អាជ្ញាធរខេត្តព្រះសីហនុ និងក្រុមជួយសង្គ្រោះបានរកឃើញសាកសព និងជនរងគ្រោះជាបន្ដបន្ទាប់ ក្រោយពីសំណង់អគារចិនមួយដែលមានកម្ពស់៧ជាន់បានបាក់រំលំ និងសង្កត់មនុស្សស្លាប់ កាលពីចុងសប្ដាហ៍កន្លងទៅនេះ។
ក្នុងសេចក្ដីប្រកាសព័ត៌មានចេញផ្សាយនៅថ្ងៃនេះ រដ្ឋបាលខេត្ដព្រះសីហនុឲ្យដឹងថា គិតដល់ព្រឹកថ្ងៃចន្ទ ទី២៤ ខែមិថុនានេះ ក្រុមការងារជួយសង្គ្រោះបានរកឃើញសាកសពសរុបចំនួន ២៤នាក់ ក្នុងនោះមានស្រី៤នាក់ និងអ្នករងរបួសបានកើនដល់ ២៤នាក់ ក្នុងករណីបាក់សំណង់អគារ៧ជាន់ កាលពីព្រឹកថ្ងៃសៅរិ៍ចុងសប្ដាហ៍នេះ។
រដ្ឋបាលខេត្ដព្រះសីហនុឲ្យដឹងថា ក្រុមការងារជួយសង្គ្រោះនៅតែបន្ដប្រតិការជួយសង្គ្រោះរុករកអ្នកស្លាប់ និងអ្នកនៅរស់រានមានជីវិតផ្សេងទៀត ខណៈក្រុមការងារជួយសង្គ្រោះបានជីកកាយគំនរបែកបាក់នៃសំណង់អគារនេះ បានប្រមាណ ៧៥ភាគរយហើយ។
ករណីបាក់អគារ៧ជាន់នេះ សមត្ថកិច្ចបានឃាត់ខ្លួនជនជាតិចិន៣នាក់ ដោយថា សំណង់អគារនេះ គឺគ្មានច្បាប់អនុញ្ញាតនោះទេ ហើយអាជ្ញាធរបានចុះហាមឃាត់ចំនួន២ដងរួចហើយ ប៉ុន្ដែ ម្ចាស់ការដ្ឋានមិនស្ដាប់។
ជនជាតិ៣នាក់នោះរួមមានឈ្មោះ Chen Kun ជាម្ចាស់ការដ្ឋានសំណង់ ឈ្មោះ Deng Xing Gul ជាម្ចាស់ក្រុមហ៊ុនទទួលសាងសង់ និង ឈ្មោះ Gao Yu ជាអ្នកម៉ៅការបូកជញ្ជាំងអគារ។
ក្រៅពីជនជាតិចិនទាំង៣នាក់នេះ សមត្ថកិច្ចក៏បានឃាត់ខ្លួនជនជាតិខ្មែរម្នាក់ផងដែរ ដែលមានឈ្មោះ ញឹក ហ៊ុយ បន្ទាប់ពីបានជួលដីឱ្យជនជាតិចិនសាងសង់អគារសម្រាប់ធ្វើសណ្ឋាគារនេះ៕
