មេដឹកនាំអតីតគណបក្សប្រឆាំង លោក កឹម សុខា សម្តែងការសោកស្តាយ និងចូលរួមរំលែកទុក្ខជាថ្មីម្តងទៀត ជាមួយក្រុមគ្រួសាររបស់លោកបណ្ឌិត កែម ឡី ក្នុងខួប៥ឆ្នាំនៃឃាតកម្មទៅលើលោកបណ្ឌិត។
នៅថ្ងៃទី១០ ខែកក្កដា ឆ្នាំ២០២១នេះ ជាថ្ងៃខួប៥ឆ្នាំ ដែលលោកបណ្ឌិត កែម ឡី អ្នកស្រាវជ្រាវការអភិវឌ្ឍសង្គម ត្រូវបានខ្មាន់កាំភ្លើងបាញ់សម្លាប់ នៅស្ដារម៉ាត (Star Mart) ក្នុងស្ថានីយលក់ប្រេងឥន្ធនៈកាល់តិច (Caltex) ក្នុងខណ្ឌចំការមន រាជធានីភ្នំពេញ។
លោក កឹម សុខា ប្រធានអតីតគណបក្សសង្គ្រោះជាតិ បានសរសេរជូនលោកស្រី ប៊ូ រចនា ភរិយាលោកបណ្ឌិត កែម ឡី នៅលើទំព័រហ្វេសប៊ុករបស់លោកនៅថ្ងៃនេះថា រូបលោក និងលោកបណ្ឌិតកែម ឡី មិនមែនត្រឹមតែមានស្រុកកំណើតជាមួយគ្នា នៅស្រុកត្រាំកក់ ខេត្តតាកែវ នោះទេ អ្នកទាំងពីរក៏ជាអ្នកជនបទដែលបានតស៊ូរៀនសូត្រ រស់នៅ បានស្គាល់ពីសង្គមពិត និងជីវិតអ្នកក្រីក្រ អ្នករងគ្រោះដូចគ្នាផងដែរ។
លោក កឹម សុខា បានរំលឹកនូវទស្សនៈតាមរយៈការផ្លាស់ប្តូរយោបល់ រវាងរូបលោក និងលោកបណ្ឌិត កែម ឡី កាលនៅមានជីវិតនោះថា ៖ «យើងអាចមានចក្ខុវិស័យ គោលបំណង និង គោលការណ៍ដូចគ្នាច្រើនទៀត ដើម្បីអធិបតេយ្យភាព ឯករាជ្យ ឯកភាពជាតិខ្មែរ និង ដើម្បីសិទ្ធិ សេរីភាព យុត្តិធម៌ សុខមាលភាពរបស់ប្រជាពលរដ្ឋខ្មែរ ដោយប្រកាន់យកនូវគោលការណ៍អហិង្សា មិនយកខ្មែរណាជាសត្រូវ»។
ករណីនេះ លោក កឹម សុខា បានបង្ហាញការសោកស្តាយ និងចូលរួមរំលែកទុក្ខជាថ្មីម្តងទៀត ចំពោះក្រុមគ្រួសារសព លោកបណ្ឌិត កែម ឡី ក្នុងឱកាសខួប៥ឆ្នាំនៃមរណភាពរបស់លោកបណ្ឌិត៕
