ក្រុមពលរដ្ឋមានជម្លោះដីធ្លីព្រមានទុកពេលឱ្យក្រុមហ៊ុនអភិវឌ្ឍន៍ព្រលានយន្តហោះថ្មីចេញមកដោះស្រាយតាមសំណើរបស់ពួកគេ បើពុំនោះទេ ពួកគេនឹងប្រមូលផ្ដុំគ្នាជាលក្ខណៈទ្រង់ទ្រាយធំ។
នៅព្រឹកថ្ងៃទី០៣ ខែមិថុនា ឆ្នាំ២០២១នេះ ប្រជាពលរដ្ឋជាង១០០នាក់ដែលមកពីឃុំចំនួន៤ រួមមាន ឃុំបឹងខ្យាង ឃុំពត់សរ ឃុំអំពៅព្រៃ និងឃុំព្រែកស្លែង ស្រុកកណ្តាលស្ទឹង ខេត្តកណ្តាល បានប្រមូលផ្ដុំគ្នាបិទផ្លូវតវ៉ាទាមទារឱ្យក្រុមហ៊ុនឧកញ៉ា ពង់ ឃាវសែ ស្វែងរកដំណោះស្រាយបញ្ហាដីធ្លីរបស់ពួកគាត់។
តំណាងប្រជាពលរដ្ឋមកពីឃុំអំពៅព្រៃ លោក ភោគ ផាន់នី ប្រាប់ពលរដ្ឋអ្នកសារព័ត៌មាន CCIM ថា ប្រជាពលរដ្ឋប្រមាណជាង១០០នាក់បានបិទផ្លូវ នៅម៉ោង៧ ដល់ម៉ោង១០ព្រឹក នៅចំណុចភូមិអំពៅព្រៃ ឃុំបឹងខ្យាង ស្រុកកណ្ដាលស្ទឹង ដោយទាមទារទៅក្រុមហ៊ុនម៉ៅការសាងសង់ OCIC របស់ក្រុមហ៊ុនឧកញ៉ា ពង់ ឃាវសែ ដោយសារពួកគេបារម្ភខ្លាចក្រុមហ៊ុនឈូសឆាយដីធ្លីរបស់ពួកគាត់ដោយមិនដោះស្រាយផលប៉ះពាល់និងផ្ដល់សំណងសមរម្យ។
លោកថា ដីដែលបន្ដមានជម្លោះនេះស្ថិតលើដីដែលមានប្លង់រឹង ទំហំ៤០០ហិកតា ពាក់ព័ន្ធនឹងឃុំចំនួន៤ ហើយមានគ្រួសារសរុបចំនួន១៩៧គ្រួសារកំពុងទាមទារឱ្យក្រុមហ៊ុនដោះស្រាយជាបន្ទាន់។
បើតាមប្រជាពលរដ្ឋមានជម្លោះដីធ្លីរូបនេះ ប្រជាពលរដ្ឋមិនព្រមទទួលយកតម្លៃដែលក្រុមហ៊ុនផ្ដល់ឱ្យចំនួន៨ដុល្លារក្នុងមួយម៉ែត្រការ៉េទេ ដោយថា តម្លៃនេះទាបពេកធៀបនឹងតម្លៃទីផ្សារ និងមិនអាចឱ្យពលរដ្ឋយកទៅទិញដីនៅតំបន់ផ្សេងបាន។
លោក ភោគ ផាន់នី បន្ដថា៖ «ក្រុមហ៊ុនឱ្យពួកខ្ញុំតែតម្លៃ៨ដុល្លារក្នុងមួយម៉ែត្រការ៉េ ដែលជាតម្លៃដែលពួកខ្ញុំមិនអាចទៅរកទិញនៅកន្លែងផ្សេងបាន ដោយកន្លែងផ្សេង គេលក់ក្នុងតម្លៃពី៧០ដល់១០០ដុល្លារ[ក្នុងមួយម៉ែត្រការ៉េ] អ៊ីចឹងហើយបានជាពួកខ្ញុំមិនលក់ឱ្យក្រុមហ៊ុនបាន។»
តំណាងប្រជាពលរដ្ឋមកពីឃុំបឹងខ្យាង លោក ឃាង សុខមាន លើកឡើងថា ដីរបស់ពួកលោកសុទ្ធតែជាដីកម្មសិទ្ធិឯកជនស្របច្បាប់។ លោកថា មួយរយៈពេលកន្លងមក ពលរដ្ឋធ្លាប់បានបោះតង់តវ៉ា ដើម្បីកុំឱ្យរងផលប៉ះពាល់ពីគម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មី ស្ថិតនៅឃុំបឹងខ្យាង ស្រុកកណ្តាលស្ទឹង។
លោក ឃាង សុខមាន បញ្ជាក់ថា នេះជាការប្រមូលផ្ដុំទ្រង់ទ្រាយតូចប៉ុណ្ណោះ ហើយក្រុមពលរដ្ឋប្រកាសទុកពេលឱ្យក្រុមហ៊ុនចំនួន១សប្ដាហ៍ ដើម្បីដោះស្រាយមុននឹងឈានដល់ការប្រមូលផ្ដុំតវ៉ាលក្ខណៈទ្រង់ទ្រាយធំ។
លោក ឃាង សុខមាន បន្ដថា៖ «ពលរដ្ឋបានប្រមូលផ្តុំគ្នាតវ៉ានៅទីតាំងដីកំពុងមានជម្លោះ ដោយក្រុមហ៊ុនបានយកគ្រឿងចក្រមកឈូសឆាយលើដីរបស់ពួកគាត់ ជាពិសេសគឺស្រូវពង្រោះដែលពួកគាត់កំពុងតែធ្វើ បែរជាក្រុមហ៊ុនយកគ្រឿងចក្រ២គ្រឿង និងឡានបាញ់ទឹក៣គ្រឿងបម្រុងបាញ់ប្រជាពលរដ្ឋដែលមករារាំងគ្រឿងចក្រដែលកំពុងឈូសឆាយ»។
អភិបាលខេត្តកណ្តាល លោក គង់ សុភ័ណ្ឌ ប្រាប់ វីអូឌី កាលពីថ្ងៃទី៣១ ខែឧសភា ឆ្នាំ២០២១ ថាអាជ្ញាធរខេត្តនេះបានសម្របសម្រួលដោះស្រាយជាមួយប្រជាពលរដ្ឋជាច្រើនដងហើយ ប៉ុន្តែពលរដ្ឋនៅតែមិនព្រម។ លោកបន្តថា រដ្ឋាភិបាលសម្រេចផ្តល់៨ដុល្លារក្នុងមួយម៉ែត្រការ៉េជូនពលរដ្ឋ គឺធ្វើឡើងតាមការវាយតំម្លៃមុនមានគម្រោងអភិវឌ្ឍន៍។
លោកថា មុនមានគម្រោងអភិវឌ្ឍន៍ ដីតំបន់នោះ ១ម៉ែត្រការ៉េ ត្រឹមតែ៣ទៅ៨ដុល្លារប៉ុណ្ណោះ ហើយអាជ្ញាធរខេត្តបានសម្របសម្រួលដោះស្រាយតាំងពីពេលនោះ ប៉ុន្តែពលរដ្ឋនៅតែមិនព្រម ដែលធ្វើឱ្យជម្លោះបន្តអូសបន្លាយដល់ពេលនេះ។
កាលពីខែមិថុនា ឆ្នាំ២០២០ រដ្ឋាភិបាលបានចេញអនុក្រឹត្យមួយដោយផ្តល់ដីរដ្ឋទំហំ២ ៦០០ហិកតា ដែលលាតសន្ធឹងលើស្រុកកណ្តាលស្ទឹង ខេត្តកណ្តាល និងស្រុកបាទី ខេត្តតាកែវ ឱ្យក្រុមហ៊ុនវិនិយោគអាកាសយានដ្ឋានកម្ពុជា (CAIC) វិនិយោគរួមគ្នាជាមួយសាជីវកម្មក្រៅប្រទេស និងលេខាធិការដ្ឋានអាកាសចរណ៍ស៊ីវិល ដើម្បីអភិវឌ្ឍព្រលានយន្តហោះអន្តរជាតិភ្នំពេញថ្មីមួយ៕
ពលរដ្ឋអ្នកសារព័ត៌មាន CCIM
