ក្នុងពិធីផ្ទេរការគ្រប់គ្រងសាលាពិការភ្នែក គ និងថ្លង់ នៃអង្គការគ្រួសារថ្មីឱ្យស្ថិតនៅក្រោមការគ្រប់គ្រងរបស់រដ្ឋ ក្នុងរាជធានីភ្នំពេញ នៅព្រឹកថ្ងៃច័ន្ទនេះ លោកនាយករដ្ឋមន្ត្រី ហ៊ុន សែន បានថ្លែងបែបឌឺដងទៅក្រុមអ្នកប្រឆាំងដែលរស់នៅលើទឹកដីអឺរ៉ុបឱ្យនាំគ្នាចេញមកធ្វើបាតុកម្មប្រឆាំងវត្តមានរបស់លោក ដូចដែលពួកគេធ្លាប់ធ្វើដាក់លោកកន្លងមក។
លោកនាយករដ្ឋមន្រ្តី ហ៊ុន សែន បានអំពាវនាវយ៉ាងដូច្នេះ ខណៈលោកនឹងត្រៀមចេញដំណើរទៅចូលរួមកិច្ចប្រជុំនៅអង្គការពាណិជ្ជកម្មពិភពលោក ឬ ហៅថា WTO នៅទីក្រុងហ្សឺណែវ ប្រទេសស្វីស ចាប់ពីថ្ងៃស្អែកនេះ។
លោក ហ៊ុន សែន បានអះអាងថា ទោះបីជាមានបាតុកម្ម ឬគ្មានបាតុកម្មប្រឆាំងរូបលោកក៏ដោយ ប៉ុន្តែ វត្តមានរបស់លោកក្នុងកិច្ចប្រជុំរបស់អង្គការពាណិជ្ជកម្មពិភពលោកនៅតែមិនអាចខកខានបាន។
លោកមានប្រសាសន៍ថា៖ «ហើយខ្ញុំបានឱ្យព័ត៌មាននេះ ថាខ្ញុំនឹងទៅហ្សឺណែវថ្ងៃ២ កក្កដានេះ ដូចជាបីអាទិត្យមុនឯណោះ។ អីចឹង ល្មមប្រមូលមនុស្សមកធ្វើបាតុកម្មបានហើយ ឱ្យគេឃើញ។ បង្ករឿងឱ្យបានច្រើនបន្តិច អាហ្នឹងកាន់តែល្អ។ ខ្ញុំមិនមែនឌឺឱ្យអាណាទេ»។
សេចក្តីប្រកាសព័ត៌មានរបស់ក្រសួងការបរទេសកាលពីចុងខែមិថុនា បានឱ្យដឹងថា លោកនាយករដ្ឋមន្ត្រី ហ៊ុន សែន នឹងត្រូវដឹកនាំប្រតិភូទៅចូលរួមកិច្ចប្រជុំមួយស្តីពីការត្រួតពិនិត្យឡើងវិញជាសកលលើជំនួយសម្រាប់ពាណិជ្ជកម្មឆ្នាំ២០១៩ ដែលប្រព្រឹត្តទៅពីថ្ងៃទី៣ ដល់ថ្ងៃទី៥ ខែកក្កដា នៅស្នាក់ការអង្គការពាណិជ្ជកម្មពិភពលោក នាទីក្រុងហ្ស៊ឺណែវ ប្រទេសស្វីស។
វី.អូ.ឌី មិនអាចសុំការឆ្លើយតបពីអ្នកនាំពាក្យអតីតគណបក្សសង្រ្គោះជាតិដែលនៅក្រៅប្រទេស គឺ លោក អ៊ូ ច័ន្ទរ័ត្ន និងអនុប្រធានគណបក្សប្រឆាំង អ្នកស្រី មូរ សុខហួរ បានទេនៅថ្ងៃនេះ។
អ្នកវិភាគនយោបាយ លោក ឯម សុវណ្ណរ៉ា មើលឃើញថា ក្រោយពេលមានការអំពាវនាវរបស់លោក ហ៊ុន សែន បែបនេះ លទ្ធភាពនៃការធ្វើបាតុកម្មអាចនឹងកើតមាន ហើយការប្រកាសបែបនេះអ្នកវិភាគថា គ្មានផលវិជ្ជមានសម្រាប់រដ្ឋាភិបាលនោះឡើយ។ ផ្ទុយទៅវិញ លោកថា បង្ហាញអំពីភាពបែកបាក់ជាតិ និងកាន់តែធ្វើឱ្យកម្ពុជាបាត់បង់ប្រជាប្រិយភាពលើឆាកអន្តរជាតិផងដែរ។
លោកមានប្រសាសន៍ថា៖ «ចរន្តនេះ វាមិនមានភាពវិជ្ជមានក្នុងការដឹកនាំប្រទេសទេ ព្រោះការដឹកនាំប្រទេសទាមទារឱ្យមានការបង្រួបបង្រួម ការខន្តី ការសណ្តោស បង្រួបបង្រួមពលរដ្ឋឱ្យដើរនៅលើផ្លូវតែមួយ។ បើកាលណា គាត់លើកមកញុះញង់ មកបញ្ឆេះស្មារតីពលរដ្ឋនៅក្រៅស្រុកឱ្យប្រតិកម្មជាមួយគាត់ហ្នឹង ធ្វើឱ្យចរន្តពលរដ្ឋខ្មែរយើងបច្ចុប្បន្ននេះ វាចេញជារូបភាពពីរ»។
រដ្ឋាភិបាលអាណត្តិទី៦ ដែលកើតឡើង ក្រោយការបោះឆ្នោតជ្រើសតាំងតំណាងរាស្ត្រកាលពីខែកក្កដា ២០១៨ ដឹកនាំដោយលោក ហ៊ុន សែន ធ្លាប់ទទួលរងការធ្វើបាតុកម្មប្រឆាំងពីសំណាក់ពលរដ្ឋខ្មែរមួយចំនួនដែលកំពុងរស់នៅក្រៅប្រទេស ដូចជានៅសហរដ្ឋអាមេរិក នៅបារាំង ស្វីស កាណាដា អូស្ត្រាលី កូរ៉េខាងត្បូង និងជប៉ុន ជាដើម។
បាតុកម្មខ្លះ គឺជាការធ្វើឡើងប្រឆាំងវត្តមាន លោក ហ៊ុន សែន ហើយបាតុកម្មខ្លះទៀតទាមទារឱ្យដោះលែងលោក កឹម សុខា និងអតីតមន្ត្រីគណបក្សសង្រ្គោះជាតិ និងមានបាតុកម្មផ្សេងទៀត គឺទាមទារឱ្យមានការបោះឆ្នោតឡើងវិញ ដោយក្រុមអ្នកបាតុកម្មមិនទទួលស្គាល់រដ្ឋាភិបាលអាណត្តិទី៦នេះ និងចាត់ទុកថា រដ្ឋាភិបាលអាណត្តិថ្មីនេះជារដ្ឋាភិបាលខុសច្បាប់ កើតចេញពីការបោះឆ្នោតក្លែងក្លាយ៕