រដ្ឋាភិបាលថៃបានអនុញ្ញាតឱ្យពលករបរទេស រួមទាំងពលករកម្ពុជាផង បន្ដស្នាក់នៅនិងធ្វើការដោយស្របច្បាប់រហូតដល់ឆ្នាំក្រោយ ប៉ុន្ដែក៏មានពលករកម្ពុជាផ្សេងទៀតបានបង្ខំចិត្តត្រឡប់មកស្រុកកំណើតវិញ អំឡុងផ្ទុះជំងឺកូវីដ-១៩។
កាលពីសប្ដាហ៍មុន កាសែតបាងកកប៉ុស្ដិ៍បានដកស្រង់សម្ដីរដ្ឋមន្ដ្រីក្រសួងការងារថៃ លោក Suchart Chomklin មកចុះផ្សាយថា គណៈរដ្ឋមន្ដ្រីថៃបានយល់ព្រមលើសំណើដែលស្នើសុំឱ្យមានការអនុញ្ញាតសម្រាប់ពលករបរទេសមកពីប្រទេសកម្ពុជា ឡាវ និងមីយ៉ាន់ម៉ា អាចបន្ដស្នាក់នៅនិងធ្វើការក្នុងប្រទេសនេះរហូតដល់ថ្ងៃទី២៧ ខែកក្កដា ឆ្នាំ២០២១។
បើតាមកាសែតបាងកកប៉ុស្ដិ៍ វិបត្តិកូវីដ-១៩ក្នុងប្រទេសថៃបានប៉ះពាល់ដល់ការងារ និងការផុតសុពលភាពបណ្ណការងាររបស់ពលករបរទេស ខណៈពួកគេមិនអាចរកការងារថ្មីបានធ្វើក្នុងរយៈពេល៣០ថ្ងៃដែលតម្រូវដោយច្បាប់។
រដ្ឋមន្ដ្រីក្រសួងការងារថៃ លោក Suchart Chomklin អះអាងថា នេះគឺជាការយកចិត្តទុកដាក់របស់រដ្ឋាភិបាលថៃទៅលើពលករបរទេស ដើម្បីកុំឱ្យពួកគេក្លាយជាពលកររស់នៅនិងធ្វើការខុសច្បាប់ក្នុងប្រទេសនេះ អំឡុងការរីករាលដាលនៃជំងឺកូវីដ-១៩។
ប៉ុន្ដែកាសែតបាងកកប៉ុស្ដិ៍បានចុះផ្សាយកាលពីថ្ងៃទី១៤ ខែកក្កដាផងដែរថា មានពលករកម្ពុជាជាង២ពាន់នាក់បានវិលត្រឡប់មកស្រុកកំណើតវិញ បន្ទាប់ពីនាយករដ្ឋមន្ដ្រីថៃ លោក ប្រាយុទ្ធ ចាន់អូចា បានចេញវិធានការមួយកាលពីថ្ងៃទី២៨ ខែមិថុនា ឆ្នាំ២០២១ ដោយបិទតំបន់ការដ្ឋានសំណង់របស់ពលករបរទេសនៅទីក្រុងបាងកក និងតំបន់ជុំវិញ។ វិធានការនេះក៏បានបង្ខំឱ្យពលករបរទេសដែលស្នាក់នៅក្រៅតំបន់បិទខ្ទប់ សម្រេចចិត្តភៀសទៅស្រុកកំណើតវិញចន្លោះពី១០០ ទៅ១៥០នាក់ក្នុងមួយថ្ងៃ។
មន្ត្រីសម្របសម្រួលផ្នែកពលករចំណាកស្រុក នៃអង្គការសង់ត្រាល់ ប្រចាំប្រទេសថៃ លោក លឹង សុផុន មានប្រសាសន៍ថា ក្រោយពីរដ្ឋាភិបាលថៃបានបិទខ្ទប់តំបន់ការដ្ឋានសំណង់នាពេលកន្លងមក ពលករបរទេស ពិសេសពលករខ្មែរជាច្រើនសែននាក់ បានរងគ្រោះដោយសារដាច់ស្បៀងអាហារហូបចុកនិងសម្ភារប្រើប្រាស់ប្រចាំថ្ងៃ។
អង្គការសង់ត្រាល់ កត់សម្គាល់ផងដែរថា ពលករខ្មែរភាគច្រើនប្រឈមការខ្វះស្បៀង រងការបណ្តេញចេញពីការងារ ការរើសអើង និងផុតកំណត់វីសារ ដោយសារស្ថានភាពកូវីដ-១៩ នៅប្រទេសថៃកំពុងកើនឡើងនិងចេះតែធ្ងន់ធ្ងរ។
អង្គការសង់ត្រាល់ បន្ដថា ចាប់តាំងពីរដ្ឋាភិបាលថៃប្រកាសបិទខ្ទប់តំបន់មួយចំនួនមក មិនមានថៅកែក្រុមហ៊ុនសំណង់ឬភាគីរដ្ឋណាមួយជួយជ្រោមជ្រែងពលករខ្មែរឡើយ ដោយទុកពួកគេចោល និងមិនបានជួយផ្តល់កញ្ចប់ស្បៀងអាហារនិងជំនួយសង្គមផ្សេងៗឡើយ៕
ពលរដ្ឋអ្នកសារព័ត៌មាន CCIM លោក ប៉ាន បូរិន