សហភាពការងារកម្ពុជា ស្នើសុំកិច្ចអន្តរាគមន៍ពីរដ្ឋមន្ត្រីក្រសួងការងារ និងបណ្តុះបណ្ដាលវិជ្ជាជីវៈ ជួយដោះស្រាយបញ្ចប់វិវាទការងារនៅក្រុមហ៊ុនអាកាសចរណ៍ស៊ីវិល (VINCI) នៅខេត្តសៀមរាប ក្រោយមន្ត្រីចុះផ្សះផ្សាមិនសះជាគ្នា។
កាលពីថ្ងៃទី២២ ខែកញ្ញា ឆ្នាំ២០២១ សហភាពការងារកម្ពុជា បានដាក់លិខិតមួយទៅរដ្ឋមន្ត្រីក្រសួងការងារ លោក អ៊ិត សំហេង សុំឱ្យជួយបញ្ជូនចំណុចទាមទារទី៥ របស់សហជីពព្រលានយន្តហោះទាំង៣ ក្នុងខេត្តសៀមរាប ទៅក្រុមប្រឹក្សាអាជ្ញាកណ្ដាលដោះស្រាយបន្ត។
ក្នុងលិខិតនេះ សហភាពការងារកម្ពុជា លើកឡើងថា កាលពីថ្ងៃទី១២ ខែកក្កដា ឆ្នាំ២០២១ សហជីពទាំង៣ប្រចាំនៅព្រលានយន្តហោះក្នុងខេត្តសៀមរាប បានដាក់បណ្តឹងអំពីវិវាទរួមមួយទៅនាយកដ្ឋានដោះស្រាយវិវាទការងារ ដើម្បីសុំជួយផ្សះផ្សាការទាមទារចំនួន៥ចំណុចជាមួយភាគីក្រុមហ៊ុន។
សហភាពការងារ ឱ្យដឹងទៀតថា នៅថ្ងៃទី៩ ខែកញ្ញានេះ មន្ត្រីទទួលបន្ទុកផ្សះផ្សាវិវាទ បានសម្របសម្រួលផ្សះផ្សារវាងសហជីពនិងភាគីក្រុមហ៊ុនលើការទាមទារទាំង៥ចំណុចនោះ ប៉ុន្តែសះជាបានតែ៤ចំណុចប៉ុណ្ណោះ ខណៈចំណុចទី៥ ដែលសហជីពទាមទារឱ្យក្រុមហ៊ុនសងប្រាក់ឈ្នួល ប្រាប់ឧបត្ថម្ភខែទី១៣ និងប្រាក់បន្ទាប់បន្សំផ្សេងៗដែលថាក្រុមហ៊ុនបានកាត់ដោយខុសច្បាប់ គឺមិនសះជាគ្នាឡើយ ដោយលើកហេតុផលថា បានដោះស្រាយនៅក្រសួងការងារ និងក្រុមប្រឹក្សាអាជ្ញាកណ្ដាលរួចហើយ។
លិខិតដដែលនេះបានលើកឡើងថា ការបដិសេធមិនបញ្ជូនចំណុចទាមទារទី៥ ទៅក្រុមប្រឹក្សាអាជ្ញាកណ្តាលដោះស្រាយបន្តនេះ បានចោទជាបញ្ហាដ៏ធំពាក់ព័ន្ធនឹងការអនុវត្តតួនាទីរបស់មន្ត្រីទទួលបន្ទុកផ្សះផ្សាវិវាទ។
ពាក់ព័ន្ធករណីនេះ សហភាពការងារកម្ពុជា បានស្នើដល់រដ្ឋមន្ត្រីក្រសួងការងារ ជួយអន្តរាគមន៍ដោយធ្វើយ៉ាងណាបញ្ជូនចំណុចទាមទារទី៥ដែលមិនសះជាគ្នានេះ ទៅដោះស្រាយតាមនីតិវិធីនៅក្រុមប្រឹក្សាអាជ្ញាកណ្ដាលបន្ត។
ប្រធានសហភាពការងារកម្ពុជា លោក អាត់ ធន់ មានប្រសាសន៍បន្ថែមលើលិខិតនេះថា មូលហេតុដែលសហភាពការងារកម្ពុជាទាមទារឱ្យបញ្ជូនសំណុំរឿងវិវាទការងារនៅព្រលានយន្តហោះខេត្តសៀមរាប ទៅដោះស្រាយបន្តនៅក្រុមប្រឹក្សាអាជ្ញាកណ្ដាល ដោយសារតែការដោះស្រាយរបស់មន្ត្រីក្រសួងការងារនាពេលកន្លងមក ភាគីក្រុមហ៊ុនមិនយល់ព្រម ហើយក្រសួងការងារព្យាយាមទុកសំណុំរឿងនេះចោល មិនបញ្ជូនទៅក្រុមប្រឹក្សាអាជ្ញាកណ្ដាលដោះស្រាយបន្ត។
មេសហជីពរូបនេះបន្តថា ប្រសិនបើសំណុំរឿងនេះបានបញ្ជូនទៅក្រុមប្រឹក្សាអាជ្ញាកណ្ដាលដោះស្រាយបន្តនោះ កម្មករមានឱកាសឈ្នះច្រើន។
លោកបន្ថែមថា៖ «ក្រសួងការងារ គួរតែយកចិត្តទុកដាក់ដោះស្រាយឱ្យមានប្រសិទ្ធភាពបន្តិច ពីព្រោះមួយរយៈនេះ ក្រុមហ៊ុនបានបញ្ឈប់បុគ្គលិករហូត។ កិច្ចព្រមព្រៀងមាន ក្រុមហ៊ុនមិនអនុវត្ត ហើយបុគ្គលិកបានខាតប្រយោជន៍ជាហូរហែ។ ពេលដែលដោះស្រាយទៅ នៅតែមិនមានប្រសិទ្ធភាពអីសោះ ហើយក្រសួងដូចជាមិនមានឥទ្ធិពលអីជំរុញឱ្យក្រុមហ៊ុនអនុវត្តសោះ»។
អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ បានបញ្ជាក់តាមតេឡេក្រាមថា ក្រសួងការងារមានតួនាទីផ្សះផ្សា តែប្រសិនបើការផ្សះផ្សានោះមិនត្រូវគ្នាទេ ខាងក្រសួងនឹងបញ្ជូនសំណុំរឿងនោះទៅដោះស្រាយបន្តនៅក្រុមប្រឹក្សាអាជ្ញាកណ្ដាលទៀត។
លោកបន្ថែមថា៖ «យើងបានបំពេញតួនាទីនេះយ៉ាងខ្ជាប់ខ្ជូន ត្រង់ថាភាគីណាមួយទទួលឬអត់ វាគឺជាការសម្រេចចិត្តរបស់ភាគីនោះ»។
វីអូឌី មិនអាចស្វែងរកការឆ្លើយតបពីតំណាងក្រុមហ៊ុនអាកាសចរណ៍ស៊ីវិល VINCI បានទេ នៅថ្ងៃសុក្រនេះ។
ប៉ុន្តែនាយកប្រតិបត្តិទំនាក់ទំនងសាធារណៈ នៃក្រុមហ៊ុនអាកាសចរណ៍ស៊ីវិល វីនស៊ី (VINCI) លោក ខែក នរីនដា ប្រាប់ វីអូឌី តាមសារអ៊ីម៉ែលកាលពីខែកក្កដា ឆ្នាំ២០២១ ថាក្រុមហ៊ុនសម្រេចបញ្ឈប់បុគ្គលិកក្នុងចំនួនច្រើនបែបនេះ ដោយសារវិបត្តិកូវីដ-១៩ និងការធ្លាក់ចុះនៃចំនួនភ្ញៀវទេសចរផង។ លោកបន្តថា ចំនួនអ្នកដំណើរនៅអាកាសយានដ្ឋាននេះបានធ្លាក់ចុះ៨៤ភាគរយក្នុងឆ្នាំ២០២០ ហើយក្រុមហ៊ុនបារម្ភថា នៅឆ្នាំ២០២១ ចំនួនភ្ញៀវនឹងបន្តធ្លាក់ចុះបន្ថែមទៀត។
លោកបន្តថា ស្ថានការណ៍នេះកាន់តែអាក្រក់ទៅៗ ដោយគិតក្នុងរយៈពេល៦ខែដំបូងក្នុងឆ្នាំ២០២១ ក្នុងនោះ ការធ្វើដំណើររបស់ភ្ញៀវទេសចរបានបន្តធ្លាក់ចុះ ៩៩,៩% ហើយភាពមិនប្រាកដប្រជាអាចនឹងមានជាច្រើនទៀតនៅពេលខាងមុខ។
គួររម្លឹកថា កាលពីខែធ្នូ ឆ្នាំ២០២០ បុគ្គលិក១៦១នាក់របស់ក្រុមហ៊ុនអាកាសចរណ៍ស៊ីវិល VINCI នៅខេត្តសៀមរាប ដែលភាគច្រើនមានអតីតភាពការងារយូរឆ្នាំ ត្រូវបានក្រុមហ៊ុនបញ្ឈប់ពីការងារ ដែលបុគ្គលិកទាំងនោះអះអាងថា ការបញ្ឈប់នេះគឺក្រុមហ៊ុនមិនបានផ្តល់សំណងឬអត្ថប្រយោជន៍ផ្សេងដល់ពួកគេទៅតាមនីតិវិធីច្បាប់ឡើយ៕