រដ្ឋមន្ត្រីមហាផ្ទៃ លោក ស ខេង បានជំរុញទៅវិស័យឯកជន ឲ្យចូលរួមការងារប្រយុទ្ធប្រឆាំងនឹងគ្រឿងញៀន។ នេះដោយយោងតាមការចុះផ្សាយរបស់វេបសាយនគរបាលជាតិ។
លោក ស ខេង បានថ្លែងបែបនេះ នៅក្នុងពិធីផ្សព្វផ្សាយយុទ្ធនាការប្រយុទ្ធប្រឆាំងគ្រឿងញៀនជាមួយវិស័យឯកជន នៅក្នុងរាជធានីភ្នំពេញ កាលពីថ្ងៃម្សិលមិញនេះ។
វេបសាយនគរបាលជាតិ បានដកស្រង់សម្ដីលោក ស ខេង ចុះផ្សាយថា លោកបានប្រាប់ទៅរោងចក្រសហគ្រាស ម្ចាស់អាជីវកម្មទាំងអស់ ត្រូវគ្រប់គ្រងបុគ្គលិកឲ្យបានហ្មត់ចត់ និងសហការជាមួយសមត្ថកិច្ច។
បើតាមវេបសាយដដែលនេះ លោក ស ខេង បានបញ្ជាក់ថា ភោជនីយដ្ឋាន រង្គសាល ក្លឹបកម្សាន្ត សណ្ឋាគារ និងផ្ទះសំណាក់ គឺជាទីតាំងដែលបទល្មើសគ្រឿងញៀន បានកើតឡើងញឹកញាប់ជាងគេ។
នគរបាលជាតិកម្ពុជា បានឲ្យដឹងថា បទល្មើសគ្រឿងញៀនដល់ទៅជាង ២៦០០ករណី ត្រូវបានសមត្ថកិច្ចបង្ក្រាបបាននៅទូទាំងប្រទេស ដោយឃាត់ខ្លួនមនុស្សដល់ទៅជាង ៦ពាន់នាក់៕
