សាលាដំបូងរាជធានីភ្នំពេញ នៅរសៀលថ្ងៃអង្គារនេះ បានចេញដីកាបញ្ឈប់ការតាមចាប់ខ្លួនលោកបណ្ឌិត សេង សារី អ្នកស្រាវជ្រាវនិងឃ្លាំមើលការអភិវឌ្ឍសង្គម បន្ទាប់ពីការអំពាវនាវរបស់លោកនាយករដ្ឋមន្ត្រី ហ៊ុន សែន។
យោងតាមដីកាបញ្ឈប់ឱ្យចាប់ខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញ លោក ញឹម ពិសាល ចុះថ្ងៃទី២១ ខែកញ្ញា ឆ្នាំ២០២១នេះ បានបង្គាប់មកកងកម្លាំងមានសមត្ថកិច្ចបញ្ឈប់ការចាប់ខ្លួនលោកបណ្ឌិត សេង សារី។
សាលាដំបូងរាជធានីភ្នំពេញ បានចោទប្រកាន់លោកបណ្ឌិត សេង សារី ពីបទ «រួមគំនិតក្បត់ និងញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» តាមមាត្រា៤៥៣ មាត្រា៤៩៤ និងមាត្រា៤៩៥ នៃក្រមព្រហ្មទណ្ឌកម្ពុជា។
ការចេញដីកាបញ្ឈប់ការចាប់ខ្លួនលោកបណ្ឌិត សេង សារី នេះ បានធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បានអំពាវនាវដល់តុលាការ កាលពីថ្ងៃទី២០ ខែកញ្ញា ឱ្យពិចារណាទម្លាក់ចោលការចោទប្រកាន់ទៅលើអ្នកស្រាវជ្រាវសង្គមនិងវិភាគនយោបាយ លោកបណ្ឌិត សេង សារី ដោយថា ការអត្ថាធិប្បាយបែបវិភាគរបស់បណ្ឌិតរូបនេះជាការវិភាគបែបសេណារីយ៉ូ មិនមែនគាំទ្រគំនិតបង្កើតរដ្ឋាភិបាលបង្រួបបង្រួមជាតិដែលផ្តួចផ្តើមដោយអតីតមេដឹកនាំបក្សប្រឆាំង លោក សម រង្ស៊ី នោះទេ។
លោកបណ្ឌិត សេង សារី បច្ចុប្បន្នត្រូវបានគេដឹងថា កំពុងស្ថិតនៅក្នុងប្រទេសថៃ៕
