ប្រព័ន្ធផ្សព្វផ្សាយរដ្ឋកូរ៉េខាងជើង បានប្រកាសនៅថ្ងៃនេះថា កូរ៉េខាងជើងបានសាកល្បងម៉ាស៊ីនទើបតែផលិតឡើងថ្មី នៅឯស្ថានីយ៍បាញ់គ្រាប់រ៉ុកកែត តុងឆាងរី ហើយមេដឹកនាំក្រុងព្យុងយ៉ាង លោក គីម ជុងអ៊ុន បាននិយាយថា ការសាកល្បងប្រកបដោយជោគជ័យនេះ គឺជាកំណើតថ្មីនៃឧស្សាហកម្មគ្រាប់រ៉ុកកែត។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ប្រព័ន្ធផ្សព្វផ្សាយកូរ៉េខាងជើង បានផ្សាយបន្តថា ម៉ាស៊ីនថ្មីនោះ នឹងជួយប្រទេសនេះ ឲ្យសម្រេចបានសមត្ថភាពខាងបាញ់ផ្កាយរណបលំដាប់ពិភពលោក ដែលបង្ហាញថា ការសាកល្បងនោះ ហាក់ដូចជាម៉ាស៊ីនប្រភេទថ្មីសម្រាប់បាញ់គ្រាប់មីស៊ីលរយៈចម្ងាយឆ្ងាយ។
សហរដ្ឋអាមេរិក និងចិន បានសន្យាធ្វើការរួមគ្នា ដើម្បីនាំកូរ៉េខាងជើងឲ្យដើរលើផ្លូវមួយផ្សេងវិញ និងដើរចេញពីកម្មវិធីផលិតអាវុធរបស់គេ បន្ទាប់ពីប្រមុខកាទូតអាមេរិក លោក Rex Tillerson បានជួបពិភាក្សាជាមួយសមភាគីចិន កាលពីថ្ងៃម្សិលមិញនេះ។
កូរ៉េខាងជើងបានសាកល្បងគ្រាប់បែកនុយក្លេអ៊ែរ ៥លើករួចមកហើយ និងបានបាញ់គ្រាប់មីស៊ីលជាបន្តបន្ទាប់ ហើយត្រូវបានក្រុមអ្នកជំនាញជឿថា រដ្ឋឯកោមួយនេះកំពុងតែផលិតមីស៊ីលបំពាក់ក្បាលគ្រាប់នុយក្លេអែរ ដែលអាចបាញ់ដល់អាមេរិក៕
