ក្រសួងការបរទេសអាមេរិក បានឱ្យដឹងនៅថ្ងៃពុធម្សិលមិញថា សហរដ្ឋអាមេរិកបានជួយសម្រួលដល់ការចាកចេញរបស់ពលរដ្ឋអាមេរិកយ៉ាងតិច៣៦នាក់ និងអ្នករស់នៅអចិន្ត្រៃយ៍ស្របច្បាប់ចំនួន២៤នាក់ផ្សេងទៀត ចេញពីអាហ្វហ្គានីស្ថានចាប់តាំងពីថ្ងៃទី៣១ ខែសីហា តាមរយៈជើងហោះហើរពិសេស (charter flights) និងផ្លូវគោក។
បន្ទាប់ពីចំណាយរយៈពេលពីរទសវត្សរ៍នៅអាហ្វហ្គានីស្ថាន សហរដ្ឋអាមេរិកបានដកកងទ័ពទាំងអស់របស់ខ្លួននៅចុងខែសីហា ដែលបានបន្សល់ទុកនូវពលរដ្ឋអាមេរិកប្រមាណជា១០០នាក់ និងជនជាតិអាហ្វហ្គានីស្ថានដែលមានហានិភ័យរាប់ពាន់នាក់ផ្សេងទៀតនៅក្នុងប្រទេស។
ទីភ្នាក់ងារសារព័ត៌មាន Reuters បានស្រង់សម្ដីអ្នកនាំពាក្យក្រសួងការបរទេសសហរដ្ឋអាមេរិក លោក Ned Price ដែលបានថ្លែងប្រាប់អ្នកយកព័ត៌មានថា ពលរដ្ឋអាមេរិកម្នាក់ និងអ្នករស់នៅអចិន្ត្រៃយ៍ស្របច្បាប់ពីរនាក់ផ្សេងទៀត បានចាកចេញពីប្រទេសអាហ្វហ្គានីស្ថានកាលពីថ្ងៃអង្គារតាមរយៈផ្លូវគោក ខណៈដែលជើងហោះហើរពិសេសក៏បានចាកចេញពីអាកាសយានដ្ឋានអន្តរជាតិកាប៊ុលកាលពីសប្តាហ៍មុន ជាមួយពលរដ្ឋអាមេរិកនៅលើយន្តហោះផងដែរ។
លោកបន្ថែមថា៖ «ដូចអ្វីដែលយើងបានលើកឡើង ក្រសួងការបរទេសបានព្យាយាមធ្វើអ្វីគ្រប់បែបយ៉ាងតាមដែលអាចធ្វើទៅបាន»។
លោកបន្តថា៖ «សម្រាប់ជើងហោះហើរ និងបុគ្គលទាំងនេះ វាគ្មានហេតុណាមួយដែលថាពួកគេមិនអាចចាកចេញបាននោះទេ ហើយវាជាអ្វីដែលយើងកំពុងបន្តផ្តោតការយកចិត្តទុកដាក់»។
គួរបញ្ជាក់ថា បណ្ដាប្រទេសជាង៦០ ក៏ធ្លាប់បានចេញសេចក្តីថ្លែងការណ៍រួមគ្នាមួយកាលពីពេលកន្លងទៅ ដោយលើកឡើងថា ជនជាតិអាហ្វហ្គានីស្ថាន និងពលរដ្ឋអន្តរជាតិនានាដែលមានបំណងចង់ចាកចេញពីប្រទេសអាហ្វហ្គានីស្ថាន ត្រូវតែទទួលបានការអនុញ្ញាតឱ្យចាកចេញពីប្រទេសនេះ ខណៈដែលអាកាសយានដ្ឋាននិងច្រកព្រំដែនទាំងឡាយក៏ត្រូវតែបើកជានិច្ចផងដែរ៕
