ក្រុមសិទ្ធិមនុស្សអន្តរជាតិ បានជំរុញទៅប្រមុខការទូតជប៉ុនឱ្យលើកយកបញ្ហាសិទ្ធិមនុស្សមកជជែកជាមួយសមភាគីកម្ពុជាអំឡុងដំណើរទស្សនកិច្ចរបស់លោកមកកាន់កម្ពុជានៅចុងសប្ដាហ៍នេះ។
បើតាមសេចក្ដីប្រកាសព័ត៌មានរបស់ក្រសួងការបរទេសកម្ពុជា រដ្ឋមន្ត្រីការបរទេសជប៉ុន លោក តូសឺមីតស៊ូ ម៉ូតេហ្គិ (Toshimitsu Motegi) គ្រោងមកបំពេញទស្សនកិច្ចផ្លូវការរយៈពេល ៣ថ្ងៃនៅកម្ពុជា ចាប់ពីថ្ងៃទី២១ ដល់ថ្ងៃទី២៣ ខែសីហានេះ ហើយគ្រោងជួបលោកនាយករដ្ឋមន្ត្រី ហ៊ុន សែន និងជជែកពិភាក្សាការងារជាមួយប្រមុខការទូតកម្ពុជា លោក ប្រាក់ សុខុន។
ពីរថ្ងៃមុនដំណើរទស្សនកិច្ចនេះ អង្គការឃ្លាំមើលសិទ្ធិមនុស្ស (Human Rights Watch) បានផ្ញើលិខិតទៅប្រមុខការទូតជប៉ុនលោក ម៉ូតេហ្គិ ដោយជំរុញឱ្យលើកយកបញ្ហាសិទ្ធិមនុស្សទៅជជែកជាមួយមេដឹកនាំកម្ពុជា។
ក្នុងលិខិតនោះ ក្រុមសិទ្ធិមនុស្សអន្តរជាតិមួយនេះ បានលើកឡើងថា៖ «កម្ពុជាកំពុងប្រឈមមុខនឹងវិបត្តិសិទ្ធិមនុស្ស» ដោយថា រដ្ឋាភិបាលកម្ពុជាបន្តបង្ក្រាបទៅលើសកម្មជន ប្រព័ន្ធផ្សព្វផ្សាយឯករាជ្យ និងការរំលាយចោលគណបក្សសង្គ្រោះជាតិ។
អង្គការ HRW បានបន្តប្រាប់ទៅប្រមុខការទូតជប៉ុនថា រដ្ឋាភិបាលកម្ពុជាដែលដឹកនាំដោយគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន បានអនុម័តច្បាប់នានា ដែលគាប់សង្កត់ទៅលើសិទ្ធិសេរីភាពនៃការបញ្ចេញមតិ ការប្រមូលផ្ដុំដោយសន្តិវិធី និងសេរីភាពសមាគម។
ក្នុងលិខិតដដែលនោះ HRW បានជំរុញទៅលោក ម៉ូតេហ្គិ ឱ្យលើកឡើងពីបញ្ហាសិទ្ធិមនុស្សនៅកម្ពុជា ដូចជា ទាមទារឱ្យដោះលែងដោយឥតលក្ខខណ្ឌនូវសកម្មជន អ្នកការពារសិទ្ធិមនុស្ស អ្នកសារព័ត៌មាន និងសមាជិកគាំទ្របក្សប្រឆាំង។
អង្គការមួយនេះក៏បានជំរុញទៅប្រមូខការទូតជប៉ុនយកអនុសាសន៍របស់ខ្លួនមួយទៀតទៅជជែកជាមួយរដ្ឋាភិបាលកម្ពុជាផងដែរ ដែលអនុសាសន៍នោះបានទាមទារឱ្យបញ្ឈប់នូវការយាយី ការគំរាមកំហែង ការចាប់មនុស្សតាមទំនើងចិត្ត និងការវាយប្រហារលើរូបរាងកាយទៅលើមេដឹកនាំសហជីព សកម្មជនដីធ្លី អ្នកការពារសិទ្ធិមនុស្ស សមាជិកបក្សប្រឆាំង និងអ្នកសារព័ត៌មាន។
ក្រៅពីស្នើឱ្យលើកឡើងនូវបញ្ហាសិទ្ធិមនុស្សនៅកម្ពុជា អង្គការ HRW ក៏បានជំរុញទៅប្រមុខការទូតជប៉ុនឱ្យលើកឡើងនូវបញ្ហាសិទ្ធិមនុស្សនៅប្រទេសប៉ាពួញូហ្គីណេ ប្រទេសឡាវ និងភូមា ជាប្រទេសដែលលោក ម៉ូតេហ្គិ គ្រោងទៅបំពេញទស្សនកិច្ចជាបន្តបន្ទាប់នៅក្នុងផ្នែកមួយនៃដំណើរទស្សនកិច្ចរបស់លោកមកកាន់បណ្ដាប្រទេសនៅតំបន់អាស៊ីអាគ្នេយ៍ និងតំបន់មហាសមុទ្រប៉ាស៊ីហ្វិក៕