ប្រទេសកូរ៉េខាងត្បូង បានឲ្យដឹងកាលពីថ្ងៃម្សិលមិញថា ខ្លួនស្ថិតក្នុងលក្ខណៈប្រុងប្រយ័ត្នខ្ពស់នៅចំពោះមុខការប្រារព្ធខួបសំខាន់មួយទៀតរបស់កូរ៉េខាងជើង ដែលនឹងមានការប្រមូលផ្ដុំគ្រឿងសព្វាវុធធុនធំ នៅតាមព្រំដែននៃប្រទេសទាំងពីរចំពេលដែលមានក្ដីបារម្ភអំពីការសាកល្បងគ្រាប់បែកនុយក្លេអ៊ែរធ្វើឡើងដោយក្រុងព្យុងយ៉ាង។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
កូរ៉េខាងជើង បានប្រកាសកាលពីថ្ងៃម្សិលមិញថា ស្ថានភាពកិច្ចការនៅឧបទ្វីបកូរ៉េមានគ្រោះថ្នាក់យ៉ាងខ្លាំង ដោយសារតែផែនការសង្គ្រាមនុយក្លេអ៊ែររបស់អាមេរិក ដែលមានបំណងរំលោភបំពានលើអធិបតេយ្យភាពប្រទេសដទៃ។
ក្រុមមន្ត្រីអាមេរិកនិយាយថា យន្តហោះទម្លាក់គ្រាប់បែកស្ថិតត្រូវបានដាក់ឲ្យស្ថិតក្នុងស្ថានភាពប្រុងប្រយ័ត្នខ្ពស់ខុសពីសព្វមួយដង ដែលជាសញ្ញាបង្ហាញពីការត្រៀមខ្លួនរបស់ក្រុងប៉េកាំង បើទោះបីជាក្រុមមន្ត្រីចិនព្យាយាមបង្វែរក្ដីបារម្ភក៏ដោយ។ ក្រុងប៉េកាំងបានបដិសេធថា យន្តហោះចម្បាំងរបស់ខ្លួនមិនបានស្ថិតក្នុងស្ថានភាពប្រុងប្រយ័ត្នខ្ពស់នោះឡើយ។
ចំណែកនៅឯរុស្ស៊ីឯណោះវិញ អ្នកនាំពាក្យវិមានក្រឹមឡាំង បានបដិសេធថា រុស្ស៊ីមិនបានបញ្ជូនទ័ព និងសព្វាវុធទៅកាន់ព្រំដែនជាប់នឹងកូរ៉េខាងជើងនោះឡើយ។
ទាំងមន្ត្រីអាមេរិក និងកូរ៉េខាងត្បូង សុទ្ធតែបាននិយាយថា កូរ៉េខាងជើងអាចសាកល្បងគ្រាប់បែកនុយក្លេអ៊ែរនាពេលឆាប់ៗខាងមុខនេះ ដែលជាការរំលោភទៅនឹងទណ្ឌកម្មរបស់អង្គការសហប្រជាជាតិ៕
