ក្រសួងហិរញ្ញវត្ថុអាហ្វហ្គានីស្ថាន បានឱ្យដឹងកាលពីថ្ងៃព្រហស្បតិ៍ម្សិលមិញថា រដ្ឋាភិបាលរបស់ខ្លួនកំពុងតែធ្វើកិច្ចការងារមួយចំនួនក្នុងការដោះស្រាយបញ្ហាបើកប្រាក់ខែដល់មន្រ្តីក្នុងវិស័យសាធារណៈរបស់ខ្លួន ស្របពេលដែលរដ្ឋបាលតាលីបង់ថ្មីបច្ចុប្បន្នប្រឈមនឹងបញ្ហាសេដ្ឋកិច្ច។
មុនពេលដែលក្រុមតាលីបង់ដណ្តើមបានទីក្រុងកាប៊ុលកាលពីខែមុន មន្រ្តីសាធារណៈជាច្រើនបានលើកឡើងថា ពួកគេមិនបានទទួលប្រាក់ខែអស់រយៈពេលជាច្រើនសប្តាហ៍ ខណៈដែលធនាគារក៏ដាក់ចេញនូវវិធានការតឹងរ៉ឹងក្នុងការដកសាច់ប្រាក់ ហើយតម្លៃទំនិញនានាកើនឡើង ដែលធ្វើឱ្យពួកគេជាច្រើនប្រឈមនឹងការលំបាកធ្ងន់ធ្ងរក្នុងជីវភាព។
ឆ្លើយតបទៅនឹងករណីនេះ ក្រសួងបានឱ្យដឹងថា «បញ្ហាបច្ចេកទេស» បានបណ្ដាលឱ្យមានការពន្យារពេលក្នុងការបើកប្រាក់ខែដល់មន្រ្តីក្នុងវិស័យទាំងនេះ ប៉ុន្តែក្រុមការងារពិសេសកំពុងតែធ្វើការលើបញ្ហានេះហើយ ខណៈដែលពួកគេនឹងដោះស្រាយឱ្យបានឆាប់រហ័សតាមដែលអាចធ្វើទៅបាន។
ទីភ្នាក់ងារសារព័ត៌មាន Reuters បានស្រង់សេចក្តីថ្លែងការណ៍មួយរបស់ក្រសួងហិរញ្ញវត្ថុអាហ្វហ្គានីស្ថានដែលបានបង្ហោះនៅលើទំព័រហ្វេសប៊ុក យកមកចុះផ្សាយថា៖ «បុគ្គលិកទាំងឡាយនៃរដ្ឋបាលសាធារណៈអាចបន្តការងាររបស់ពួកគេបាន ដោយមិនត្រូវមានការព្រួយបារម្ភនោះទេ»។
ទោះជាយ៉ាងណាក្ដី សេចក្តីថ្លែងការណ៍នេះមិនបានបញ្ជាក់លម្អិតបន្ថែមពីពេលវេលាច្បាស់លាស់ដែលប្រាក់ខែនេះអាចនឹងត្រូវបានផ្ដល់ជូននោះទេ ស្របពេលដែលរដ្ឋាភិបាលថ្មីក៏កំពុងតែប្រឈមមុខនឹងការខ្វះខាតសាច់ប្រាក់យ៉ាងធ្ងន់ធ្ងរផងដែរ។
គួរបញ្ជាក់ថា អង្គការសហប្រជាជាតិ កាលពីដើមសប្ដាហ៍នេះ ក៏បានព្រមានពីវិបត្តិមនុស្សធម៌ដែលអាចកើតមានឡើងនៅក្នុងប្រទេសអាហ្វហ្គានីស្ថាន បន្ទាប់ពីក្រុមតាលីបង់ចូលកាន់កាប់អំណាច ខណៈដែលចំនួនប្រជាជនពាក់កណ្តាលរបស់ប្រទេសនេះ ឬប្រមាណ១៨លាននាក់រស់នៅដោយពឹងផ្អែកលើជំនួយ ហើយតួលេខនេះអាចនឹងកើនឡើងបន្ថែមទៀតដោយសារតែគ្រោះរាំងស្ងួត កង្វះខាតសាច់ប្រាក់ និងស្បៀងអាហារ៕