ គឺក្រសួងទេសចរណ៍នឹងមិនផ្តល់អាជ្ញាបណ្ណទេសចរណ៍បន្ត ឬអាជ្ញាបណ្ណទេសចរណ៍ថ្មីឡើយ”។
លោកបន្ថែមថា សេវាកម្ម និងទំនិញដែលលក់ក្នុងឱកាសចូលឆ្នាំខ្មែរខាងមុខនេះត្រូវបិទ ឬដាក់តាំងតារាងតម្លៃរបស់ខ្លួនអោយបានច្បាស់លាស់ដើម្បីជៀសវាងការកំណត់ថ្លៃខ្ពស់ហួសហេតុ៕