នាយករដ្ឋមន្រ្តី ហ៊ុន សែន បានលើកឡើងកាលពីពីម្សិលមិញ ថាវាមិនមានភាពចាំបាច់នោះទេដែលកម្ពុជាត្រូវការវត្តមានរបស់កងទ័ពចិន ហើយម្យ៉ាងវិញទៀត ក្នុងប្រវត្តិសាស្រ្តចិនមិនធ្លាប់នាំទ័ពចេញក្រៅពីព្រំដែនរបស់គេដែរ។
ការបដិសេធជាថ្មីជុំវិញព័ត៌មានដែលថាកំពង់ផែរាម ខេត្តព្រះសីហនុ និងតំបន់ទេសចរណ៍តារាសាគរ ខេត្តកោះកុង អាចក្លាយជាមូលដ្ឋានកងទ័ពជើងទឹករបស់ចិន ធ្វើឡើងក្នុងពេលដែលលោក ហ៊ុន សែន ជួបជុំជាមួយពលរដ្ឋខ្មែរ នៅប្រទេសស្វីសកាលពីម្សិលមិញ។
លោក ហ៊ុន សែន បានចោទជាសំណួរ តើកម្ពុជាត្រូវការវត្តមានកងទ័ពបរទេសនៅលើទឹកដីរបស់ខ្លួនធ្វើអ្វី ទៅវាយជាមួយអ្នកណា ហើយក៏គ្មានភាពចាំចាច់ណាមួយដែលចិនត្រូវដាក់ទ័ពនៅកម្ពុជា ព្រោះថា ប្រទេសទាំងពីរនៅជិតគ្នាណាស់។
លោក មានប្រសាសន៍ថា៖ «វាគ្មានការចាំបាច់ទាល់តែសោះហ្នឹង សម្រាប់កម្ពុជា។ ឯចិនវិញ គាត់ចាំបាច់មកដាក់កងទ័ពស្រុកខ្មែរធ្វើអ្វី បើចិន និងយើងជិតតែគ្នាហ្នឹង? ឥលូវនិយាយឲ្យស្រួលស្តាប់ ចិន និងយើងជិតគ្នាណាស់ បើហោះទៅហៃណានគឺតែមួយម៉ោងជាង។ អញ្ចឹង គាត់ចាំបាច់មកដាក់ទ័ពស្រុកខ្មែរ នាំបង្កើតរឿងបង្កើតរ៉ាយធ្វើអី? គាត់ដាក់ទ័ពនៅស្រុកគាត់ ប្រសិនបើមានបញ្ហាកើតឡើងនៅសម័យចិនខាងត្បូង ឬក៏ស្អី គាត់តែមួយភ្លែត គាត់ចល័តបាន គាត់ចាំបាច់មកដាក់នៅស្រុកខ្មែរនាំតែមានរឿង។ ប៉ុន្តែ បើយើងសិក្សាពីប្រវត្តិសាស្រ្តរបស់ចិនទៅវិញ ចិនដូចជាមិនដែលធ្លាប់នាំកងទ័ពចេញក្រៅព្រំដែនរបស់ខ្លួនទេ។»
សាស្ត្រាចារ្យផ្នែកសិក្សាពីសហគមន៍អាស៊ាននៅសាកលវិទ្យាល័យនរេសួន ប្រទេសថៃ លោក ផូល ឆាំប៊ឺ (Paul Chambers) មានប្រសាសន៍ប្រាប់ VOD តាមសារអេឡិចត្រូនិចថា អ្វីដែលលោក នាយករដ្ឋមន្រ្តី ហ៊ុន សែន មានប្រសាសន៍មិនឆ្លុះបញ្ចាំងពីការពិតនោះទេ។
លោក លើកឡើងថា៖ «ទីមួយ អ្វីដែលលោក ហ៊ុន សែន និយាយមិនមែនជាការពិតនោះទេ។ ចិន មានមូលដ្ឋានយោធានៅបរទេសរួចហើយ គឺនៅប្រទេសជីប៊ូទី។ ទីពីរគាត់ គាត់កំពុងតែចាប់ផ្ដើមការវាយប្រហារជាពាក្យសម្តីថ្មីមួយទៀតទៅលើបស្ចឹមប្រទេស។ ការបដិសេធដែលមិនពិតទាក់ទងនឹងវត្តមានរបស់កងទ័ពចិននៅបរទេស និងការរិះគន់បស្ចឹមប្រទេស មិនបានជួយឲ្យគេជឿនោះទេ ថាគាត់មិនបានផ្តល់ដីកម្ពុជាឲ្យចិនសម្រាប់ប្រើប្រាស់ជាមូលដ្ឋានយោធា។»
ក្នុងលិខិតមួយចុះថ្ងៃទី២៤ ខែមិថុនា ឆ្នាំ២០១៩ ឧបការីរងរដ្ឋមន្ត្រីក្រសួងការពារជាតិសហរដ្ឋអាមេរិកទទួលបន្ទុកភូមិភាគអាស៊ីអាគ្នេយ៍ និងអាស៊ីខាងត្បូង លោក Joseph Felter បានស្នើសុំឲ្យរដ្ឋមន្ដ្រីក្រសួងការពារជាតិ លោក ទៀ បាញ់ បកស្រាយអំពីមូលហេតុដែលកម្ពុជាបដិសេធលែងចង់បានជំនួយរបស់ខ្លួនក្នុងការកែលម្អមូលដ្ឋានទ័ពជើងទឹករាម ដូចជា ការជួសជុលអគារបណ្ដុះបណ្ដាល និងឃ្លាំងជួសជុលកាណូត ដែលត្រូវបានកសាងឡើងក្រោមការឧបត្ថម្ភរបស់អាមេរិក កាលពីឆ្នាំ២០១៧។
លោក Joseph Felter បានបញ្ជាក់ក្នុងលិខិតនោះថា ភាគីកម្ពុជាបានស្នើសុំជំនួយនេះ កាលពីខែមករាកន្លងទៅ ហើយលោកក៏បានស្នើសុំ និងទទួលបានកញ្ចប់ថវិកាពីរដ្ឋាភិបាលអាមេរិក កាលពីខែមេសា ដើម្បីគាំទ្រដល់គម្រោងអភិវឌ្ឍន៍មូលដ្ឋានទ័ពជើងទឹករាមនេះ។ ប៉ុន្ដែ នៅថ្ងៃទី៦ ខែមិថុនា លោកបែរជាទទួលបានលិខិតមួយរបស់ក្រសួងការពារជាតិកម្ពុជា ដែលបានច្រានចោលជំនួយនេះ និងឆ្លើយតបថា «លែងមានភាពចាំបាច់»។
អ្នកនាំពាក្យក្រសួងការពារជាតិកម្ពុជា លោក ឈុំ សុជាតិ បានសរសេរនៅលើទំព័រហ្វេសប៊ុករបស់លោកកាលពីម្សិលមិញថា ព័ត៌មានដែលថាកម្ពុជាបដិសេធជំនួយរបស់អាមេរិកជារឿងមិនពិត។
លោក បានសរសេរថា៖ «ការផ្សព្វផ្សាយចោទប្រកាន់ថា ក្រសួងការពារជាតិកម្ពុជាបានបដិសេធជំនួយអាមេរិក ដែលសុំជួសជុលអគារហ្វឹកហ្វឺន និងផ្ទុកនាវារបស់មូលដ្ឋានកងទ័ពជើងទឹកកម្ពុជា គឺជាដំណឹងមិនពិតទាល់តែសោះ ដោយហេតុថា ក្រសួងការពារជាតិពុំដែលបានស្នើទៅអាមេរិក ដើម្បីជួសជុលអគារខាងលើនេះម្តងណាទេ។»
លោក បន្ថែមថា អគារហ្វឹកហ្វឺន និងផ្ទុកសម្ភារ ដែលរងការចោទប្រកាន់នេះ គឺមិនមែនចំណុះឱ្យ មូលដ្ឋានកងទ័ពជើងរាមទេ។ លោក ឲ្យដឹងថា វាជាអគាររបស់គណៈកម្មាធិការជាតិសន្តិសុខលំហសមុទ្រ ដែលមានទីតាំងបណ្តោះអាសន្ននៅមូលដ្ឋានកងទ័ពជើងទឹករាម ហើយនឹងត្រូវផ្លាស់ប្តូរទៅកាន់កន្លែងថ្មីក្នុងពេលឆាប់ៗខាងមុខនេះ៕