ទីប្រឹក្សាប្រឹក្សាសន្តិសុខជាតិរបស់សហរដ្ឋអាមេរិកលោក John Bolton បានប្រៀបធៀបស្ថានភាពកូរ៉េខាងជើងកំពុងតែដើរចូលគន្លងរបស់ប្រទេសលីប៊ី ដែលមានសង្គ្រាមស៊ីវិលរហូតដល់មានការសម្លាប់មេដឹកនាំ។
កាលពីឆ្នាំ២០០៣មេដឹកនាំលីប៊ីលោក មូម៉ា ហ្គាដាហ្វី បានយល់ព្រមទម្លាក់កម្មវិធីអាវុធនុយក្លេអ៊ែ ដើម្បីប្តូរយកការដកទណ្ឌកម្មសេដ្ឋកិច្ច។ បន្ទាប់មកមេដឹកនាំផ្តាច់ការរូបនេះត្រូវបានសម្លាប់ដោយក្រុមបះបោរ។
កាលពីថ្ងៃពុធទីក្រុងព្យុងយ៉ាង បានព្រមានថា លោកគីម ជុងអ៊ុន អាចនឹងមិនចូលរួមការប្រជុំជាមួយមេដឹកនាំសហរដ្ឋអាមេរិកនៅថ្ងៃទី១២ខែមិថុនាខាងមុខនេះទេ។
ទោះយ៉ាងណាគំនិតលើកឡើងរបស់លោក John Bolton ត្រូវបានលោកប្រធានាធិបតី ដូណល ត្រាំ យល់ឃើញផ្ទុយពីនោះវិញ ដោយលោកនៅតែគិតវិជ្ជមានក្នុងការជួបជាមួយលោក គីម ជុងអ៊ុន។
លោក ដូណល ត្រាំ យល់ថា ស្ថានភាព កូរ៉េខាងជើង គឺមិនដូចស្ថានភាពនៅក្នុងប្រទេសលីប៊ី នោះទេ។ លោកត្រាំ យល់ថា លោក គីម ជុងអ៊ុន នៅតែ គិតរិះរកមធ្យោបាយ ធ្វើយ៉ាងណាឲ្យ ប្រទេសកូរ៉េខាងជើងទទួលបានការរីកចម្រើន។ ដោយលោកថា កូរ៉េខាងជើងកំពុងតែរៀបចំខ្លួនដើម្បីទទួលបានវិស័យឧស្សាហកម្មរីកចម្រើនដូចនៅប្រទេសកូរ៉េខាងត្បូង។
ក្នុងគោលការណ៍នៃជំនួនរវាងលោកគីមជុងអ៊ុន និង លោក ដូណល ត្រាំ នៅខែមិថុនា ខាងមុខនោះ គឺអាមេរិកចង់ឲ្យកូរ៉េខាងជើងទម្លាក់ចោលកម្មវិធីអាវុធនុយក្លេអ៊ែ ចំណែកកូរ៉េខាងជើងត្រូវការ ឲ្យមានការធានាការពារសុវត្ថិភាព និងជួយសេដ្ឋកិច្ចឲ្យមានការរីកចម្រើនដូចប្រទេស អភិវឌ្ឍន៍ ផ្សេងៗទៀត។
បើទោះបីជាមានការប្រឈមមុខគ្នាក្នុងជំនួបពេលខាងមុខរវាងមេដឹកនាំសហរដ្ឋអាមេរិក និង មេដឹកនាំកូរ៉េខាងជើងក៏ដោយ តែរហូតដល់ថ្ងៃសុក្រនេះ មិនទាន់មានព័ត៌មានណាដែលបញ្ជាក់ថា មេដឹកនាំទាំងពីរសម្រេចលុបចោលគម្រោងនៃជំនួបនោះនៅឡើយទេ។
