អាគារកាស៊ីណូណាហ្គាវើលដ៍ទាំង២សាខា ត្រូវបានរាយការណ៍ថា បានបើកដំណើរការឡើងវិញជាងមួយសប្តាហ៍មកហើយ ខណៈរដ្ឋបាលរាជធានីភ្នំពេញទើបចេញសេចក្តីសម្រេចនៅថ្ងៃពុធម្សិលមិញ ឱ្យបន្តផ្អាកអាជីវកម្មប្រភេទនេះរយៈពេល២សប្តាហ៍បន្ថែម។
ក្នុងសេចក្តីប្រកាសចុះថ្ងៃទី២២ ខែកញ្ញា ឆ្នាំ២០២១ រដ្ឋបាលរាជធានីភ្នំពេញសម្រេចបន្តផ្អាកជាបណ្តោះអាសន្ននូវសកម្មភាពការងារ មុខរបរ និងអាជីវកម្ម ដែលងាយប្រឈមហានិភ័យឆ្លងរាលដាលជំងឺកូវីដ-១៩ រាប់ទាំងអាជីវកម្មកាស៊ីណូ រហូតដល់ថ្ងៃទី៧ ខែតុលា ឆ្នាំ២០២១។
ណាហ្គាវើលដ៍ទាំង២សាខា ស្ថិតនៅខណ្ឌចំការមន ត្រូវបានបិទទ្វារជាបណ្តោះអាសន្ននៅខែមីនា ឆ្នាំ២០២១ ដើម្បីចូលរួមបង្ការនិងទប់ស្កាត់ការរីករាលដាលនៃជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ បើតាមរបាយការណ៍របស់ក្រសួងសុខាភិបាល តួលេខករណីឆ្លងសរុបបានកើនដល់ជាង១សែន៦ពាន់នាក់ និងស្លាប់ជាង២ ០០០នាក់។
ពាក់ព័ន្ធបញ្ហានេះ ក្រុមហ៊ុនណាហ្គាវើលដ៍ បានសម្រេចរំសាយបុគ្គលិកទ្រង់ទ្រាយធំជាង១ ០០០ នាក់ រួមមានទាំងថ្នាក់ដឹកនាំសហជីព និងប្រតិភូបុគ្គលិក ដែលនាំឱ្យមានការប្តឹងជំទាស់ពីថ្នាក់ដឹកនាំសហជីពទៅក្រសួងការងារ និងរហូតដល់ក្រុមប្រឹក្សាអាជ្ញាកណ្តាល។
វីអូឌី មិនអាចទាក់ទងសុំការឆ្លើយតបពីប្រធានប្រតិបត្តិបុគ្គលិកនៃក្រុមហ៊ុន ណាហ្គាវើលដ៍ លោក Mike Ngai បានទេ នៅថ្ងៃព្រហស្បតិ៍នេះ។
យ៉ាងណា បុគ្គលិករង់ចាំឆ្លើយតបសំណួររបស់ក្រុមហ៊ុនតាមទូរសព្ទមួយរូប បានប្រាប់ VOD នៅថ្ងៃពុធ ទី២២ ខែកញ្ញា ថាកាស៊ីណូណាហ្គាវើលដ៍បានបើកដំណើរការឡើងវិញនៅថ្ងៃទី១៥ ខែកញ្ញា ឆ្នាំ២០២១ ប៉ុន្តែលោកបដិសេធឆ្លើយតបនឹងសំណួរបន្ថែម ដោយរុញឱ្យទៅសួរផ្នែកទីផ្សារ។
បុគ្គលិកទីផ្សារជាន់ខ្ពស់នៃក្រុមហ៊ុនណាហ្គាវើលដ៍ លោក ចាន់ ប្រុស បានប្រាប់ វីអូឌី ថាក្រុមហ៊ុនបានធ្វើតេស្តរហ័សលើបុគ្គលិកទូទៅ ដើម្បីប៉ាន់ប្រមាណមើលករណីវិជ្ជមានកូវីដ-១៩ ក្នុងចំណោមពួកគេ ដោយបានធ្វើក្នុងទ្រង់ទ្រាយតូចប្រមាណ១០០នាក់ក្នុងមួយថ្ងៃ។
ប្រភពដដែលបន្ថែមដោយមិនបញ្ជាក់ពីកាលបរិច្ឆេទជាក់លាក់ឬមូលហេតុនៃការធ្វើតេស្តថា ថ្មីៗនេះក្រុមហ៊ុនបានបង្កើនការធ្វើតេស្តក្នុងទ្រង់ទ្រាយធំ៥០០នាក់ក្នុងមួយថ្ងៃ ហើយបុគ្គលិកម្នាក់ៗត្រូវធ្វើតេស្តជាប្រចាំក្នុងមួយសប្តាហ៍ម្តង។
លោកបន្តថា អ្នកដែលរកឃើញវិជ្ជមានកូវីដ-១៩មួយចំនួន ត្រូវបញ្ជូនទៅមណ្ឌលថែទាំនៅកោះពេជ្រ និងមួយចំនួនដែលរកឃើញអវិជ្ជមានត្រូវនៅសម្រាកនៅក្នុងអាគារ។
លោក ចាន់ ប្រុស បន្ថែមថា៖ «មុនៗយើងយករាល់ថ្ងៃដែរ ប៉ុន្តែមុនៗយើងទ្រង់ទ្រាយតូច តែ១០០ [ឬ] ២០០នាក់ ទៅ៣០០នាក់ ដល់ឥលូវ យើងយកដល់៥០០នាក់ យកសំណាកហ្នឹង។ ពួកគាត់ឡើងមក យើងចេះតែអញ្ជើញគាត់មក ដល់ពេលអ៊ីចឹង ឥលូវវិលជុំហើយ។ វិលជុំអ៊ីចឹង គឺយើង១ថ្ងៃប្រហែលជា៥០០នាក់អី យើងយកសំណាក»។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរប្រចាំក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ឱ្យដឹងថា ក្រុមហ៊ុនណាហ្គាវើលដ៍ ពិតជាបានបើកទ្វារឡើងវិញមែន ដោយចាប់បើកទទួលភ្ញៀវចូលនៅថ្ងៃទី១៤ ខែកញ្ញា បន្ទាប់ពីបើកឱ្យបុគ្គលិកចូលធ្វើការវិញនៅមួយថ្ងៃមុន។
ថ្នាក់ដឹកនាំសហជីពដែលមានឈ្មោះក្នុងបញ្ជីជម្រុះបុគ្គលិកជាង១ ០០០នាក់រូបនេះ បន្ថែមថា ការបើកឡើងវិញនេះ ក្រុមហ៊ុនអនុវត្តវិធានការតេស្តរហ័សវិលជុំសម្រាប់បុគ្គលិកមួយសប្តាហ៍ម្តង និងសម្រាប់ភ្ញៀវមុនពេលអនុញ្ញាតឱ្យចូលមួយសប្តាហ៍មួយលើក។
ប្រភពដដែលបន្ថែមថា ការបើកឡើងវិញនេះ គឺល្អសម្រាប់បុគ្គលិកកម្មករដែលបានបាត់បង់ការងារចាប់ពីប្រតិបត្តិការរបស់ក្រុមហ៊ុនបានផ្អាកតាំងពីខែមីនា។ យ៉ាងណា កញ្ញានៅបារម្ភបញ្ហាសុវត្ថិភាពពីជំងឺរាតត្បាតកូវីដ-១៩ និងសិទ្ធិការងារផ្សេងៗទៀតរបស់បុគ្គលិកកម្មករ នៅពេលបញ្ហាបញ្ឈប់ថ្នាក់ដឹកនាំសហជីពនិងប្រតិភូតំណាងបុគ្គលិកពីការងារមិនទាន់ត្រូវបានដោះស្រាយ។
កញ្ញា ឈឹម ស៊ីថរ និយាយថា៖ «នៅពេលដែលការតវ៉ាបញ្ហាហ្នឹងមិនទាន់ត្រូវបានបញ្ចប់ ជាពិសេសតំណាងកម្មករ និយោជិត មានថ្នាក់ដឹកនាំសហជីពទាំងអស់ អត់ទាន់បានចូលធ្វើការវិញ អ៊ីចឹងនៅពេលបើកដំណើរការ អ៊ីចឹងកម្មករគាត់អត់មានតំណាងរបស់គាត់នៅក្នុងការទៅជជែកជាមួយក្រុមហ៊ុន ពាក់ព័ន្ធជាមួយនឹងបញ្ហាសុវត្ថិភាព បញ្ហាការរៀបចំវេនធ្វើការ បញ្ហាផ្សេងៗទៀត។ ហើយអនាគតទៅ ពាក់ព័ន្ធជាមួយរឿងអត្ថប្រយោជន៍អីផ្សេងៗរបស់កម្មករនិយោជិតហ្នឹង ក៏មិនមាននរណាម្នាក់នៅក្នុងការទៅជជែកឱ្យបាន គេហៅថា Check and balance ឬក៏ស្មើគ្នាជាមួយខាងនិយោជកទេ គឺវាជាការចាត់ចែងទាំងស្រុងរបស់និយោជកតែម្តង»។
ទាក់ទងនឹងការបើកឡើងវិញនេះ អភិបាលរងរាជធានីភ្នំពេញ លោក កើត ឆែ នៅមិនទាន់ទទួលបានព័ត៌មាននេះនៅឡើយ។ លោកបានថ្លែងថា ការបើកទ្វាររបស់អាគារកាស៊ីណូនេះ អាចជាការបើកសម្រាប់សេវាកម្មភោជនីយដ្ឋាន ឬទទួលបុគ្គលិកឱ្យចូលធ្វើចត្តាឡីស័ក ដែលមិនមែនជាការល្មើសនឹងបម្រាមនោះទេ។ យ៉ាងណា លោកថា សាលារាជធានីនឹងចុះស្រាវជ្រាវលើព័ត៌មាននេះ។
លោក កើត ឆែ មានប្រសាសន៍ថា៖ «ចុះគេបើកទ្វារ ជួនកាលគេបើកទ្វារទទួលបុគ្គលិកគេធ្វើចត្តាឡីស័កអីទៅ […] ជួនកាលគេបើក Restaurant [ភោជនីយដ្ឋាន] មានអីខុស មិនអ៊ីចឹង? យើងឱ្យបើក Restaurant ទេតើ! មិនអ៊ីចឹង? ឥលូវចាំខ្ញុំស្រាវជ្រាវសិន ថាគេបើកអីសិន»។
ក្រុមហ៊ុន NagaCorp បានចេញរបាយការណ៍បណ្តោះអាសន្នស្តីពីប្រាក់ចំណូលក្នុងរយៈពេល៦ខែដើមឆ្នាំ២០២១ នៅថ្ងៃចន្ទ ទី២០ ខែកញ្ញា ឆ្នាំ២០២១ របស់អាជីវកម្មក្រុមហ៊ុនសាខាណាហ្គាវើលដ៍។ តាមរបាយការណ៍កម្រាស់៥៦ទំព័រនោះ ណាហ្គាវើលដ៍ រកចំណូលបានជាង១៣០លានដុល្លារ នៅពាក់កណ្តាលដើមឆ្នាំ២០២១ ដោយធ្លាក់ចុះជិត៣០០ភាគរយ ធៀបនឹងរយៈពេលដូចគ្នាក្នុងឆ្នាំ២០២០ ដែលទទួលបានជាង៣៧៧លានដុល្លារ ខណៈប្រាក់ចំណេញដុលទទួលបានជាង៧៤លានុដល្លារ ធ្លាក់ចុះជាង២៣០ភាគរយ៕
