អង្គការអន្ដរជាតិមួយទាមទារឱ្យអាជ្ញាធរកម្ពុជាដោះលែងអ្នកសារព័ត៌មានឱ្យមានសេរីភាពវិញ បន្ទាប់ពីពួកគេបានផ្សាយព័ត៌មានអំពីជំងឺកូវីដ-១៩ ហើយថា រដ្ឋាភិបាលប្រើលេសនេះដើម្បីបិទមិនឱ្យមានសំឡេងប្រឆាំងនឹងខ្លួន។
ក្នុងសេចក្ដីថ្លែងការណ៍ចុះថ្ងៃទី២១ ខែកក្កដា ឆ្នាំ២០២១ អ្នកសារព័ត៌មានគ្មានព្រំដែន ឬ Reporters with Borders ទាមទារឱ្យអាជ្ញាធរកម្ពុជាដោះលែងអ្នកសារពត៌មានមួយរូប គឺលោក កៅ ពិសិដ្ឋ ដែលអាចត្រូវរងការផ្ដន្ទាទោសដាក់ពន្ធនាគាររយៈពេល៥ឆ្នាំ ជុំវិញការរិះគន់លើវ៉ាក់សាំងបង្ការជំងឺកូវីដ-១៩។
អ្នកសារព័ត៌មានគ្មានព្រំដែន និយាយក្នុងសេចក្ដីថ្លែងការណ៍របស់ខ្លួនថា រដ្ឋាភិបាលកំពុងប្រើលេសទប់ស្កាត់ជំងឺកូវីដ-១៩ ទៅបំបិទសំឡេងអ្នករិះគន់តែប៉ុណ្ណោះ។
ក្នុងសេចក្ដីថ្លែងការណ៍ អ្នកសារព័ត៌មានគ្មានព្រំដែន បញ្ជាក់ថា៖ «លោក កៅ ពិសិដ្ឋ នេះ គឺជាជនរងគ្រោះចុងក្រោយ ក្រោមប្រព័ន្ធដឹកនាំរបស់លោក ហ៊ុន សែន ដើម្បីយកលេសបង្ក្រាបក្រុមអ្នករិះគន់ដែលហ៊ានផ្សព្វផ្សាយព័ត៌មានអំពីជំងឺកូវីដ-១៩»។
សមត្ថកិច្ចខេត្តបាត់ដំបង បានចាប់ខ្លួនលោក កៅ ពិសិដ្ឋ កាលពីថ្ងៃទី១៤ ខែកក្កដា ឆ្នាំ២០២១ បន្ទាប់ពីអ្នកសារព័ត៌មានរូបនេះបានសរសេរសារនៅលើហ្វេសប៊ុករិះគន់អំពីវិធានការទប់ស្កាត់ជំងឺកូវីដ-១៩ កាលពីថ្ងៃទី១២ ខែកក្កដា ដោយសុំឱ្យសហគមន៍អន្តរជាតិជួយអន្ដរាគមន៍។ លោកត្រូវបានចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» និងពុំទាន់មានមេធាវីការពារក្តីនៅឡើយទេ។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា លោក ណុប វី ប្រាប់ពលរដ្ឋអ្នកសារព័ត៌មាន CCIM ថា លោកគាំទ្រឱ្យមានការដោះលែងអ្នកសារព័ត៌មាន ដោយថា ពួកគេគ្រាន់តែអនុវត្តសិទ្ធិសារព័ត៌មាននិងសិទ្ធិក្នុងការបញ្ចេញមតិដែលធានាដោយច្បាប់ជាតិនិងអន្ដរជាតិប៉ុណ្ណោះ។
លោកថា៖ «ខ្ញុំយល់ថា សមត្ថកិច្ចគួរតែដោះលែងលោក ពិសិដ្ឋ ដោយសារតែគាត់គ្រាន់តែបានបញ្ចេញយោបល់ផ្ទាល់ខ្លួនក្នុងនាមជាពលរដ្ឋខ្មែរម្នាក់ប៉ុណ្ណោះ។ គាត់មិនបានធ្វើអ្វីខុសច្បាប់នោះទេ។ ក្នុងសង្គមប្រជាធិបតេយ្យ ពលរដ្ឋមានសិទ្ធិបញ្ចេញមតិ។ មួយវិញទៀត គាត់បានរិះគន់អ្នកដឹកនាំ ដែលជាការពិត អ្នកដឹកនាំគួរតែពិចារណា បើចំណុចណាល្អ គួរទទួលយក ចំណុចណាមិនល្អ គួរតែកុំទទួលយក»។
ក្នុងរបាយការណ៍របស់ខ្លួនស្ដីពី «សន្ទស្សន៍សេរីភាពពិភពលោកឆ្នាំ២០២១» ចេញផ្សាយកាលពីខែមេសា ឆ្នាំ២០២១នេះ អង្គការអ្នកកាសែតគ្មានព្រំដែន បានទម្លាក់ចំណាត់ថ្នាក់សេរីភាពសារព័ត៌មាននៅកម្ពុជានៅលេខ១៤៤ ក្នុងចំណោម១៨០ប្រទេសនៅលើពិភពលោក ពោលគឺធ្លាក់ចុះ៣ឆ្នាំជាប់ៗគ្នាតាំងពីឆ្នាំ២០១៧មក។
ក្នុងរបាយការណ៍របស់ខ្លួនដដែល អង្គការអ្នកកាសែតគ្មានព្រំដែន បានចោទរដ្ឋាភិបាលកម្ពុជាថាបានយកលេសជំងឺកូវីដ-១៩ បំបិទសិទ្ធិសេរីភាពសារព័ត៌មាននៅក្នុងប្រទេស ដូចជា ការបិទគេហទំព័រព័ត៌មានអនឡាញ ការចាប់ខ្លួនអ្នកកាសែត និងវិធានការដាក់ប្រទេសក្នុងភាពអាសន្ន ដែលបានផ្ដល់អំណាចលើសលុបដល់រដ្ឋាភិបាលក្នុងការត្រួតពិនិត្យនិងតាមដានលើប្រព័ន្ធផ្សព្វផ្សាយ៕
ពលរដ្ឋអ្នកសារព័ត៌មាន CCIM លោក ប៉ាន បូរិន