អនុប្រធានគណបក្សសង្គ្រោះជាតិ អ្នកស្រី មួរ សុខហួរ បានអំពាវនាវទៅដល់ប្រជាពលរដ្ឋ ឲ្យជ្រើសរើសថ្នាក់ដឹកនាំទៅតាមឃុំសង្កាត់ ដែលមានឆន្ទៈការពារផលប្រយោជន៍ជាតិ និងរកយុត្តិធម៌ជូនប្រជាពលរដ្ឋ ដូចអតីតមេដឹកនាំបក្សប្រឆាំង លោក សម រង្ស៊ី។
នៅក្នុងវីដេអូដែលបង្ហោះនៅលើទំព័រហ្វេសប៊ុករបស់លោក សម រង្ស៊ី នៅព្រឹកថ្ងៃនេះ អ្នកស្រី មួរ សុខហួរ បានថ្លែងថា អ្នកស្រីចង់ឲ្យពលរដ្ឋរួមគ្នាកសាងសង្គមមួយ តាមរយៈការជ្រើសរើសថ្នាក់ដឹកនាំឃុំសង្កាត់ល្អ មានសីលធម៌ មានឆន្ទៈរកយុត្តិធម៌ជូនពលរដ្ឋ។
អ្នកស្រីថ្លែងថា៖ «លោកប្រធាន សម រង្ស៊ី ជាគំរូរបស់យើងជាង ២០ឆ្នាំមកហើយ សូមយុវជនដែលជាអ្នកបន្តវេនយកឧត្តមគតិ យកឆន្ទៈ និងយកគំរូលោកប្រធាន សម រង្ស៊ី យកសារលោក សម រង្ស៊ី ជាគំនិត ដើម្បីកសាងប្រទេសជាតិនៅតាមមូលដ្ឋាន ក៏ដូចនៅថ្នាក់ជាតិទាំងមូលផងដែរ»។
អ្នកស្រី មួរ សុខហួរ ដែលត្រូវបានសមាជបក្សជ្រើសតាំងជាអនុប្រធានបក្សនោះ បានថ្លែងកោតសរសើរដល់អតីតមេដឹកនាំរបស់អ្នកស្រីបែបនេះ ជាងមួយខែក្រោយពីលោក សម រង្ស៊ី បានប្រកាសលាលែងពីក្បាលម៉ាស៊ីនដឹកនាំរបស់បក្សសង្គ្រោះជាតិ បន្ទាប់ពីលោកនាយករដ្ឋមន្ត្រី ហ៊ុន សែន ព្រមានរំលាយបក្សប្រឆាំងមួយនេះ៕
