ក្រុមសមាជិកសភារាប់សិបនាក់របស់ជប៉ុន ក្នុងនោះមានទាំងរដ្ឋមន្ត្រីម្នាក់ផងដែរ បានធ្វើដំណើរទៅទស្សនាវិហារយ៉ាសាគូនី កាលពីថ្ងៃម្សិលមិញនេះ ដែលជំរុញឲ្យមានប្រតិកម្មតវ៉ាពីសំណាក់បណ្ដាប្រទេសនានានៅអាស៊ីខាងកើត។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
បើតាម Reuters ប្រតិកម្មតបតទៅនឹងដំណើររបស់ក្រុមមេដឹកនាំជប៉ុននេះ បានកើតឡើង ដោយសារតែវិហារនោះ ត្រូវបានគេចាត់ទុកជានិមិត្តរូបនៃរបបយោធាជប៉ុន និងជាដែលគេបានបញ្ចុះសពអតីតមេដឹកនាំយោធាជប៉ុន ដែលបានបង្កសង្គ្រាមលោកលើកទីពីរ នៅតំបន់អាស៊ី។
ទូរទស្សន៍ជប៉ុន NHK បានផ្សាយថា សមាជិកសភាប្រហែល ៩៥រូប បានធ្វើដំណើរទៅគោរពជាក្រុមកាលពីថ្ងៃម្សិលមិញនេះ ក្នុងនោះមានទាំងរដ្ឋមន្ត្រីទំនាក់ទំនងផងដែរ។
នាយករដ្ឋមន្ត្រីជប៉ុន លោក ហ្ស៊ិនហ្ស៊ូ អាបេ បានបញ្ជូនកម្រងផ្កាមួយកម្រងទៅកាន់វិហារយ៉ាសាគូនី ដែលរឿងនេះបានកើតឡើងចំពេលដែលជប៉ុនកំពុងព្យាយាមសាងកិច្ចសហប្រតិបត្តិការកាន់តែប្រសើរជាមួយប្រទេសចិន និងកូរ៉េខាងត្បូង នៅចំពោះមុខភាពតានតឹងឥតឈប់ឈរ ជុំវិញបញ្ហាកម្មវិធីគ្រាប់មីស៊ីល និងនុយក្លេអ៊ែររបស់កូរ៉េខាងជើង។
បណ្ដាប្រទេសជិតខាងជប៉ុន កាលពីមុន បានបង្ហាញកំហឹងចំពោះអ្នកនយោបាយជប៉ុន ដែលបានធ្វើដំណើរទៅគោរពវិហារបុរាណនោះ ស្ថិតនៅក្នុងទីក្រុងតូក្យូ ជាទីដែមេដឹកនាំជប៉ុន ១៤នាក់ ដែលពួកសម្ព័ន្ធមិត្តកាត់ទោសពីបទបង្កឧក្រិដ្ឋកម្មសង្គ្រាមនោះ ត្រូវបានគេបញ្ចុះនៅទីនោះ៕
