អតីតមេដឹកនាំបក្សប្រឆាំង បានបង្ហាញសមានចិត្តចូលរួមរំលែកទុក្ខជាមួយក្រុមគ្រួសារលោក ហ៊ុន សែន នៅថ្ងៃនេះ បន្ទាប់ពីម្ដាយក្មេករបស់នាយករដ្ឋមន្ត្រីបានទទួលមរណភាព។
ឧបាសិកា ប៊ុន ស៊ាងលី ដែលជាម្ដាយបង្កើតរបស់លោកស្រី ប៊ុន រ៉ានី ភរិយារបស់លោកនាយករដ្ឋមន្ត្រី ហ៊ុន សែន បានទទួលមរណភាពក្នុងជន្មាយុ ៩៦ឆ្នាំដោយជរាពាធ កាលពីម៉ោង ២ និង ១២នាទីទៀបភ្លឺព្រឹកថ្ងៃម្សិលមិញនេះ។
អតីតប្រធានគណបក្សសង្គ្រោះជាតិ លោក កឹម សុខា បានផ្ញើសាររំលែកទុក្ខទៅក្រុមគ្រួសារលោក ហ៊ុន សែន រួចមកហើយកាលពីថ្ងៃម្សិលមិញនេះ។
នៅរសៀលថ្ងៃនេះ លោក កឹម សុខា និងសហការីមួយចំនួនទៀត ក៏បានធ្វើដំណើរដោយផ្ទាល់ និងនាំយកកម្រផ្កាទៅគោរពវិញ្ញាណក្ខន្ធឧបាសិកា ប៊ុន ស៊ាងលី នៅឯគេហដ្ឋានរបស់លោក ហ៊ុន សែន នៅជិតវិមានឯករាជ្យ។
លោក កឹម សុខា បានអង្គុយនៅលើកៅអីជជែកជាមួយលោក ហ៊ុន សែន ខណៈដែលអតីតតំណាងរាស្ត្របក្សសង្គ្រោះជាតិ លោក យ៉ែម បុញ្ញាឫទ្ធិ និងមនុស្សចំនួន ៤រូបទៀត បានអង្គុយលើកៅអីនៅមិនឆ្ងាយពីជំនួបនោះផងដែរ។
លោកស្រី ម៉េង សុភារី សហមេធាវីការពារក្ដីឱ្យលោក កឹម សុខា បានប្រាប់វីអូឌីនៅយប់ថ្ងៃនេះថា ក្នុងជំនួបនោះ លោក កឹម សុខា បានសម្ដែងការចូលរួមមរណទុក្ខជាមួយលោក ហ៊ុន សែន ហើយលោកទាំងពីរក៏បានសាកសួរសុខទុក្ខគ្នាទៅវិញទៅមកផងដែរ។
នៅពេលត្រូវបានសាកសួរបន្ថែមថា តើលោកទាំងពីរបានជជែកអ្វីបន្ថែមលើសពីការសាកសួរសុខទុក្ខគ្នាឬទេនោះ លោកស្រី សុភារី ប្រាប់ថា លោកស្រីមិនបានដឹងទេ ព្រោះលោកស្រីអង្គុយនៅចម្ងាយប្រហែល ៤ម៉ែត្រពីចំណុចដែលលោកទាំងពីរបានផ្លាស់ប្ដូរកិច្ចសន្ទនាទៅវិញទៅមក។ លោកស្រីបន្ថែមថា លោកស្រីស្ដាប់មិនឮកិច្ចសន្ទនានោះទេ ខណៈដែលមានសំឡេងអ៊ូរអរនៅក្នុងពិធីបុណ្យផងដែរ។
ក្រៅពីលោក កឹម សុខា លោក សម រង្ស៊ី អតីតមេបក្សប្រឆាំងដែលកំពុងរស់នៅនិរទេសខ្លួនឯងនៅក្រៅប្រទេសនោះ ក៏បានបង្ហោះលិខិតរំលែកទុក្ខជាមួយក្រុមគ្រួសារលោកនាយករដ្ឋមន្ត្រីផងដែរ។
លោក សម រង្ស៊ី បានរំឭកឡើងវិញថា ក្រោយពីម្ដាយក្មេករបស់លោកទទួលមរណភាពកាលពីខែវិច្ឆិកា ឆ្នាំ២០១៦ លោក ហ៊ុន សែន បានទូរសព្ទចូលរួមមរណទុក្ខជាមួយក្រុមគ្រួសារលោក ហើយកូនប្រុសពៅរបស់លោក គឺលោក ហ៊ុន ម៉ានី ក៏បានទៅចូលរួមបុណ្យសពផងដែរ។
ឧបាសិកា ប៊ុន ស៊ាងលី ទទួលបានគោរមងារ «អ្នកឧកញ៉ាព្រឹទ្ធមហាឧបាសិកាធម្មញ្ញាណវិវឌ្ឍនា» ពីព្រះមហាក្សត្រសម្ដេចព្រះបរមនាថ នរោត្ដម សីហមុនី កាលពីចុងខែវិច្ឆិកា ឆ្នាំមុន ក្រោយពីគាត់ធ្លាក់ខ្លួនឈឺធ្ងន់ ហើយត្រូវបានបញ្ជូនទៅសង្គ្រោះនៅឯមន្ទីរពេទ្យកាល់ម៉ែត្រ ដែលជំរុញឱ្យលោក ហ៊ុន សែន សម្រេចលុបចោលដំណើរទៅចូលរួមកិច្ចប្រជុំអាស៊ាន-កូរ៉េ និងមេគង្គ-កូរ៉ូ នៅឯប្រទេសកូរ៉េខាងត្បូងកាលពីខែវិច្ឆិកាឆ្នាំមុន៕
