សកម្មជនព្រៃឈើខេត្តរតនគិរីមួយរូប បានស្នើទៅសាលាឧទ្ធរណ៍ខេត្តត្បូងឃ្មុំឲ្យទម្លាក់ចោលការចោទប្រកាន់ទៅលើរូបលោក និងផ្តល់យុត្តិធម៌សម្រាប់លោកផងដែរ ដោយលោកថា លោកមិនបានប្រព្រឹត្តដូចការចោទប្រកាន់ឡើយ។
កាលពីម្សិលមិញនេះ សាលាឧទ្ធរណ៍ខេត្តត្បូងឃ្មុំ បានបើកសវនាការលើសំណុំរឿងសកម្មជនព្រៃឈើម្នាក់មកពីខេត្តរតនគិរី លោក ឆន ផល្លា ទៅតាមបណ្តឹងរបស់អាជ្ញាធរនៅឃុំសេដា ដែលប្តឹងលោកកាលពីឆ្នាំ២០១៧ ពីបទ«ញុះញង់ឲ្យប្រព្រឹត្តបទឧក្រឹដ្ឋជាអាទិ៍»។
លោក ឆន ផល្លា ប្រាប់វីអូឌីនៅថ្ងៃអង្គារនេះថា ក្នុងសវនាការ តុលាការបានសួរនាំជាច្រើនពាក់ព័ន្ធការចោទប្រកាន់ថា លោកញុះញង់ឲ្យប្រជាពលរដ្ឋទៅរុករានដីរដ្ឋ កាប់បំផ្លាញ់ព្រៃ និងដឹកនាំពលរដ្ឋទៅដណ្តើមដីក្រុមហ៊ុនជាដើម ប៉ុន្តែ លោកបានបដិសេធចំពោះការចោទប្រកាន់នេះ។
សកម្មជនព្រៃឈើរូបនេះ បន្តថា លោកបានស្នើទៅតុលាការឲ្យទម្លាក់ចោលការចោទប្រកាន់ និងផ្តល់យល់យុត្តិធម៌ជូនលោកវិញ ដោយលោកថា បណ្ដឹងប្រឆាំងរូប គឺជាការសងសឹកដោយសារលោកជាសកម្មជនព្រៃឈើតែងតែចោទអាជ្ញាធរទាំងនោះថា ពាក់ព័ន្ធបទល្មើសព្រៃឈើ។
លោក ឆន ផល្លា ប្រាប់ថា៖ «គាត់[ដើមបណ្តឹងជាអាជ្ញាធរ]បង្កាច់កេរ្តិ៍ឈ្មោះរបស់ខ្ញុំ។ គាត់ប្តឹងរឿងមិនពិត ដោយសារគាត់ខឹងខ្ញុំរឿងដែលខ្ញុំប្តឹងគាត់ ហើយពួកគាត់ប្តឹងខ្ញុំវិញ។ អ៊ីចឹង ខ្ញុំបានស្នើសុំឲ្យតុលាការទម្លាក់ការចោទប្រកាន់មកលើខ្ញុំ និងលើកលែងការចោទប្រកាន់ដូចតុលាការខេត្តរតនគិរី និងរកយុត្តិធម៌ឲ្យខ្ញុំ»។
លោក ឆន ផល្លា បានឲ្យដឹងថា អ្នកប្តឹងលោកនោះមានមេឃុំសេដា មេភូមិសមុទ្រក្រោម អនុភូមិសមុទ្រក្រោម មេប៉ុស្តិ៍នគរបាលឃុំសេដា និងមនុស្សពីរបីនាក់ផ្សេងទៀត។
មេភូមិសមុទ្រក្រោម លោក ខាំ ផសាវ៉ាត អះអាងថា អាជ្ញាធរឃុំសេដាប្តឹងលោក ឆន ផល្លាទៅតុលាការ គឺដោយសារសកម្មជនព្រៃឈើរូបនេះ ដើរប្តឹងអាជ្ញាធរទាំងគ្មានកំហុស ប៉ុន្តែ លោកថា នៅក្នុងសវនាការ គឺពួកគាត់សុំឲ្យតុលាការបញ្ចប់រឿងត្រឹមនេះ។
លោក ខាំ ផសាវ៉ាត ប្រាប់ថា៖ «ខ្ញុំអត់ចង់ឲ្យរឿងហ្នឹងបន្តទៀត ដោយសារការងារប្តឹងផ្តល់គ្នានេះ ខាតតែកូនក្មួយខ្លួនឯង។ ឆន ផល្លានេះជាអ្នកនៅកំពង់ចាមខ្មែរសុទ្ធ មកស្រលាញ់កូនជនជាតិដើមនៅរតនគិរី។ អ៊ីចឹង ពួកខ្ញុំស្នើឲ្យមានការសម្របសម្រួលគ្នាបញ្ចប់រឿងត្រឹមហ្នឹងទៅ»។
ពាក់ព័ន្ធសំណុំរឿងនេះ កាលពីថ្ងៃទី២៦ ខែឧសភា ឆ្នាំ២០២០ ចៅក្រមស៊ើបសួរសាលាដំបូងខេត្តរតនគិរី លោក សេង ស៊ឺមសុរិយា សម្រេចលើកលែងការចោទប្រកាន់លោក ឆន ផល្លា និងមនុស្សនាក់ផ្សេងទៀត ក្រោយរកមិនឃើញកំហុស។
មន្ត្រីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តរតនគិរី លោក ឌិន ខន្នី ចាត់ទុកបណ្ដឹងទៅលើលោក ឆន ផល្លា នេះ ជាគំរាមកំហែងបំបាក់ទឹកចិត្តសកម្មជនព្រៃឈើមិនឲ្យសកម្មក្នុងការចូលរួមការពារព្រៃឈើ។
លោក ឌិន ខន្នី ប្រាប់ថា៖ «ការប្តឹងបន្តហ្នឹង វាមិនបានលើកទឹកចិត្តទៅដល់សកម្មជនព្រៃឈើដែលគាត់ខិតខំប្រឹងប្រែងការពារបរិស្ថាន ការពារព្រៃឈើ ការពារដីរដ្ឋ និងដីសហគមន៍កន្លងមកទេ។ វាជាការគំរាមកំហែង។ អ៊ីចឹង ខ្ញុំឲ្យចៅក្រមខាងសាលាឧទ្ធរណ៍មិនមានភស្ភតាងណាមួយទេ។ គួរតែទម្លាក់ចោលបទចោទដល់ពួកគាត់ទៅដើម្បីឲ្យពួកគាត់បន្តសកម្មភាពការពារបរិស្ថាន ការពារដីធ្លី និងសាធារណៈរបស់រដ្ឋបន្តទៀត»។
លោក ឆន ផល្លា ប្រាប់ថា សាលាឧទ្ទរណ៍នឹងប្រកាសសាលដីកាពាក់ព័ន្ធសំណុំរឿងនេះនៅថ្ងៃទី២១ ខែតុលា៕