រដ្ឋបាលខេត្តព្រះសីហនុ បានសម្រចផ្អាកជាបណ្ដោះអាសន្ននូវដំណើរការមួយផ្នែកនៃរោងចក្រស្រាបៀរអង្គររយៈពេល១៤ថ្ងៃ បន្ទាប់ពីការរកឃើញកម្មករមួយចំនួនបានឆ្លងជំងឺកូវីដ-១៩។
យោងតាមសេចក្ដីជូនដំណឹងរបស់រដ្ឋបាលខេត្តព្រះសីហនុ ចុះថ្ងៃទី១៥ ខែកញ្ញា បានសម្រេចផ្អាកដំណើរការមួយផ្នែកនៃរោងចក្រស្រាបៀរអង្គរនេះ ដោយគិតចាប់អនុវត្តពីថ្ងៃទី១៥ ខែកញ្ញា ឆ្នាំ២០២១ តទៅ ក្រោយពីក្រុមឆ្លើយតបបន្ទាន់នៃមន្ទីរសុខាភិបាលខេត្ត បានយកសំណាកពីបុគ្គលិក-កម្មករបម្រើការងារនៅរោងចក្រស្រាបៀរអង្គរ ហើយលទ្ធផលបញ្ជាក់ថា មានវិជ្ជមានមេរោគកូវីដ-១៩។
យោងតាមសេចក្ដីជូនដំណឹងដដែលនេះ បានតម្រូវឱ្យលោកនាយកក្រុមហ៊ុនស្រាបៀរកម្ពុជា ខេមប្រ៊ូ (ស្រាបៀរអង្គរ) សហការជាមួយក្រុមការងារនៃមន្ទីការងារ ស្វែងរកអ្នកដែលមានការពាក់ព័ន្ធជាមួយអ្នកវិជ្ជមានកូវីដ-១៩ តាមការកំណត់។
បន្ថែមពីនេះ លោកនាយករោងចក្រត្រូវទទួលខុសត្រូវរៀបចំកន្លែងធ្វើចត្តាឡីស័ក និងផ្គត់ផ្គង់ជីវភាពប្រចាំថ្ងៃចំពោះបុគ្គលិក-កម្មករចំនួន ៥០% នៃបុគ្គលិកទាំងអស់នៅក្នុងរោងចក្រ ដើម្បីបន្តសង្វាក់ផលិតកម្មដោយត្រូវផ្អាកការចេញចូលរោងចក្រ រង់ចាំរហូតដល់ការធ្វើវិភាគវត្ថុសំណាកចំពោះអ្នកដែលមានការពាក់ព័ន្ធបានគ្រប់ៗគ្នា និងមានលទ្ធផលជាផ្លូវការ ទើបអាចបញ្ចប់ការធ្វើចត្តាឡីស័កតាមការសម្រេចរបស់រដ្ឋបាលខេត្តព្រះសីហនុ។
នៅថ្ងៃទី១៦ ខែកញ្ញានេះ រដ្ឋបាលខេត្តព្រះសីហនុ ដែលជាខេត្តទេសចរណ៍មាត់សមុទ្រ បានបន្តដាក់វិធានការរដ្ឋបាលរយៈពេល១៤ថ្ងៃបន្ថែមទៀត ចាប់ពីម៉ោងសូន្យ ថ្ងៃទី១៧ ខែកញ្ញា រហូតដល់ថ្ងៃទី៣០ ខែកញ្ញា ឆ្នាំ២០២១ ក្នុងគោលបំណងដើម្បីទប់ស្កាត់ការឆ្លងជំងឺកូវីដ-១៩ ឱ្យមានប្រសិទ្ធភាព៕
