លោក សម រង្ស៊ី បានប្រាប់ទៅកាន់ប្រទេសជិតខាង ឱ្យជួយស្តារលទ្ធិប្រជាធិបតេយ្យនៅកម្ពុជា ដើម្បីទប់ស្កាត់វត្តមានយោធាចិននៅក្នុងតំបន់ ដែលអាចកើតចេញពីទំនាក់ទំនងរវាងកម្ពុជា-ចិន។
ការថ្លែងដូច្នេះ គឺធ្វើឡើងនៅអំឡុងពេលអតីតមេបក្សប្រឆាំងរូបនេះ ផ្តល់បទសម្ភាសន៍ខ្លីមួយជាភាសាអង់គ្លេសដល់ក្រុមអ្នកសារព័ត៌មាន មុនពេលលោក និងសហការីចូលជួបជាមួយសមាជិកសភាប្រទេសម៉ាឡេស៊ី នៅរសៀលថ្ងៃនេះ។
តាមរយៈសន្និសីទផ្សាយផ្ទាល់លើទំព័រ Facebook ផ្លូវការរបស់លោកស្រី មូរ សុខហួរ ប្រធានស្តីទីនៃអតីតគណបក្សសង្រ្គោះគឺលោក សម រង្ស៊ី លើកឡើងថា បញ្ហាលទ្ធិប្រជាធិបតេយ្យនៅកម្ពុជា គឺជាប់ពាក់ព័ន្ធនឹងទំនាក់ទំនងកម្ពុជា-ចិន។ លោកអះអាងថា តាមទំនាក់ទំនងនេះ រដ្ឋាភិបាលកម្ពុជាអាចនឹងកសាងហេដ្ឋារចនាសម្ព័ន្ធ ដែលអាចផ្លាស់ប្តូរទៅជាមូលដ្ឋានយោធាចិនបានយ៉ាងឆាប់រហ័ស។ លោក សម រង្ស៊ី បន្ថែមថា កម្ពុជា ត្រូវតែឈរនៅលើអព្យាក្រិតភាព និងឯករាជ្យភាពពីប្រទេសចិន។ លោកសម រង្ស៊ី៖
«ដូច្នេះ រដ្ឋាភិបាលកម្ពុជាកំពុងប្រលែងជាមួយភ្លើង ដោយការចុះហត្ថលេខាជាមួយចិន [អនុញ្ញាតឱ្យចិនកសាងមូលដ្ឋានយោធាលើទឹកដីកម្ពុជា] ដែលបានបង្កក្តីកង្វល់យ៉ាងច្រើននៅក្នុងប្រទេសជិតខាង។ ដូច្នេះ ខ្ញុំអាចធានាដល់ប្រទេសជាមិត្តទាំងអស់ថា នៅពេលប្រជាធិបតេយ្យឈ្នះនៅក្នុងប្រទេសកម្ពុជា យើងនឹងមិនអនុញ្ញាតឱ្យចិនកសាងមូលដ្ឋានយោធានៅក្នុងទឹកដីរបស់កម្ពុជា»។
កាលពីថ្ងៃទី២១ ខែកក្កដា កាសែត TheWall Street Journal របស់អាមេរិក បានចុះផ្សាយថា កម្ពុជាបានចុះហត្ថលេខាជាសម្ងាត់ជាមួយចិន អំឡុងត្រីមាសទី២ ឆ្នាំ២០១៩ ដើម្បីផ្ដល់សិទ្ធិឱ្យប្រទេសចិន ប្រើប្រាស់មូលដ្ឋានជើងទឹកមួយកន្លែងក្នុងឈូងសមុទ្រកម្ពុជា រយៈពេល ៣០ឆ្នាំ។ ប៉ុន្តែ ការចុះផ្សាយនេះត្រូវបានភាគីកម្ពុជា និងចិនធ្វើការទាត់ចោលជាបន្តបន្ទាប់។
ភ្លាមៗដែរ លោកនាយករដ្ឋមន្រ្តី ហ៊ុន សែន ក៏បានបដិសេធចំពោះការចុះផ្សាយនោះ និងថា ជាព័ត៌មានប្រឌិតដែលមានចេតនាដ៏អាក្រក់បំផុតប្រឆាំងជាមួយកម្ពុជា។ កាលពីថ្ងៃទី២៦ ខែកក្កដា រដ្ឋាភិបាលកម្ពុជា បាននាំអ្នកសារព័ត៌មានជាង ៧០នាក់ មកពី៣៦អង្គភាព ទៅចុះទស្សនកិច្ចនៅមូលដ្ឋានកងទ័ពជើងទឹករាម ដើម្បីជាការបង្ហាញដល់សាធារណជនទូទៅថា មិនមានមូលដ្ឋានកងទ័ពចិននៅតំបន់នោះឡើយ៕