ប្រជានេសាទមួយចំនួនរស់នៅភូមិជម្ពូខ្មៅ ឃុំទួលទទឹង ស្រុកព្រៃនប់ ខេត្ដព្រះសីហនុ ស្នើឱ្យអាជ្ញាធរមានវិធានការទប់ស្កាត់បុគ្គលទុច្ចរិតមួយចំនួនដែលបានចូលកាប់ទន្ទ្រានព្រៃកោងកាងយកទៅធ្វើជាកម្មសិទ្ធិឯកជនដោយបំពានច្បាប់ និងធ្វើឱ្យប៉ះពាល់ដល់ជីវភាពរស់នៅប្រចាំថ្ងៃរបស់ពួកគាត់។
ប្រធានសហគមន៍នេសាទជម្ពូខ្មៅ លោក ទេព កុសល ប្រាប់ពលរដ្ឋអ្នកសារព័ត៌មានថា លោកព្រួយបារម្ភជាខ្លាំងចំពោះការបាត់បង់ព្រៃកោងកាងដែលជាជម្រកជីវចម្រុះរបស់ប្រជានេសាទនៅតំបន់នេះ។ លោកស្នើឱ្យអាជ្ញាធរសមត្ថកិច្ចពាក់ព័ន្ធជួយទប់ស្កាត់និងអនុវត្ដច្បាប់ឱ្យបានម៉ត់ចត់ ដោយមិនត្រូវលើកលែងឱ្យជនប្រព្រឹត្ដខុសរួចខ្លួនឡើយ។
លោកបន្ដថា៖ «ព្រៃកោងកាងនៅជម្ពូខ្មៅនេះ ត្រូវបានរងការកាប់បំផ្លាញជាច្រើនលើកច្រើនសារ ហើយក៏ត្រូវបានអាជ្ញាធរមូលដ្ឋាននិងសមត្ថកិច្ចជំនាញរដ្ឋបាលជលផលខេត្ដព្រះសីហនុចុះមកបង្រ្កាបជាបន្ដបន្ទាប់ ប៉ុន្ដែហាក់បីដូចជាគ្មានប្រសិទ្ធភាព»។
មេភូមិជម្ពូខ្មៅ លោក ផុង រិទ្ធិ ប្រាប់ពលរដ្ឋអ្នកសារព័ត៌មាន CCIM ដែរថា លោករីករាយចូលរួមសហការនិងការពារព្រៃកោងកាងនេះ ព្រោះវាមានសារៈសំខាន់ចំពោះប្រជាពលរដ្ឋ ដូចជា ការពារទឹកប្រៃចូលស្រែ និងជម្រកត្រីបន្ដពូជ និងជីវចម្រុះ សម្រាប់ប្រជានេសាទអាស្រ័យផល។
មេភូមិរូបនេះបន្តថា៖ «ចំពោះការកាប់បំផ្លាញព្រៃកោងកាងនេះ ពលរដ្ឋរស់នៅតំបន់នេះមិនមានការកាប់ទន្ទ្រាននោះទេ ភាគច្រើនជាមនុស្សមកពីក្រៅស៊ីឈ្នួលក្រុមហ៊ុន ឬអ្នកមានលុយមានអំណាចមួយចំនួន។ ហើយអាជ្ញាធរមូលដ្ឋានពិបាកក្នុងការហាមឃាត់ពួកគេ ដោយសារពួកគេលួចធ្វើនៅពេលយប់ ឬពេលចន្លោះម៉ោងសម្រាកជាដើម»។
កាលពីខែកុម្ភៈ ឆ្នាំ២០២១ នាយរងខណ្ឌរដ្ឋបាលជលផលកំពង់សោម លោក ឯម ភា បានចេញលិខិតកោះហៅអ្នកជាប់ពាក់ព័ន្ធមកធ្វើការបកស្រាយចំពោះករណីកាប់បំផ្លាញព្រៃកោងកាងនេះ។ តែរហូតមកដល់ពេលនេះ ពុំទាន់មានរបាយការណ៍ព័ត៌មានពីមន្ដ្រីជំនាញបញ្ជាក់ពីចំណាត់ការយ៉ាងណានៅឡើយទេ៕
ពលរដ្ឋអ្នកសារព័ត៌មានខេត្តព្រះសីហនុ លោក សុខ សុខុម