ចៅក្រមស៊ើបសួរសាលាដំបូងខេត្តរតនគិរី សម្រេចឱ្យមន្រ្តីសមាគមការពារសិទ្ធិមនុស្សអាដហុកម្នាក់ និងពលរដ្ឋពីរនាក់ផ្សេងៗស្ថិតក្រោមការត្រួតពិនិត្យរបស់តុលាការក្នុងសំណុំរឿងញុះញង់ឱ្យប្រព្រឹត្តិបទឧក្រិដ្ឋជាអាទិ៍។
មន្ត្រីចងក្រងសហគមន៍សមាគមអាដហុកលោក ប៉ែន ប៊ុណ្ណារ៍ ប្រាប់វីអូឌីថាអ្នកទាំងបីនាក់នោះ រួមមានរូបលោក និងសមាជិកសហគមន៍សាមុត្រក្រោម ឃុំសេដា ស្រុកលំផាត់ ខេត្តរតនគិរី គឺឈ្មោះ ឆន ផល្លា និង ឈ្មោះស៊ីថាន ញ៉ាន់។ លោក ប៉ែន ប៊ុណ្ណារ៍ ប្រាប់ថាពួកគាត់ទាំងបីនាក់បានចូលទៅបំភ្លឺនៅសាលាដំបូងខេត្តរតនគិរី នៅថ្ងៃទី១០ ខែតុលា ឆ្នាំ២០១៩ នៅមុខចៅក្រមស៊ើបសួរសាលាដំបូងខេត្តរតនគិរី លោក សេង ស៊ឹមសូរិយា ដែលដើមបណ្ដឹងក្នុងសំណុំរឿងនេះរួមមាន មេភូមិសាមុត្រក្រោម មេឃុំឃុំសេដា អធិការរងនគរបាលនិងអភិបាលរងស្រុកលំផាត់។
មន្រ្តីសមាគមអាដហុករូបនេះ ថាចៅក្រមស៊ើបសួរនៃសាលាដំបូងខេត្តរតនគិរី លោក សេង ស៊ិនសូរិយា បានសម្រេចដាក់ឱ្យរូបលោក និងពលរដ្ឋ២នាក់ទៀតស្ថិតក្រោមការត្រួតពិនិត្យរបស់តុលាការ មិនត្រូវផ្លាស់ប្ដូរទីលំនៅឡើយ ហើយត្រូវបង្ហាញខ្លួននៅមុខតុលាការ២ខែម្ដងដើម្បីបន្តនិតិវិធីស៊ើបសួរ។ លោក ប៉ែន ប៊ុណ្ណារ៍ លើកឡើងថាការសម្រេចរបស់ចៅក្រមស៊ើបសួរនេះជានិតិវីធីរបស់តុលាការ ប៉ុន្តែលោកថាតុលាការមិនបានរកឃើញភស្ដុតាងណាមួយដែលបញ្ជាក់ថា លោកនិងពលរដ្ឋ២នាក់ទៀតល្មើសច្បាប់នោះឡើយ។
លោក ប៉ែន ប៊ុណ្ណារ៍ មានប្រសាសន៍ថា ៖«យើងអត់មានប៉ះពាល់អីទាំងអស់ សូម្បីតែកៅអីឈើប្រណីតមួយក៏ខ្ញុំមិនប៉ះដែរ។ អ៊ីចឹងគ្មានអ្វីដែលធ្វើឱ្យយើងភ័យព្រួយអីទាំងអស់ ទោះបីជាត្រូវដាក់ឱ្យស្ថិតក្រោមការត្រួតពិនិត្យប៉ុន្តែយើងនៅតែអាចបម្រើសង្គមនិងប្រទេសជាតិបាន»។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា មានប្រសាសន៍ថា អាដហុកស្នើឱ្យតុលាការលើកលែងការចោទប្រកាន់បុគ្គលិករបស់ខ្លួននិងប្រជាពលរដ្ឋ។លោកចាត់ទុកថា ការសម្រេចចៅក្រមស៊ើបនៅពេលនេះ គឺបង្ករការលំបាកដល់អ្នកការពារសិទ្ធិនិងពលរដ្ឋស្លូតត្រង់ដែលខិតខំការពារធនធានធម្មជាតិ។
លោក ស៊ឹង សែន ករុណា លើកឡើងថា៖ «ជំហខាងសមាគមអាដហុក យើងសូមឱ្យមានការលើកលែងការចោទប្រកាន់ទាំងមន្ត្រីយើងទាំងប្រជាជាពលរដ្ឋព្រោះពួកគាត់សុទ្ធតែអ្នកសកម្មខាងការងារការពារធនធានធម្មជាតិ ។ការសម្រេចឱ្យស្ថិតក្រោមការត្រួតពិនិត្យរបស់តុលាការនេះបង្ករការលំបាកប៉ះពាល់ដល់ការបំពេញការងារជាច្រើនដែលយើងតែងធ្វើការងារដើម្បីបម្រើសង្គម»។
លោក ប៉ែន ប៊ុណ្ណារ៍ លោក ឆន ផល្លា និង លោក ស៊ីថាន ញ៉ាន់ ត្រូវបានតំណាងអយ្យការអមសាលាដំបូងខេត្តរតនគិរី ចោទប្រកាន់ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ ដែលប្រព្រឹត្តទៅនៅចំណុចភូមិសាមុត្រក្រោម ឃុំសេដា ស្រុកលំផាត់ ខេត្តរតនគិរី កាលពី ខែមិថុនា ឆ្នាំ២០១៧។
លោក ប៉ែនប៊ុណ្ណា អះអាងថាលោក បានរងបណ្ដឹងទាំងអស់ចំនួន៥រួចហើយ ក្នុងរយៈពេលបំពេញការងារជាមន្ត្រីអាដហុកប្រចាំខេត្តរតនគីរីរយៈពេលជាង១០ឆ្នាំមកនេះ៕
