សាលាដំបូងរាជធានីភ្នំពេញ បានលើកពេលប្រកាសសាលក្រមលើក្រុមយុវជនខ្មែរថាវរៈ និងសមាគមសម្ព័ន្ធនិស្សិតបញ្ញវន្តខ្មែរ ក្រោមបទចោទ «ញុះញង់ឱ្យមានភាពវឹកវរដល់សន្តិសុខសង្គម»។
ក្នុងសវនាការកាលពីថ្ងៃទី៣១ ខែសីហា ឆ្នាំ២០២១ ចៅក្រមជំនុំជម្រះនៃសាលាដំបូងរាជធានីភ្នំពេញ លោក ទិត សុទ្ធីបូរ៉ាឆាត បានប្រកាសថា នឹងប្រកាសសាលក្រមក្រុមយុវជនខ្មែរថាវរៈនិងសមាគមសម្ព័ន្ធនិស្សិតបញ្ញវន្តខ្មែរចំនួន៧នាក់ នៅថ្ងៃទី២៨ ខែកញ្ញានេះ។
ប៉ុន្តែមេធាវីការពារក្ដីឱ្យសកម្មជនទាំង៧នាក់ លោក សំ ចំរើន ប្រាប់ វីអូឌី កាលពីម្សិលមិញថា តុលាការបានលើកពេលប្រកាសសាលក្រមទៅថ្ងៃក្រោយវិញ ប៉ុន្តែមិនបានបញ្ជាក់ពីកាលបរិច្ឆេទនៃការប្រកាសសាលក្រមជាថ្មីនៅពេលណានិងមូលហេតុនៃការលើកពេលនេះទេ។
លោកថា៖ «តុលាការបានប្រាប់ខ្ញុំប្រហែលម៉ោង១០ព្រឹក ថាលើកពេលប្រកាសសាលក្រម តែគេមិនបានប្រាប់ពីមូលហេតុទេ»។
សមត្ថកិច្ចបានចាប់ខ្លួនក្រុមយុវជនខ្មែរថាវរៈ រួមមាន លោក ថា ឡាវី, កញ្ញា អេង ម៉ាឡៃ ហៅ សូរ មេត្តា, លោក កើត សារ៉ាយ, កញ្ញា ឈឿន ដារ៉ាវី និងលោក ហ៊ុន វណ្ណៈ និងសមាជិកសមាគមសម្ព័ន្ធនិស្សិតបញ្ញវន្តខ្មែរ រួមមាន លោក មាន ព្រហ្មមុនី និងលោក មួង សុភ័ក្រ្ត កាលពីអំឡុងខែសីហា និងខែកញ្ញា ឆ្នាំ២០២០។
ក្រោយសមត្ថកិច្ចចាប់ខ្លួន ពួកគេត្រូវបានតុលាការចោទប្រកាន់ពីបទ «ញុះញង់ឱ្យមានភាពវឹកវរដល់សន្តិសុខសង្គម» និងបានបញ្ជូនទៅឃុំខ្លួននៅពន្ធនាគារព្រៃស ហើយគិតមកដល់ថ្ងៃទី២៨ ខែកញ្ញា ឆ្នាំ២០២១នេះ ពួកគេបានជាប់ពន្ធនាគាររយៈពេលជាង១ឆ្នាំហើយ។
ការចោទប្រកាន់របស់តុលាការធ្វើឡើងបន្ទាប់ពីពួកគេបានចូលរួមតវ៉ាទាមទារឱ្យដោះលែងលោក រ៉ុង ឈុន ដែលជាមេដឹកនាំសហជីពលេចធ្លោមួយរូប និងរៀបចំការជួបជុំដោយសន្តិវិធីនៅទីលានប្រជាធិបតេយ្យ រាជធានីភ្នំពេញ អំឡុងខែសីហា និងកញ្ញា ឆ្នាំ២០២០៕