មន្ត្រីជាន់ខ្ពស់ពីររូបរបស់គណបក្សប្រឆាំង កាលពីថ្ងៃម្សិលមិញនេះ បានសម្ដែងការសុំអធ្យាស្រ័យពីក្រុមគ្រួសារសពលោក សុខ អាន បន្ទាប់ពីសំឡេងសន្ទនាតាមទូរស័ព្ទរបស់អ្នកទាំងពីរ ដែលត្រូវបានគេទម្លាយនោះ បានប្រមាថដល់សពមន្ត្រីជាន់ខ្ពស់របស់គណបក្សកាន់អំណាច។
កាលពីថ្ងៃទី១៦ ខែមីនានេះ ទំព័រហ្វេសប៊ុកឈ្មោះសីហា ដែលតែងតែទម្លាយសំឡេងសន្ទនាតាមទូរស័ព្ទរបស់ក្រុមមេដឹកនាំបក្សសង្គ្រោះជាតិនោះ បានបង្ហោះសំឡេងសន្ទនាតាមទូរស័ព្ទរវាងតំណាងរាស្ត្របក្សប្រឆាំង លោក លឹម គឹមយ៉ា និងអគ្គលេខាធិការរងព្រឹទ្ធសភា លោក ហ៊ី យឿន។
នៅក្នុងសារសន្ទនាដែលគេទម្លាយនោះ មន្ត្រីបក្សប្រឆាំងទាំងពីររូបនេះ ត្រូវបានគេចោទថា បានប្រមាថមើលងាយដល់សពលោក សុខ អាន ដែលបានស្លាប់កាលពីព្រលប់ថ្ងៃទី១៥ ខែមីនាកន្លងមកនេះ តំណាងរាស្ត្របក្សប្រឆាំង លោក លឹម គឹមយ៉ា និងអគ្គលេខាធិការរងព្រឹទ្ធសភា លោក ហ៊ី យឿននៅឯទីក្រុងប៉េកាំង។
ក្នុងលិខិតផ្ញើទៅអ្នកស្រី ថេង អាយអាន្នី ភរិយាសពលោក សុខ អាន នោះ មន្ត្រីបក្សប្រឆាំងទាំងពីររូបនេះ បានសម្ដែងការសោកស្ដាយចំពោះការសន្ទនារបស់ពួកគេ ហើយបានស្នើសុំការអធ្យាស្រ័យពីគ្រួសារសពលោក សុខ អាន។
វីដេអូបង្ហោះតាមបណ្ដាញសង្គមហ្វេសប៊ុក បានបង្ហាញវត្តមានតំណាងរបស់មន្ត្រីបក្សប្រឆាំងទាំងពីររូប ប្រគល់លិខិតសុំទោសនោះទៅសាច់ញាតិនៃគ្រួសារសព ប៉ុន្តែ ពុំឃើញវត្តមាននៃមន្ត្រីទាំងពីររូបនោះឡើយ៕