ក្រុមតាលីបង់ នៅថ្ងៃពុធនេះ បានព្រមានចាត់វិធានការណាមួយ ប្រសិនបើសហរដ្ឋអាមេរិកមិនព្រមបញ្ឈប់ការបង្ហោះយន្ដហោះដ្រូន (drone) របស់ពួកគេនៅលើដែនអាកាសរបស់អាហ្វហ្គានីស្ថានទេនោះ។
ទីភ្នាក់ងារសារព័ត៌មាន Reuters បានស្រង់ការលើកឡើងរបស់ក្រុមតាលីបង់នៅក្នុងសេចក្តីថ្លែងការណ៍មួយដែលបានបង្ហោះនៅលើបណ្តាញសង្គម Twitter ថា៖ «សហរដ្ឋអាមេរិកបានរំលោភសិទ្ធិនិងច្បាប់អន្តរជាតិនានា ព្រមទាំងការប្តេជ្ញាចិត្តរបស់ពួកគេចំពោះក្រុមតាលីបង់នៅទីក្រុងដូហា ប្រទេសកាតា តាមរយៈប្រតិបត្តិការនៃយន្ដហោះដ្រូនទាំងនេះនៅក្នុងប្រទេសអាហ្វហ្គានីស្ថាន»។
ក្រុមតាលីបង់ បន្តថា៖ «យើងសូមធ្វើការអំពាវនាវសារជាថ្មីដល់ប្រទេសទាំងអស់ ជាពិសេសសហរដ្ឋអាមេរិកឱ្យមានការគោរពដល់អាហ្វហ្គានីស្ថានតាមរយៈសិទ្ធិ ច្បាប់ និងការប្តេជ្ញាចិត្តជាអន្តរជាតិ ដើម្បីការពារសកម្មភាពអវិជ្ជមានណាមួយកើតមានឡើង»។
ទាក់ទិននឹងករណីនេះ មន្រ្តីអាមេរិកមិនអាចធ្វើការទំនាក់ទំនង ដើម្បីសុំការអត្ថាធិប្បាយបានភ្លាមៗនោះទេ។
គួរបញ្ជាក់ថា ក្រុមសកម្មប្រយុទ្ធអ៊ីស្លាមតាលីបង់ បានដណ្តើមអំណាចយកមកគ្រប់គ្រងវិញនៅអាហ្វហ្គានីស្ថានកាលពីខែមុន បន្ទាប់ពីកងទ័ពអាមេរិកនិងបស្ចិមប្រទេសមួយចំនួនផ្សេងទៀតបានចាកចេញ ដោយបញ្ចប់បេសកកម្មយោធានិងការទូតរបស់ខ្លួន។
ជាមួយគ្នានេះ សហគមន៍អន្តរជាតិមួយចំនួនកាលពីពេលកន្លងទៅ ក៏បានសម្រេចបញ្ឈប់ផ្ដល់ជំនួយនានាដល់អាហ្វហ្គានីស្ថានផងដែរ ក្រោយពីប្រទេសមួយនេះធ្លាក់ចូលទៅក្នុងការគ្រប់គ្រងដោយពួកតាលីបង់៕