ភរិយាលោកបណ្ឌិត កែម ឡី បានប្រកាសបដិសេធមិនគាំទ្រការបង្កើតគណបក្ស កែម ឡី ដោយថាប្តីអ្នកស្រីមិនដែលមានបំណងចង់បង្កើតគណបក្សម្តងណាឡើយ។
ភរិយាលោក កែម ឡី គឺអ្នកស្រី ប៊ូ រចនា បានសរសេរនៅលើហ្វេសបុកផ្ទាល់ខ្លួនរបស់អ្នកស្រីនៅព្រឹកនេះថា ការបង្កើតគណបក្សដែលមានឈ្មោះថាគណបក្ស កែម ឡី នោះគឺជាការបង្កើតដោយផ្ទុយពីឆន្ទៈរបស់ប្តីអ្នកស្រី ព្រោះថា តាំងពីដើមរហូតមក ស្វាមីអ្នកស្រីមិនដែលមានបំណងបង្កើតគណបក្សនោះទេ ពោលគឺលោក កែម ឡី មានបំណងត្រឹមតែជួយផ្តល់យោបល់គ្រប់គណបក្សនយោបាយ ដើម្បីបុព្វហេតុជាតិ និងប្រជាជនប៉ុណ្ណោះ។
ក្នុងសេចក្ដីថ្លែងការណ៍មួយចុះថ្ងៃទី២៤ ខែកុម្ភៈ ឆ្នាំ២០១៨នេះ លោក កែម រិទិ្ធសិត ប្អូនប្រុសបង្កើតសពលោកបណ្ឌិត កែម ឡី បានប្រកាសបង្កើតគណបក្សនយោបាយថ្មីមួយដែលមានឈ្មោះថា គណបក្ស កែម ឡី ដើម្បីចូលរួមការបោះឆ្នោតខាងមុខនេះ។ ក្នុងសេចក្ដីថ្លែងការណ៍នោះក៏លើកឡើងដែរថា ការបង្កើតគណបក្សនេះ ស្របតាមច្បាប់ គឺដើម្បីទប់ស្កាត់ដល់ ក្រុមជ្រុលនិយមមួយចំនួនតែងតែយកឈ្មោះលោកបណ្ឌិត កែម ឡី ទៅធ្វើជាឧបករណ៍កេងចំណេញនយោបាយដើម្បីបម្រើមហិច្ឆតារបស់ពួកគេ៕
