លោកនាយករដ្ឋមន្ត្រី ហ៊ុន សែន ច្រានចោលទៅលើការវិភាគមួយចំនួនដែលថា ការឆ្មក់ចូលក្នុងកិច្ចប្រជុំតាមប្រព័ន្ធ Zoom ដើម្បីនិយាយតទល់ជាមួយមនុស្សជំនិតនឹងលោក សម រង្ស៊ី នាពេលថ្មីៗនេះ មិនមែនជាការស្វែងរកការចរចានយោបាយណាមួយ ឬខ្លាចសម្ពាធអន្តរជាតិនោះទេ។
កាលពីថ្ងៃទី៩ ខែកញ្ញា ឆ្នាំ២០២១នេះ កិច្ចប្រជុំមួយនៅឯក្រៅប្រទេសតាមប្រព័ន្ធបណ្តាញសង្គម Zoom ដែលរៀបចំឡើងដោយលោក ឡុង រី ត្រូវបានគេស្គាល់ថាជាមនុស្សជំនិតនឹងលោក សម រង្ស៊ី ប្រធានអតីតគណបក្សសង្គ្រោះជាតិ។ តែកិច្ចប្រជុំផ្ទៃក្នុងនោះក៏មានការភ្ញាក់ផ្អើល ដោយសារតែគេប្រទះឃើញលោកនាយករដ្ឋមន្ត្រី ហ៊ុន សែន បង្ហាញមុខ និយាយជាមួយលោក ឡុង រី រួមទាំងរំឭកការដែលលោកធ្លាប់បង្កើតវប្បធម៌សន្ទនាជាមួយលោក សម រង្ស៊ី ផងដែរ។
ចាប់ពីពេលនោះមក ទាំងលោក សម រង្ស៊ី និងអ្នកវិភាគមួយចំនួនបានធ្វើការអត្ថាធិប្បាយថា ការដែលលោកនាយករដ្ឋមន្ត្រី ហ៊ុន សែន ឆ្មក់ចូលក្នុងកិច្ចប្រជុំផ្ទៃក្នុងរបស់ក្រុមអ្នកនយោបាយជំទាស់នេះ អាចជាសញ្ញាវិជ្ជមានទៅរកការចរចានយោបាយដើម្បីផ្សះផ្សាជាតិឡើងវិញ ខណៈសហគមន៍អន្តរជាតិដែលនាំមុខគេដោយសហរដ្ឋអាមេរិកនិងសហភាពអឺរ៉ុប កំពុងទាមទារឱ្យកម្ពុជាវិលទៅស្តារប្រជាធិបតេយ្យវិញ ក្រោយមានការរំលាយគណបក្សសង្គ្រោះជាតិចេញពីឆាកនយោបាយជាង៤ឆ្នាំមកនេះ។
ជាការឆ្លើយតប លោកនាយករដ្ឋមន្ត្រី ហ៊ុន សែន នៅព្រឹកថ្ងៃទី១៦ ខែកញ្ញា ឆ្នាំ២០២១នេះ បានសរសេរសារនៅលើហ្វេសប៊ុករបស់លោកថា ការចូលក្នុងកិច្ចប្រជុំតាម Zoom នៅពេលនោះ ជាការផ្ញើសារថា កន្លែងណាក៏មានមនុស្សរបស់លោក ហ៊ុន សែន ដែរ។
លោកបានគូសបញ្ជាក់ថា គ្មានការចរចានយោបាយណាមួយត្រូវធ្វើឡើងទេ ហើយអ្វីដែលត្រូវធ្វើនោះ គឺអ្នកមានទោសត្រូវជាប់ពន្ធនាគារឱ្យបាន២ភាគ៣សិន ចាំគិតដល់ការលើកលែងទោស ឬបន្ធូរបន្ថយទោស។
លោកថា៖ «សូមឈប់ស្រមើស្រមៃថា បក្សដែលតុលាការរំលាយនឹងរស់ឡើងវិញ! ហ៊ុន សែន នឹងលើកលែងទោសឱ្យ! ហ៊ុន សែន នឹងបើកការចរចារកដំណោះស្រាយនយោបាយ! ហ៊ុន សែន ខ្លាចអន្តរជាតិ។ល។ សង្ឃឹមថា ការបកស្រាយនេះនឹងឱ្យអ្នកវិភាគល្ងង់ទូ និងអ្នករង់ចាំការយោគយល់ពី ហ៊ុន សែន ឬ ហ៊ុន សែន ភ័យខ្លាច បានភ្លឺស្វាងឡើងវិញ បន្ទាប់ពីសន្លប់ធំអស់ប៉ុន្មានថ្ងៃក្រោយ Zoom»។
យ៉ាងណា ការលើកឡើងនេះហាក់បានឆ្លើយតបទៅនឹងការថ្លែងរបស់លោក សម រង្ស៊ី ក្នុងពិធីសំណេះសំណាលជាមួយអ្នកគាំទ្រនៅទីក្រុងឡុងប៊ិច (Long Beach) រដ្ឋកាលីហ្វរញ៉ា (California) សហរដ្ឋអាមេរិក កាលពីថ្ងៃទី១២ ខែកញ្ញា ឆ្នាំ២០២១។
ក្នុងពិធីនោះ លោក សម រង្ស៊ី បាននិយាយថា នៅឆ្នាំ២០១៤ លោក ហ៊ុន សែន ធ្លាប់ប្រាប់លោកឱ្យគណបក្សសង្គ្រោះជាតិ ស្នើច្បាប់កុំកាត់ទោសមេដឹកនាំកំពូល ៣រូប ក្នុងជួរគណបក្សប្រជាជនកម្ពុជា ពេលបាត់បង់អំណាច ដែលថា ក្នុងនោះមានប្រធានព្រឹទ្ធសភា ប្រធានរដ្ឋសភា និងនាយករដ្ឋមន្ត្រី។
មួយវិញទៀត លោកថា លោក ហ៊ុន សែន បច្ចុប្បន្នកំពុងព្រួយបារម្ភពីការបាត់បង់អំណាចទៅលើបញ្ហាធំ៣ រួមមាន បញ្ហាវ័យកាន់តែចាស់ ការផ្ទេរតំណែងទៅកូន និងសម្ពាធអន្តរជាតិ ទៅលើការប្រកួតប្រជែងភូមិសាស្ត្រនយោបាយ ដែលការនេះ លោក សម រង្ស៊ី ថាការឆ្មក់ចូលប្រជុំជាមួយក្រុមលោក ឡុង រី អាចជាការបោះដៃ ដើម្បីស្វែងរកការចរចានយោបាយ។
លោកថា៖ «គាត់និយាយនេះ ហាក់ដូចជាគាត់ចង់បង្ហាញថា គាត់អត់មានអ្វីដែលត្រូវរារាំងមិនឱ្យយើងជជែកគ្នារាប់អានគ្នា ដើម្បីរកច្រកណាមួយចេញ […] ហើយខ្ញុំសូមឆ្លើយទៅវិញ ឆ្លើយតាម ឡុង រី ថាខ្ញុំឥតមានអីជំទាស់ទេ»។
នាយករងអង្គការឃ្លាំមើលសិទ្ធិមនុស្សលីកាដូ លោក អំ សំអាត មានប្រសាសន៍ថា អ្នកនយោបាយតែងតែស្វែងរកប្រៀបពីគ្នាទៅវិញទៅមក ដើម្បីទាក់ទាញប្រជាប្រិយភាព។ ប៉ុន្តែលោកផ្តល់ជាយោបល់ថា ដើម្បីធានាផលប្រយោជន៍ជាតិ មានតែវិលទៅរកការផ្សះផ្សាជាតិ ហើយចាប់ផ្តើមប្រកួតអំណាចគ្នាតាមគន្លងប្រជាធិបតេយ្យក្រោមដំបូលរដ្ឋធម្មនុញ្ញទេ ទើបមានការគាំទ្រពីប្រជាពលរដ្ឋនិងសហគមន៍អន្តរជាតិ។
លោកថា៖ «ខ្ញុំគិតថា វាល្មមដល់ពេលអ្នកនយោបាយដែលមានភាពចាស់ទុំហ្នឹង គួរតែគិតអំពីឧត្តមប្រយោជន៍ជាតិ ឧត្តមប្រយោជន៍ប្រជាពលរដ្ឋជាធំ ហើយរកវិធីយ៉ាងណាដើម្បីការឯកភាពជាតិ ហើយប្រកួតប្រជែងអំណាចតាមបែបប្រជាធិបតេយ្យ។ អាហ្នឹងជារឿងល្អបំផុតសម្រាប់កម្ពុជា វាល្អទាំងស្ថានភាពនយោបាយ ល្អទាំងស្ថានភាពសិទ្ធិមនុស្ស ហើយកម្ពុជាទទួលបានផលចំណេញដែរ»។
មាត្រា៥២ នៃរដ្ឋធម្មនុញ្ញចែងថា៖ «រាជរដ្ឋាភិបាលកម្ពុជា ប្តេជ្ញារក្សាការពារអធិបតេយ្យ បូរណភាពទឹកដីនៃព្រះរាជាណាចក្រកម្ពុជា អនុវត្តនយោបាយបង្រួបបង្រួមជាតិ ដើម្បីការពារការឯកភាពជាតិ […] រដ្ឋយកចិត្តទុកដាក់ជាអាទិភាពចំពោះជីវភាពរស់នៅ និងសុខុមាលភាពរបស់ប្រជាពលរដ្ឋ»៕