ធនាគារកណ្ដាលដែលគ្រប់គ្រងដោយក្រុមតាលីបង់ ឱ្យដឹងថា ខ្លួនបានរឹបអូសសាច់ប្រាក់និងមាសដែលមានតម្លៃសរុបចំនួន១២,៤លានដុល្លារពីអតីតមន្រ្តីរដ្ឋាភិបាលជាន់ខ្ពស់មួយចំនួនកាលពីថ្ងៃពុធ រួមទាំងអតីតអនុប្រធានាធិបតី លោក Amrullah Saleh ផងដែរ។
ទីភ្នាក់ងារសារព័ត៌មាន Reuters បានស្រង់ការលើកឡើងរបស់ធនាគារកណ្តាលនៅក្នុងសេចក្តីថ្លែងការណ៍មួយថា សាច់ប្រាក់និងមាសត្រូវបានរក្សាទុកនៅក្នុងផ្ទះរបស់អតីតមន្រ្តីនានា ខណៈដែលខ្លួនមិនទាន់ដឹងពីគោលបំណងនៃការរក្សាទុកនេះនោះទេ។
នៅក្នុងសេចក្តីថ្លែងការណ៍ដាច់ដោយឡែកមួយផ្សេងទៀត ធនាគារកណ្តាល ក៏បានជំរុញឱ្យជនជាតិអាហ្វហ្គានីស្ថានប្រើប្រាស់រូបិយបណ្ណអាហ្វហ្គានីស្ថានក្នុងស្រុករបស់ប្រទេស ស្របពេលដែលមានការព្រួយបារម្ភកាន់តែខ្លាំងឡើងថា ធនាគារនិងក្រុមហ៊ុនរបស់ប្រទេសមួយចំនួនកំពុងតែខ្វះខាតថវិកា ជាពិសេសប្រាក់ដុល្លារដែលត្រូវបានប្រើប្រាស់យ៉ាងទូលំទូលាយកាលពីពេលកន្លងទៅ។
នៅក្នុងសញ្ញាមួយដែលថា ក្រុមតាលីបង់បច្ចុប្បន្នកំពុងព្យាយាមយកទ្រព្យសម្បត្តិត្រលប់មកវិញដែលជាកម្មសិទ្ធិរបស់អតីតមន្រ្តីរដ្ឋាភិបាលនានា ធនាគារកណ្តាលក៏បានចេញសារាចរមួយទៅកាន់ធនាគារក្នុងស្រុកកាលពីសប្តាហ៍មុន ដោយស្នើសុំឱ្យពួកគេបង្កកគណនីធនាគាររបស់បុគ្គលទាំងឡាយដែលជាប់ពាក់ព័ន្ធនឹងរដ្ឋាភិបាលមុនផងដែរ។ នេះបើតាមការឱ្យដឹងពីធនាគារពាណិជ្ជចំនួនពីរនៅក្នុងប្រទេស៕
