នាយកដ្ឋានបង្ការ និងកាត់បន្ថយគ្រោះមហន្តរាយថៃ (Department of Disaster Prevention and Mitigation) បានរាយការណ៍ឱ្យដឹងនៅថ្ងៃពុធនេះថា ចំនួនអ្នកស្លាប់ដោយសារគ្រោះទឹកជំនន់ដែលបង្កឡើងដោយខ្យល់ព្យុះត្រូពិក Dianmu បានកើនឡើងដល់៧នាក់ហើយ ខណៈទឹកជំនន់នៅតែបន្តជន់លិចនៅក្នុងខេត្តចំនួន១៦ក្នុងប្រទេសនេះ។
គិតចាប់ពីថ្ងៃទី២៣ ខែកញ្ញា ទឹកជំនន់ដែលបង្កឡើងដោយខ្យល់ព្យុះនេះបានប៉ះពាល់ដល់ពលរដ្ឋចំនួន១៩៧ ៧៩៥គ្រួសារ ក្នុងនោះបានឆក់យកជីវិតមនុស្សចំនួន៧នាក់ ខណៈដែលមនុស្សម្នាក់ទៀតកំពុងបាត់ខ្លួន។
សារព័ត៌មាន Bangkok Post បានផ្សព្វផ្សាយថា ខេត្តចំនួន១៦ដែលនៅតែបន្តជន់លិចដោយសារទឹកជំនន់ គិតរហូតមកដល់ពេលនេះរួមមានខេត្ត ស៊ុឃោថ័យ (Sukhothai), ភិសនុលោក (Phitsanulok), ផេតឆាប៊ុន (Phetchabun), ភិជិត (Phichit), កាំភែងភេត (Kamphaeng Phet), ខនគែន (Khon Kaen), ឆៃយ៉ាភូមិ (Chaiyaphum), នឃុន រ៉ាដឆៈស៊ីម៉ា (Nakhon Ratchasima), ឧប៊ុន រ៉ាដឆៈថានី (Ubon Ratchathani), នឃុន សាវណ្ណ (Nakhon Sawan), ឧថ័យ ថានី (Uthai Thani), ឆ័យណាត (Chai Nat), លបប៊ុរី (Lop Buri), ស៊ុផាន់ប៊ុរី (Suphan Buri), ស៊ិងប៊ុរី (Sing Buri) និង អយុធ្យា (Ayutthaya)។
ជាមួយគ្នានេះ អាជ្ញាធរនៅទីក្រុងបាងកក ទីក្រុងនន់ថៈប៊ុរី (Nonthaburi) និងខេត្តបៈធុមថានី (Pathum Thani) ក៏ត្រូវបានជូនដំណឹងឱ្យត្រៀមទុកជាមុន ចំពោះករណីគ្រោះទឹកជំនន់ដែលអាចកើតមានឡើងផងដែរ ខណៈដែលភ្លៀងត្រូវបានរំពឹងថានឹងបន្តធ្លាក់បន្ថែមទៀត៕