តារាភាពយន្តហូលីវូដ (Hollywood) លោកស្រី អេនហ្យឺលីណា យូលី (Angelina Jolie) មានគម្រោងធ្វើដំណើរមកកាន់ប្រទេសកម្ពុជាជាថ្មីម្តងទៀតនៅឆ្នាំ២០២២ខាងមុខ ដើម្បីសម្ពោធកម្មវិធីចិញ្ចឹមឃ្មុំសំរាប់ស្ត្រី នៅឯស្រុកសំឡូត ខេត្តបាត់ដំបង។
លោកស្រី អេនហ្យឺលីណា យូលី (Angelina Jolie) អាយុ៤៦ឆ្នាំ មានគម្រោងហ្វឹកហាត់ដល់ស្ត្រីខ្មែរចំនួន៥០នាក់ពីរបៀបនៃការចិញ្ចឹមឃ្មុំ ក្នុងរយៈពេល៥ឆ្នាំខាងមុខ។ កម្មវិធីនេះគ្រោងបង្កើតសំបុកឃ្មុំ ចំនួន២ ៥០០កន្លែង ដែលអាចផ្ទុកសត្វឃ្មុំប្រមាណជាង១២៥លានឃ្មុំ នៅក្នុងជីវមណ្ឌលចំនួន២៥ នៅតាមបណ្តាប្រទេសមួយចំនួន និងនៅប្រទេសកម្ពុជា។
តំណាងអង្គការសហប្រជាជាតិ United Nation in Cambodia បានប្រកាសនៅលើគណនីហ្វេសប៊ុករបស់ខ្លួនកាលពីថ្ងៃទី២០ ខែកញ្ញាថា លោកស្រី Angelina Jolie បន្តបង្កើនការយល់ដឹងអំពីការអភិរក្សសត្វឃ្មុំ និងសារៈសំខាន់នៃការវិនិយោគលើការអប់រំសម្រាប់ស្ត្រីពីរបៀបនៃការចិញ្ចឹមឃ្មុំនៅឯស្រុកសំឡូត ខេត្តបាត់ដំបង ជាទីដែលមានផ្ទះលោកស្រីនៅទីនោះ។
លោកស្រី Angelina Jolie បានផ្តល់បទសម្ភាសន៍ដល់ទស្សនាវដ្តីមួយឈ្មោះ People ថា៖ «យើងនឹងធ្វើការបន្ថែមទៀតជាមួយយូណេស្កូ [UNESCO] ដើម្បីស្វែងយល់ពីរបៀបធ្វើការជាមួយបណ្ដាប្រទេស និងឋបជីវមណ្ឌលទាំងនេះ ការបណ្តុះបណ្តាលបន្ទាប់នឹងធ្វើឡើងនៅផ្ទះរបស់ខ្ញុំ គឺនៅស្រុកសំឡូត ប្រទេសកម្ពុជា»៕