ក្រសួងរតនាគារអាមេរិក នៅថ្ងៃនេះ បានដាក់ទណ្ឌកម្មទៅលើក្រុមជំនួញ ១១ តំណាងឲ្យកូរ៉េខាងជើង និងក្រុមហ៊ុនឧស្សាហកម្មមួយ ដែលនេះគឺជាការព្យាយាមឡោមព័ទ្ធសេដ្ឋកិច្ចរបស់រដ្ឋឯកោមួយនេះ ដែលកំពុងព្យាយាមផលិតអាវុធនុយក្លេអ៊ែរ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ក្រសួងរតនាគារអាមេរិក បាននិយាយថា ក្រុមមន្ត្រីតំណាងកូរ៉េខាងជើងទាំងនោះ ភាគច្រើនស្ថិតនៅក្នុងបណ្ដាក្រុមហ៊ុននានានៅក្នុងប្រទេសចិន និងរុស្ស៊ី ដើម្បីស្វែងរកការគាំទ្រផ្នែសម្ភារៈ បច្ចេកវិទ្យា និងហិរញ្ញវត្ថុសម្រាប់ឧស្សាហកម្មការពារជាតិរបស់កូរ៉េខាងជើង។
ក្រុមហ៊ុនមួយដែលជាប់នៅក្នុងបញ្ជីខ្មៅនោះ គឺក្រុមហ៊ុន Paeksol Trading Corporation មានមូលដ្ឋាននៅកូរ៉េខាងជើង ដែលក្រសួងរតនាគារអាមេរិកនិយាយថា ក្រុមហ៊ុននេះរកស៊ីដូរប្រាក់សម្រាប់ក្រុងព្យុងយ៉ាង តាមរយៈការដោះដូរ និងនាំចេញរ៉ែដែក និងធ្យូងថ្ម។
សហរដ្ឋអាមេរិកក៏បានស្វែងរកកិច្ចសហការពីចិនផងដែរ ដើម្បីបង្ក្រាបការនាំចូលធ្យូងថ្មរបស់ចិនពីកូរ៉េខាងជើង ប៉ុន្តែ ក្រសួងរតនាគារអាមេរិកនិយាយថា ក្រុមហ៊ុន Paeksol នៅតែបន្តនាំចេញធ្យូងថ្មតាមរយៈក្រុមហ៊ុននានា ស្ថិតនៅទីក្រុង Dalian ភាគឦសានប្រទេសចិន។
ទណ្ឌកម្មថ្មីនេះ បានហាមឃាត់ក្រុមហ៊ុនអាមេរិកទាំងអស់ មិនឲ្យធ្វើជំនួញជាមួយបុគ្គល ឬក្រុមហ៊ុនដែលជាប់ក្នុងបញ្ជីខ្មៅ ដើម្បីហ៊ុំព័ទ្ធកូរ៉េខាងជើងកុំឲ្យចូលទៅប្រើប្រាស់ប្រព័ន្ធហិរញ្ញវត្ថុសកល៕