សមត្ថកិច្ចឃាត់ខ្លួនជនជាតិចិន៣នាក់ពាក់ព័ន្ធករណីសាងសង់អគារកម្ពស់៧ជាន់មិនមានច្បាប់អនុញ្ញាត ហើយបានបាក់នៅព្រឹកថ្ងៃសៅរ៍នេះ ដែលព័ត៌មានបឋមឱ្យដឹងថា បណ្តាលឱ្យមានអ្នកស្លាប់៣នាក់ និងរបួសមួយចំនួនទៀត។
តាមសេចក្តីប្រកាសព័ត៌មានរបស់សាលាខេត្តព្រះសីហនុឱ្យដឹងថា ជនជាតិ៣នាក់នោះរួមមានឈ្មោះ Chen Kun ជាម្ចាស់ការដ្ឋានសំណង់ ឈ្មោះ Deng Xing Gul ជាម្ចាស់ក្រុមហ៊ុនទទួលសាងសង់ និង ឈ្មោះ Gao Yu ជាអ្នកម៉ៅការបូកជញ្ជាំងអគារ។
សាលាខេត្តបញ្ជាក់ទៀតថា ក្រៅពីជនជាតិចិនទាំង៣នាក់នេះ ជនជាតិខ្មែរម្នាក់ ឈ្មោះ ញឹក ហ៊ុយ ដែលជួលដីឱ្យជនជាតិចិនសាងសង់អគារសម្រាប់ធ្វើសណ្ឋាគារនេះ ក៏ត្រូវនាំខ្លួនទៅសាកសួរដែរ។
ក្រោយការបាក់អគារនៅក្នុងខេត្តព្រះសីហនុនេះ ក្រសួងរៀបចំដែនដី នគរូបនីយកម្ម និង សំណង់អះអាងថា អគារនេះ សាងសង់ឡើងដោយមិនមានច្បាប់អនុញ្ញាតទេគឺខាងក្រសួងហាមឃាត់ពីរលើកហើយតែម្ចាស់ការដ្ឋានសាងសង់នេះមិនព្រមស្តាប់។