នាយកដ្ឋានព្រហ្មទណ្ឌកម្រិតធ្ងន់ បានកោះហៅអធិការស្រុកសង្កែ និងអ្នកពាក់ព័ន្ធមួយចំនួនទៀតនៅខេត្តបាត់ដំបង ឱ្យចូលបំភ្លឺករណីរងការចោទថាបានធ្វើធ្វើទារុណកម្មជនសង្ស័យម្នាក់រហូតដល់ស្លាប់នាពេលកន្លងទៅ ក្រោយគណៈកម្មាធិការជាតិប្រឆាំងទារុណកម្មរកឃើញតម្រុយដូចពាក្យបណ្តឹងរបស់គ្រួសារជនរងគ្រោះ។
កាលពីថ្ងៃទី១៦ ខែមិថុនា ឆ្នាំ២០២១ គណៈកម្មាធិការជាតិប្រឆាំងទារុណកម្មរបស់រដ្ឋាភិបាល ស្នើអគ្គស្នងការដ្ឋាននគរបាលជាតិបើកការស៊ើបអង្កេតបន្ថែម ដើម្បីរកការពិតនិងនាំខ្លួនមន្ត្រីពាក់ព័ន្ធមកទទួលទោស ក្រោយពីមានពាក្យបណ្តឹងពីក្រុមគ្រួសារសព។
បើតាមការវាយតម្លៃជំហានដំបូង ក្រោយការចុះស៊ើបអង្កេតដល់កន្លែងកើតហេតុនិងសាកសួរគ្រប់ភាគីពាក់ព័ន្ធ គណៈកម្មាធិការនេះបានសន្និដ្ឋានថា ការស្លាប់របស់ជនសង្ស័យ ពេជ្រ ធារ៉េត អំឡុងឃុំខ្លួននៅអធិការដ្ឋាននគរបាលស្រុកសង្កែ ខេត្តបាត់ដំបង អាចជាប់ពាក់ព័ន្ធនឹងការធ្វើទារុណកម្ម។
គណៈកម្មាធិការនេះបញ្ជាក់ដូច្នេះថា៖ «ករណីនេះអាចមានការធ្វើទារុណកម្មស្រាលឬធ្ងន់ទៅលើជនសង្ស័យ អំឡុងពេលឃុំខ្លួនបណ្តោះអាសន្ននៅអធិការដ្ឋាននគរបាលស្រុកសង្កែ ខណៈពេលដែលជនសង្ស័យកំពុងមានអាការឡេះឡះរំខានដល់មន្ត្រីនគរបាលនៅទីនោះ»។
នាយរងការិយាល័យព្រហ្មទណ្ឌកម្រិតធ្ងន់ លោក ជុំ ហឿន ឱ្យវីអូឌីដឹងកាលពីថ្ងៃសុក្រថា ដំណើរការស៊ើបបានដំណើរការហើយ ដោយថា លោកបានកោះហៅអធិការ និងមន្ត្រីពាក់ព័ន្ធមួយចំនួនរួមក្នុងកំណត់ហេតុ និងម្តាយឪពុកក្មេកជនរងគ្រោះ ឱ្យចូលមកនាយកដ្ឋាននេះ ចាប់ពីថ្ងៃទី២០ ខែកញ្ញា ដល់ថ្ងៃទី២២ ខែកញ្ញា ដើម្បីសួរនាំបន្ថែម។
អ្នកស្រី ពេជ្រ លីណា ដែលត្រូវជាបងស្រីបង្កើតរបស់ជនរងគ្រោះ និងជាដើមបណ្តឹងផងនោះ បាននិយាយថា គាត់ត្រូវបានមន្ត្រីជូនដំណឹងពីការចាប់ដំណើរការស៊ើបអង្កេតបន្តជុំវិញការស្លាប់របស់ប្អូនគាត់។
អ្នកស្រីថា៖ «ខ្ញុំសូមស្នើទៅដល់នាយកដ្ឋានព្រហ្មទណ្ឌកម្រិតធ្ងន់ក្រសួងមហាផ្ទៃ សូមឱ្យលោកជួយពន្លឿនរកយុត្តិធម៌ឱ្យប្អូនខ្ញុំ ដោយសារប្អូនខ្ញុំគាត់ស្លាប់គឺអយុត្តិធម៌ខ្លាំងណាស់ ប្អូនខ្ញុំមិនមែនជាអ្នកទោស ត្រឹមតែជាជនសង្ស័យ ប៉ុន្តែត្រូវសមត្ថកិច្ចស្រុកសង្កែយកទៅសួរចម្លើយតែជាង៣ម៉ោង វាយប្អូនខ្ញុំរហូតស្លាប់ ស្លាកស្នាមគឺវាយប្អូនខ្ញុំសុសសាច់។ អ៊ីចឹងខ្ញុំចង់ឱ្យអ្នកពាក់ព័ន្ធ ត្រូវតែទទួលទោស»។
សូមរំឭកជូនថា កាលពីថ្ងៃទី៣ ខែមេសា ឆ្នាំ២០២១ មន្ត្រីនគរបាលស្រុកសង្កែ ខេត្តបាត់ដំបង បានចាប់ខ្លួនលោក ពេជ្រ ធារ៉េត ក្រោយពីមានតម្រុយថា គាត់ជាអ្នករៀបចំគម្រោងសម្លាប់ប្រពន្ធដោយឆក់ខ្សែភ្លើង។ ប៉ុន្តែជនសង្ស័យរូបនោះបានស្លាប់នៅថ្ងៃដដែល ក្រោយពីបញ្ជូនចេញពីអធិការដ្ឋាននគរបាលស្រុកសង្កែយកទៅសង្គ្រោះនៅមន្ទីរពេទ្យ។
ករណីនេះ ក្រុមគ្រួសារសព គឺអ្នកស្រី ពេជ្រ លីណា បានប្តឹងចោទមន្ត្រីនគរបាលពាក់ព័ន្ធថាបានធ្វើទារុណកម្មប្អូនរបស់ខ្លួនរហូតដល់ស្លាប់ ដើម្បីស្វែងរកយុត្តិធម៌ ដោយសម្អាងទៅលើស្នាមជាំនៅលើដងខ្លួន និងមានឈាមហូរតាមត្រចៀកនិងមាត់ ពេលយកសពទៅដល់ផ្ទះ។ ក្រោយមក គណៈកម្មាធិការជាតិប្រឆាំងទារុណកម្មនៃក្រសួងមហាផ្ទៃ បានចុះស៊ើបករណីនេះតាមពាក្យបណ្តឹងរបស់អ្នកស្រី ពេជ្រ លីណា។
បើទោះជាការស៊ើបអង្កេតបឋមបានរកឃើញថា ការស្លាប់របស់ជនសង្ស័យអាចជាប់ពាក់ព័ន្ធនឹងការធ្វើទារុណកម្មក៏ដោយ ក៏គណៈកម្មាធិការជាតិរបស់រដ្ឋាភិបាលមួយនេះនៅមិនទាន់បញ្ជូនករណីដែលបានរកឃើញនេះទៅតុលាការ ដើម្បីចាត់វិធានការច្បាប់នៅឡើយទេ ដោយស្នើទៅអគ្គស្នងការដ្ឋាននគរបាលជាតិបើកការស៊ើបអង្កេតបន្ថែម៕
