បន្ទាប់ពីគ្រោះទឹកជំនន់បានវាយលុកទីក្រុងបាងកក ប្រទេសថៃ ដែលបណ្ដាលឱ្យកម្ពស់ទឹកឡើងដល់មួយម៉ែត្រ បន្ទាប់ពីមានភ្លៀងធ្លាក់អស់រយៈពេលជាច្រើនម៉ោង នាយករដ្ឋមន្រ្តី និងជារដ្ឋមន្ត្រីក្រសួងការពារជាតិថៃ លោក ប្រាយុទ្ធ ចាន់អូចា បានបញ្ជាឱ្យមានការដាក់ពង្រាយម៉ាស៊ីនបូមទឹក ដើម្បីរំដោះទឹកចេញពីប្រឡាយនានានៅក្នុងទីក្រុង ក៏ដូចជាការប្រមូលយកកាកសំណល់និងស្មៅចេញ ដើម្បីធ្វើឱ្យប្រឡាយបង្ហូរទឹកមានភាពប្រសើរឡើងវិញផងដែរ។
ជាមួយគ្នានេះដែរ អគ្គលេខាធិការរងនៃនាយកដ្ឋានទឹក និងធារាសាស្ត្រ លោក Thaweesak Thanadechopon បានឱ្យដឹងថា ទឹកកម្ពស់៦៨ម៉ែត្រគូប ត្រូវបានបង្ហូរទៅកាន់ទន្លេចៅប្រាយ៉ា និងឈូងសមុទ្រថៃ ខណៈដែលម៉ាស៊ីនបូមទឹកត្រូវបានដំឡើងបន្ថែមទៀតនៅតាមតំបន់ដែលងាយរងគ្រោះដោយទឹកជំនន់ ហើយមជ្ឈមណ្ឌលដោះស្រាយបញ្ហាទឹកជំនន់ក្នុងរាជធានីក៏ដំណើរការ២៤ម៉ោងក្នុងមួយថ្ងៃផងដែរ ដើម្បីធានាឱ្យបាននូវការឆ្លើយតបទាន់ពេលវេលា ក្នុងករណីមានទឹកជំនន់កើតឡើងបន្ថែមទៀត។
នៅក្នុងបទសម្ភាសជាមួយសារព័ត៌មាន A24 News នាយករដ្ឋមន្រ្តី លោក ប្រាយុទ្ធ ចាន់អូចា បានថ្លែងថា៖ «ទឹកដែលមានចំនួនច្រើនលើសលុបនៅភាគខាងជើង ត្រូវតែបង្វែរភ្លាមៗទៅកាន់តំបន់ខាងកើតនិងខាងលិច ដើម្បីទប់ស្កាត់កុំឱ្យមានការរាំងស្ទះនៅក្នុងតំបន់កណ្ដាល»។
ទាក់ទិននឹងករណីនេះ អភិបាលក្រុងបាងកក លោក Aswin Kwanmuang បានលើកឡើងថា៖ «បច្ចុប្បន្ន យើងកំពុងតែធ្វើទំនើបកម្មប្រព័ន្ធបង្វែរទឹក ដើម្បីឱ្យទឹកជាច្រើនគីឡូម៉ែត្រការ៉េអាចត្រូវបានបង្វែរលឿនជាងមុន»។
លោកបន្តថា៖ «ទឹកទាំងអស់ពីតំបន់ឆ្នេរខាងកើត ត្រូវបានបូមចេញមកកាន់ទន្លេចៅប្រាយ៉ា និងឈូងសមុទ្រថៃ។ យើងបានបង្វែរទឹក៦៨ម៉ែត្រគូប។ ទ្វារទឹកនេះត្រូវបានសាងសង់ឡើង ដើម្បីការពារទឹកជំនន់នៅក្នុងទីក្រុងបាងកក»៕
