គណៈកម្មាធិការជាតិប្រឆាំងទារុណកម្មរបស់រដ្ឋាភិបាល ស្នើអគ្គស្នងការដ្ឋាននគរបាលជាតិបើកការស៊ើបអង្កេតបន្ថែម ដើម្បីរកការពិតនិងនាំខ្លួនមន្ត្រីពាក់ព័ន្ធមកទទួលទោស ក្រោយរកឃើញថា ការស្លាប់របស់ជនសង្ស័យម្នាក់នៅអំឡុងឃុំខ្លួននៅអធិការដ្ឋាននគរបាលស្រុកសង្កែ ខេត្តបាត់ដំបង អាចជាប់ពាក់ព័ន្ធនឹងការធ្វើទារុណកម្ម។
គណៈកម្មាធិការនេះបាននិយាយក្នុងសេចក្តីប្រកាសព័ត៌មានចុះថ្ងៃទី១៦ ខែមិថុនា ដែល VOD ទទួលបាននៅថ្ងៃនេះថា តាមការចុះស៊ើបអង្កេតនិងស្រាវជ្រាវពីករណីស្លាប់របស់ជនសង្ស័យឈ្មោះ ពេជ្រ ធារ៉េត រស់នៅភូមិបោះពោធិ៍ ឃុំអូរដំបង១ ស្រុកសង្កែ ខេត្តបាត់ដំបង ខ្លួនអាចសន្និដ្ឋានជំហានដំបូងបានថា៖
«ករណីនេះអាចមានការធ្វើទារុណកម្មស្រាលឬធ្ងន់ទៅលើជនសង្ស័យ អំឡុងពេលឃុំខ្លួនបណ្តោះអាសន្ននៅអធិការដ្ឋាននគរបាលស្រុកសង្កែ ខណៈពេលដែលជនសង្ស័យកំពុងមានអាការឡេះឡះរំខានដល់មន្ត្រីនគរបាលនៅទីនោះ»។
ស្ថាប័នជំនាញមួយនេះបានស្នើទៅអាជ្ញាធរពាក់ព័ន្ធ ពិសេសអគ្គស្នងការដ្ឋាននគរបាលជាតិបើកការស៊ើបអង្កេតបន្ថែមលើករណីនេះ ដើម្បីស្វែងរកការពិត ក៏ដូចជានាំយកអ្នកពាក់ព័ន្ធមកទទួលខុសត្រូវចំពោះមុខច្បាប់។
បើតាមគណៈកម្មាធិការនេះ ការសន្និដ្ឋានជំហានដំបូងនេះយោងទៅលើការចុះស៊ើបអង្កេតនិងស្រាវជ្រាវដល់កន្លែងកើតហេតុ ដល់លំនៅឋានជនសង្ស័យឈ្មោះ ពេជ្រ ធារ៉េត និងបានសម្ភាសភាគីពាក់ព័ន្ធ រួមមាន មន្ត្រីស្នងការដ្ឋានខេត្តបាត់ដំបង មន្ត្រីអធិការដ្ឋាននគរបាលស្រុកសង្កែ ប្រធាននគរបាលប៉ុស្តិ៍ឃុំអូរដំបង សាច់ញាតិ និងសាក្សីនៅក្បែរផ្ទះជនសង្ស័យ អនុប្រធានភូមិបោះពោធិ៍ គណៈកម្មការកោសលវិច្ច័យ តំណាងសមាគមការពារសិទ្ធិមនុស្សអាដហុកប្រចាំខេត្តបាត់ដំបង និងព្រះរាជអាជ្ញារងអមសាលាដំបូងខេត្តបាត់ដំបង។
គណៈកម្មាធិការជាតិប្រឆាំងទារុណកម្ម គូសបញ្ជាក់ថា តាមរយៈការអង្កេត ស្រាវជ្រាវ សម្ភាស និងពិនិត្យឯកសារពាក់ព័ន្ធរបស់នគរបាលយុត្តិធម៌ ក្រុមការងាររកឃើញមានចំណុចគួរឱ្យកត់សម្គាល់មួយចំនួនដែលអាចបញ្ជាក់បានថា ការស្លាប់របស់ជនសង្ស័យជាប់ពាក់ព័ន្ធនឹងការធ្វើទារុណកម្ម។
បើតាមស្ថាប័ននេះ ការបកស្រាយរបស់មន្ត្រីនៃអធិការដ្ឋាននគរបាលស្រុកសង្កែមានភាពមិនច្បាស់លាស់ដែលបានលើកឡើងថា នៅពេលឃាត់ខ្លួនជនសង្ស័យ មានប្រជាពលរដ្ឋប្រតាយប្រតប់ជនសង្ស័យ ប៉ុន្តែយោងតាមការបំភ្លឺរបស់មេប៉ុស្តិ៍នគរបាលរដ្ឋបាលឃុំអូរដំបង១ បានបញ្ជាក់ថា ពេលអ្នកឃាត់ខ្លួននិងអ្នកបណ្តើរខ្លួនជនសង្ស័យចូលក្នុងរថយន្តដឹកទៅអធិការដ្ឋាននគរបាលស្រុកសង្កែនោះ ជនសង្ស័យគ្មានស្នាមរបួសឬត្រូវបានប្រជាពលរដ្ឋវាយនោះទេ រីឯម្តាយក្មេកជនសង្ស័យក៏បានបញ្ជាក់ដែរថា គ្មាននរណាវាយជនសង្ស័យទេ។
ចំណុចកត់សម្គាល់មួយទៀត ក្នុងកំណត់ហេតុមួយចំនួនរបស់មន្ត្រីអធិការដ្ឋាននគរបាលស្រុកសង្កែ មានការកោសលុបសរសេរបន្ថែម និងមានការសរសេរឈ្មោះឱ្យជនសង្ស័យ ដោយបញ្ជាក់ពីក្រោមស្នាមមេដៃនោះថា សាម៉ីខ្លួនពុំចេះអក្សរ តែនៅពេលចុះទៅដល់ផ្ទះជនសង្ស័យ ជនសង្ស័យមានសរសេរអក្សរបិទនៅទ្វារផ្ទះ និងបានរៀនដល់ថ្នាក់ទី៧។
ចំណុចកត់សម្គាល់មួយទៀត យោងតាមការសន្និដ្ឋានរបស់គណៈកម្មការកោសលវិច្ច័យ បង្ហាញទៀតថា ជនសង្ស័យស្លាប់ដោយគាំងបេះដូង ក្រោមឥទ្ធិពលនៃការប្រើប្រាស់គ្រឿងញៀនហួសកម្រិត តែអំឡុងនៃការឃាត់ខ្លួនជនសង្ស័យ សមត្ថកិច្ចពុំបានធ្វើតេស្តរកសារធាតុញៀន រួមទាំងហេតុផលមួយចំនួនទៀតដែលមានភាពមិនប្រក្រតី។
យ៉ាងណា គណៈកម្មាធិការជាតិប្រឆាំងទារុណកម្មនេះ បង្ហាញការសោកស្តាយដែលក្រុមការងារមិនអាចពិនិត្យផ្ទាល់លើសាកសព នៅថ្ងៃទី៣ ខែមេសា ដោយសារសពត្រូវយកទៅបូជាដោយក្រុមគ្រួសារ។
កាលពីថ្ងៃទី៣ ខែមេសា ឆ្នាំ២០២១ វេលាម៉ោង១៤រសៀល នៅចំណុចផ្ទះជនសង្ស័យ ស្ថិតក្នុងភូមិបោះពោធិ៍ ឃុំអូរដំបង១ ស្រុកសង្កែ ខេត្តបាត់ដំបង មានករណីឆក់ខ្សែភ្លើងបណ្តាលឱ្យឈ្មោះ ជា ច័ន្ទរចនា ភេទស្រី អាយុ៣០ឆ្នាំ ត្រូវជាភរិយាជនសង្ស័យ បានស្លាប់នៅនឹងកន្លែងកើតហេតុ។
នៅពេលសមត្ថកិច្ចចុះពិនិត្យដល់កន្លែងកើតហេតុ ដើម្បីអនុវត្តជំនាញនិងធ្វើកោសលវិច្ច័យ ក៏ទទួលបានតម្រុយឈានទៅឃាត់ខ្លួនជនសង្ស័យឈ្មោះ ពេជ្រ ធារ៉េត អាយុ៣៩ឆ្នាំ នៅវេលាម៉ោង១៥និង៣០នាទី ហើយបានបញ្ជូនខ្លួនទៅសាកសួរបន្តនៅអធិការដ្ឋាននគរបាលស្រុកសង្កែ។
តាមលិខិតដដែល នៅវេលាម៉ោង១៩ ថ្ងៃដដែល ជនសង្ស័យត្រូវបានសមត្ថកិច្ចនាំទៅសង្គ្រោះបន្ទាន់នៅប៉ុស្តិ៍សុខភាពនៃស្នងការដ្ឋាននគរបាលខេត្តបាត់ដំបង ប៉ុន្តែជនសង្ស័យបានស្លាប់មុនដល់កន្លែងកំណត់។
ការចុះស៊ើបអង្កេតរបស់គណៈកម្មាធិការជាតិប្រឆាំងទារុណកម្មនេះ ក្រោយពីក្រុមគ្រួសារជនសង្ស័យបានដាក់ពាក្យប្តឹងទៅក្រសួងមហាផ្ទៃ កាលពីថ្ងៃ៧ ខែមេសា ឆ្នាំ២០២១។
បងស្រីបង្កើតជនសង្ស័យ អ្នកស្រី ពេជ្រ លីណា នៅថ្ងៃចន្ទនេះ បានទទូចឱ្យអគ្គស្នងការដ្ឋាននគរបាលជាតិពន្លឿនចាប់មន្ត្រីខិលខូចយកទៅផ្តន្ទាទោសតាមច្បាប់ ដើម្បីទប់ស្កាត់កុំឱ្យមានការធ្វើទារុណកម្មលើមនុស្សដទៃទៀត។
អ្នកស្រីថា៖ «ខ្ញុំចង់ឱ្យច្បាប់ដាក់ទោសឱ្យសមទៅនឹងទង្វើដែលពួកគាត់ធ្វើមកលើប្អូនខ្ញុំ គាត់ត្រឹមជាជនសង្ស័យសោះ យកគាត់ទៅសួរចម្លើយរហូតស្លាប់។ ហើយស្លាកស្លាមហ្នឹងគឺជាការធ្វើទារុណកម្ម ដោយសារមានឈាមតាមច្រមុះ តាមត្រចៀក បែកក្បាល បែកមាត់ និងស្នាមកន្លែងដាក់ខ្នោះ ភ្លៅ ក គឺវាយសុះអស់»។
អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន មានប្រសាសន៍ថា កម្លាំងជំនាញបានបន្តនីតិវិធីហើយ ប៉ុន្តែដំណាក់កាលនៃការចុះស៊ើបអង្កេតនេះ កម្លាំងជំនាញមិនអាចបង្ហាញអត្តសញ្ញាណមន្ត្រីពាក់ព័ន្ធបានទេ។
លោកថា៖ «ស៊ើបអង្កេត គេចាប់ផ្តើមស៊ើបអង្កេតហើយ។ បើសួរនីតិវិធីដល់ណា ខ្ញុំម៉េចហ៊ានប្រាប់! បើគេកំពុងស៊ើបអង្កេត។ ឱ្យខ្ញុំឆ្លើយថាមាន៣នាក់ឬ៤នាក់អ៊ីចឹង អត់បានទេ»។
អធិការនគរបាលស្រុកសង្កែ លោក ស៊ុន សុវណ្ណ នៅតែប្រកាន់ជំហរថា មន្ត្រីរបស់លោកមិនបានធ្វើទារុណកម្មលើជនសង្ស័យដូចការចោទប្រកាន់នោះទេ។
លោកថា៖ «ខាងខ្ញុំដូចគ្មានអ្វីទេ ដូចគេចុះមកស្រាវជ្រាវអ៊ីចឹង ខាងខ្ញុំនៅតែដដែល សម័យឥលូវទៅធ្វើទារុណកម្មម៉េច»។
យ៉ាងណា អ្នកសម្របសម្រួលសមាគមការពារសិទ្ធិមនុស្សអាដហុកប្រចាំខេត្តបាត់ដំបង លោក យិន ម៉េងលី យល់ថា ការធ្វើទារុណកម្មទៅលើជនសង្ស័យណាមួយ ហើយគប់គិតគ្នាធ្វើរបាយការណ៍បន្លំភ្នែកមហាជន ជាការប្រមាថដល់អាយុជីវិតមនុស្ស ហើយទង្វើនេះបានប្រាសចាកពីក្របខណ្ឌច្បាប់ដែលរដ្ឋាភិបាលត្រូវតែលុបបំបាត់ ដើម្បីពង្រឹងនីតិរដ្ឋ។
យ៉ាងណា លោកផ្តល់ជាយោបល់ថា វិធានការទប់ស្កាត់មន្ត្រីខិលខូច ដើម្បីកាត់ផ្តាច់អំពើទារុណកម្មក្នុងវិស័យយុត្តិធម៌ ត្រូវធ្វើជាប្រព័ន្ធ មិនអាចពឹងតែគណៈកម្មាធិការជាតិប្រឆាំងទារុណកម្មនេះមួយបានទេ។
លោកថា៖ «តុលាការត្រូវហ៊ានវះកាត់ជាមួយនឹងមន្ត្រីយុត្តិធម៌ បើតុលាការខ្លាចមិនហ៊ានវះកាត់ តុលាការលោកមិននៅជាបុគ្គលឯករាជ្យទេ លោកខ្លាចមន្ត្រីគាត់ខឹង អ៊ីចឹងការកាត់បន្ថយអំពើធ្វើទារុណកម្មមិនអាចថយចុះបានទេ»។
មាត្រា២១០ បទទារុណកម្ម និងអំពើឃោរឃៅ នៃក្រមព្រហ្មទណ្ឌរបស់កម្ពុជា ចែងថា «ទារុណកម្មឬអំពើឃោរឃៅ ដែលប្រព្រឹត្តទៅលើបុគ្គលណាមួយ ត្រូវផ្តន្ទាទោសដាក់ពន្ធនាគារពី៧ឆ្នាំទៅ១៥ឆ្នាំ»៕