បងស្រីលោក កែម ឡី ថ្លែងថា ការចោទប្រកាន់ប្អូនប្រុសជំពាក់លុយ៣០០០ដុល្លារជាមូលហេតុនៃការបាញ់សម្លាប់នោះ ជាការប្រមាថធ្វើឱ្យរូបគាត់ និងក្រុមគ្រួសារឈឺចាប់មួយជាន់ទៀត លើការលើបាត់បង់សាច់ញាតិជាទីស្រលាញ់របស់ពួកគាត់។
នៅក្នុងកិច្ចសម្ភាសន៍មួយជាមួយវីអូឌី កាលពីយប់ថ្ងៃពុធម្សិលមិញ អ្នកស្រី កែម ថាវី លើកឡើងថា ប្អូនប្រុសរបស់អ្នកស្រី ជាមនុស្សមានចំណេះដឹង មានសេចក្តីថ្លៃថ្នូរ ប្រឹងប្រែងជួយដល់សង្គមជាតិ បែរជាត្រូវបាញ់សម្លាប់ ហើយចោទប្រកាន់បង្ខូចកេរ្តិ៍ឈ្មោះប្អូនអ្នកស្រីទៀត។
អ្នកស្រី កែម ថាវី៖ «ខ្ញុំខឹងណាស់ ហេតុអីបានចោទថា ប្អូនខ្ញុំជំពាក់លុយ៣០០០។ វាថោកទាប ប្អូនខ្ញុំខ្ចីលុយយកមកធ្វើអីគេ?»
អ្នកស្រីទាមទារឱ្យមានការស្វែងរកឃាតករពិត និងបកស្រាយជុំវិញមូលហេតុនៃការបាញ់សម្លាប់ប្អូនប្រុសរបស់អ្នកស្រីនេះ។
ក្រោយ៣ឆ្នាំនៃការហេតុការណ៍បាញ់សម្លាប់លោក កែម ឡី កាលពីថ្ងៃទី១០ ខែកក្កដា ឆ្នាំ២០១៦មក តុលាការរកឃើញឃាតករតែម្នាក់គឺឈ្មោះ អឿត អាង ហៅ ជួប សម្លាប់។ អឿត អាង ចោទថា លោក កែម ឡី ជំពាក់លុយលោក៣០០០ដុល្លារ មិនព្រមសងទើបលោកបាញ់សម្លាប់។
បើទោះជាតុលាការសម្រេចចោទប្រកាន់បុរសឈ្មោះ អឿត អាង ឱ្យជាប់ពន្ធនាគារអស់មួយជីវិត ប៉ុន្តែ មិនបានបកស្រាយជាសាធារណៈពីមូលហេតុនៃការបាញ់នេះទេ។
